Accessibility links

Breaking News

ບົດບັນນາທິການ: ສະຫະລັດຍັງສືບຕໍ່ຊຸກຍູ້ປະຊາທິປະໄຕ ໃນຄິວບາ ນິກາຣາກົວ ແລະເວເນຊູເອລາ


ພວກ​ປະ​ທ້ວງ​ໂຮມ​ຊຸມ​ນຸມ​ຕໍ່​ຕ້ານ​ການ​ຂາດ​ແຄນ​ອາ​ຫານ ທີ່​ຮາ​ວາ​ນາ ຄິວ​ບາ ວັນ​ທີ 11 ກໍ​ລະ​ກົດ 2021.

ສະຫະລັດຍັງສືບຕໍ່ຂໍອຸທິດຕົນເພື່ອເສີມຄວາມເຂັ້ມແຂງໃຫ້ແກ່ອິດສະຫຼະພາບແລະສິດທິມະນຸດ ສຳລັບປະຊາຊົນໃນຄິວບາ ນິກາຣາກົວແລະເວເນຊູເອລາ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ສະ​ຫະ​ລັດ​ຍັງ​ສືບ​ຕໍ່​ຂໍ​ອຸ​ທິດ​ຕົນ​ເພື່ອ​ເສີມ​ຄວາມ​ເຂັ້ມ​ແຂງ​ໃຫ້​ແກ່​ອິດ​ສະ​ຫຼະ​ພາບ​ແລະ​ສິດ​ທິ​ມະ​ນຸດ ສຳ​ລັບ​ປະ​ຊາ​ຊົນ​ໃນ​ຄິວ​ບາ ນິ​ກາ​ຣາ​ກົວແລະ​ເວ​ເນ​ຊູ​ເອ​ລາ ນັ້ນ​ຄື​ຄຳ​ເວົ້າ​ຂອງ​ລັດ​ຖະ​ມົນ​ຕີ​ຊ່ວຍ​ວ່າ​ການ​ກະ​ຊວງ​ຕ່າງ​ປະ​ເທດສະຫະ​ລັດ​ຮັບ​ຜິດ​ຊອບຮັບ​ຜິດ​ຊອບ ​ກິດ​ຈະ​ການ​ຊີກ​ໂລກ​ຕາ​ເວັນ​ຕົກ ທ່ານ​ບ​ຣ​າຍແອນ ນິ​ໂຄ​ລ​ສ໌.

ທ່ານ​ກ່າວ​ຕື່ມ​ວ່າ “ການ​ຈັບ​ກຸມ​ຄຸມ​ຂັງ ແລະ​ການ​ດຳ​ເນີນ​ຄະ​ດີ​ທີ່​ມີ​ຈຸດ​ປະ​ສົງ​ທາງ​ດ້ານ​ການ​ເມືອງ ​ຕໍ່​ພວກ​ເດີນ​ຂະ​ບວນ​ດ້ວຍ​ຄວາມ​ສ​ະ​ຫງົບ ໃນ​ປະ​ເທດ​ບ້ານ​ເກີດ​ເມືອງນອນ​ຂອງ​ພວກ​ເຂົາ​ເຈົ້າ ແມ່ນ​ການ​ສົບ​ປະ​ໝາດ​ຕໍ່​ປະ​ຊາ​ທິ​ປະ​ໄຕ.”

ຢູ່​ປະ​ເທດ​ຄິວ​ບາ ແທນ​ທີ່​ຈະ​ຫາ​ທາງ​ແກ້​ໄຂ​ໃນ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ປະ​ຊາ​ຊົນ​ຂອງ​ຕົນ ທ່າມ​ກາງ​ທີ່​ເກີດ​ວິ​ກິດ​ການ​ທາງ​ດ້ານ​ເສ​ດ​ຖະ​ກິດ ຊຶ່ງ​ໃນ​ປີ​ກາຍນີ້ ລັດ​ຖະ​ບານ​ໄດ້​ເລີ້ມ​ທຳ​ການ​ປາບ​ປາມ​ຮອບ​ໃໝ່​ ທາງ​ດ້​ານ​ການ​ເມືອງ ໂດຍ​ກ່າວ​ຫາ​ພວກ​ປະ​ທ້ວງ​ວ່າ ຂັດ​ຂືນ​ອຳ​ນາດ​ການ​ປົກ​ຄອງ​ຂອງ​ລັດ​ຖະ​ບານ ແລະ​ໄດ້​ຕັດ​ສິນ​ໃຫ້​ພວກ​ເຂົາ​ເຈົ້າ ຕິດ​ຄຸກ​ແຕ່ 7 ຫາ 30 ປີ.

