ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເພື່ອຊຸກຍູ້ໃຫ້ມີຄວາມຮັບຜິດຊອບ ສຳລັບອຳນາດການປົກຄອງອີຣ່ານໃນການລ່ວງລະເມີດສິດທິມະນຸດນັ້ນ ສະຫະລັດ ໃນການປະສານງານ ກັບສະຫະຣາຊະອານາຈັກ ແລະສະຫະພາບຢູໂຣບ ໄດ້ທຳການລົງໂທດຕໍ່ຊາວອີຣ່ານຕື່ມອີກ 10 ຄົນ ແລະອົງການນຶ່ງຂອງທາງການອີຣ່ານ.
ການລົງໂທດຕໍ່ສ່ວນບຸກຄົນ ແມ່ນຮວມທັງຮອງລັດຖະມົນຕີກະຊວງສືບລັບຂອງອີຣ່ານ ແລະຜູ້ບັນຊາການຄົນສຳຄັນໆ ໃນກອງກຳລັງພິທັກປະຕິວັດຂອງອີຣ່ານຫຼື IRGC. ຢູ່ໃນຖະແຫຼງການ ກະຊວງການເງິນສະຫະລັດ ເອີ້ນອົງການນັ້ນວ່າ ມູນນິທິເພື່ອການຮ່ວມມືກຳລັງພິທັກປະຕິວັດ “ຊຶ່ງເປັນຜູ້ໃຫ້ທຶນສຳລັບເຈົ້າໜ້າທີ່ກຳລັງພິທັກປະຕິວັດ ແລະຜົນປະໂຫຍດທາງດ້ານທຸລະກິດ ຂອງເຂົາເຈົ້າ.” 5 ຄົນທີ່ຮັບໜ້າທີ່ໃນສະພາບໍລິຫານ ກໍໄດ້ຖືກລະບຸໂຕເຊັ່ນດຽວກັນ.
ທ່ານເນດ ໄພຣສ໌ ໂຄສົກກະຊວງການຕ່າງປະເທດສະຫະລັດ ກ່າວວ່າ “ການເອົາມາດຕະການໃນມື້ນີ້ ແມ່ນສ່ວນນຶ່ງຂອງການລົງໂທດຮອບຫຼ້າສຸດ ທີ່ໄດ້ມີການປຶກສາຫາລືຢ່າງໃກ້ຊິດກັບພັນທະມິດແລະພາຄີຂອງພວກເຮົາແລະແນໃສ່ສ່ວນບຸກຄົນຊາວອີຣ່ານ ແລະອົງການຈັດຕັ້ງ ທີ່ພົວພັນກັບການປາບປາມຢ່າງໂຫດຮ້າຍແລະຮຸນແຮງຂອງເຈົ້າໜ້າທີ່ອີຣ່ານຕໍ່ພວກປະທ້ວງຢ່າງສັນຕິ.”
ນັບແຕ່ເລີ້ມມີການປະທ້ວງຢູ່ໃນທົ່ວປະເທດ ເມື່ອເດືອນກັນຍາປີກາຍ ຫຼັງຈາກການເສຍຊີວິດຂອງນາງມາຊາ ອາມີນີ ອາຍຸ 22 ປີພາຍໃຕ້ການຄວບຄຸມຂອງຕຳຫຼວດແລ້ວ ກຸ່ມປົກປ້ອງສິດທິມະນຸດທີ່ໜ້າເຊື່ອຖືຕ່າງໆກະປະມານວ່າ ມີຫຼາຍ ກວ່າ 19,000 ຄົນຖືກຈັບຍ້ອນພົວພັນກັບການປະທ້ວງ ຫຼາຍກວ່າ 500 ຄົນເສຍຊີວິດ ໂດຍກຳລັງຮັກສາຄວາມສະຫງົບຂອງອີຣ່ານ ມີຫຼາຍສິບຄົນໄດ້ຖືກຕັດສິນໂທດປະຫານ ແລະມີ 4 ຄົນຮູ້ວ່າໄດ້ຖືກປະຫານຊີວິດໄປແລ້ວ.
ຮວມຢູ່ໃນພວກທີ່ຖືກລົງໂທດໃໝ່ຈາກສະຫະລັດ ແມ່ນພວກເຈົ້າໜ້າທີ່ອະວຸໂສໃນກອງກຳລັງພິທັກປະຕິວັດ ຊຶ່ງເປັນເຈົ້າການຫຼັກໃນການປາບປາມຢ່າງໂຫດຮ້າຍປ່າເຖື່ອນ. ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໃຫ້ຂໍ້ສັງເກດຢູ່ໃນຖະແຫຼງການວ່າ ສອງຄົນໃນຈຳນວນນັ້ນ ຄືທ້າວໂມຮຳໝັດ ນາຊາ ອາຊີມີ ແລະທ້າວກາຣຸສ ອາຊີອາບານີ “ແມ່ນຜູ້ບັນຊາການກຳລັງພິທັກປະຕິວັດ ທີ່ຖືກກ່າວຫາວ່າ ກໍ່ຄວາມຮຸນແຮງສຸດ ໂດຍກຳລັງຮັກສາຄວາມສະຫງົບຂອງອີຣ່ານ ນັບແຕ່ໄດ້ມີການປະທ້ວງມາ.” ການກະທຳເຫຼົ່ານັ້ນ ແມ່ນຮວມທັງຍິງປືນ ທີ່ໃຊ້ລູກປືນແທ້ ເຂົ້າໃສ່ພວກເດີນຂະບວນທີ່ບໍ່ມີອາວຸດ ແລະຍິງໂຈມຕີລົດ ທີ່ພະຍາຍາມຂົນຖົງເລືອດ ໄປຊ່ວຍພວກທີ່ໄດ້ຮັບບາດເຈັບ ຢູ່ໂຮງໝໍໃນເຂດທ້ອງຖິ່ນ.
ໂຄສົກກະຊວງການຕ່າງປະເທດສະຫະລັດ ທ່ານເນດ ໄພຣສ໌ ກ່າວວ່າ ການລະບຸຊື່ໃໝ່ນີ້ ແມ່ນການສົ່ງ “ຄຳເຕືອນທີ່ຈະແຈ້ງໄປຍັງອຳນາດການປົກຄອງຂອງອີຣ່ານ ໃຫ້ຮູ່ວ່າ ໂລກພວມຈັບຕາເບິ່ງ ແລະໂລກພວມກະກຽມທີ່ຈະເອົາມາດຕະການເພື່ອຕອບໂຕ້ຕໍ່ຄວາມຮຸນແຮງ ທີ່ພວກເຈົ້າໜ້າທີ່ອີຣ່ານກໍ່ຂຶ້ນຕໍ່ປະຊາຊົນຂອງຕົນ. ..ຖ້າຫາກອີຣ່ານຍັງສືບຕໍ່ພົວພັນກັບການລະເມີດສິດທິມະນຸດເຫຼົ່ານີ້” ທ່ານໄພຣສ໌ ປະກາດວ່າ “ພວກເຮົາຈະສືບຕໍ່ທຳຄວາມກົດດັນເພີ້ມຂຶ້ນຕໍ່ອີຣ່ານ.”
ດັ່ງທີ່ລັດຖະມົນຕີການຕ່າງປະເທດບລິງເກັນໄດ້ກ່າວໄປນັ້ນ ສະຫະລັດ “ຈະສືບຕໍ່ຢືນຢູ່ຄຽງຂ້າງກັບປະຊາຊົນຊາວອີຣ່ານຜູ້ກ້າຫານ ທີ່ໄດ້ລຸກຂຶ້ນຕໍ່ສູ້ເພື່ອສິດທິພື້ນຖານຂອງພວກເຂົາເຈົ້າ ທີ່ນຳພາໂດຍພວກຍິງສາວທີ່ກ້າຫານ ຊຶ່ງທັງໝົດນີ້ ແມ່ນຢູ່ທ່າມກາງການກົດຂີ່ທີ່ຮ້າຍແຮງເປັນພິເສດ.”