ລັດ​ຖະ​ມົນ​ຕີ​ຊ່ວຍ​ວ່າ​ການ​ກະ​ຊວງ​ການ​ຕ່າງ​ປະ​ເທດ​ນິ​ໂຄ​ລ​ສ໌ ກ່າວ​ຕື່ມ​ວ່າ ຢູ່​ໃນ​ນິ​ກາ​ຣາ​ກົວ​ກໍ​ຄ້າຍ​ຄື​ກັນ “ອຳ​ນາດ​ການ​ປົກ​ຄອງ​ອໍ​ເຕ​ກ້າ-ມູ​ຣີ​ໂຍ ກໍ​ໄດ້​ສັ່ງ​ໃຫ້​ທຳ​ການ​ປາບ​ປາມ​ທາງ​ດ້ານ​ສິດ​ທິ​ມະ​ນຸດ​ ຢ່າງ​ໂຫດ​ຮ້າຍ​ປ່າ​ເຖື່ອນ ເພື່ອ​ຕອບ​ໂຕ້​ໃນ​ການ​ຄັດ​ຄ້ານ​ຢ່າງ​ກວ້າງຂວາງ​ຕໍ່​ນະ​ໂຍ​ບາຍ​ຕ່າງໆ​ຂອງ​ອຳ​ນາດ​ການ​ປົກ​ຄອງ ທີ່​ເຮັດ​ໃຫ້ປະ​ຊາ​ຊົນ​ນິ​ກາ​ຣາ​ກົວເສຍ​ຊີ​ວິດ 320 ກວ່າ​ຄົນ.”

ສະ​ຫະ​ລັດ​ຍັງ​ສືບ​ຕໍ່​ໃຫ້​ການ​ຊຸກ​ຍູ້​ຕໍ່​ການ​ປົກ​ຄອງ​ແບບ​ປະ​ຊາ​ທິ​ປະ​ໄຕ​ຢູ່​ໃນ​ທົ່ວ​ຊີກ​ໂລກນີ້ຮວມ​ທັງ​ໃນ​ເວ​ເນ​ຊູ​ເອ​ລາ. ໃນ​ຂະ​ນະ​ທີ່​ການ​ເລືອກ​ຕັ້ງ​ທົ່ວ​ໄປ​ຂອງ​ປະ​ເທດ​ດັ່ງ​ກ່າວ​ພວມຍັບ​ໃກ້ເດືອນ​ພະ​ຈິກປີ 2021 ເຂົ້າ​ມາ ອຳ​ນາດ​ການ​ປົກ​ຄອງນິ​ໂກ​ລາ​ສ ມາ​ດູ​ໂຣ ກໍໄດ້​ຈັບ​ກຸມ​ຄຸມ​ຂັງ ​ສະ​ມາ​ຊິກ​ພັກ​ຝ່າຍ​ຄ້ານ ​ຫຼາຍກວ່າ 40 ຄົນ​ພ້ອມທັງພວກ​ນັກ​ຂ່າວຈຳ​ນວນ​ນຶ່ງ ເພື່ອ​ວາງ​ແຜນ​ສໍ້​ໂກງ​ຜົນ​ການ​ເລືອກ​ຕັ້ງ​ຢ່າງ​ມີ​ປະ​ສິດ​ທິ​ຜົນ.

ພວກ​ນັກ​ໂທດ​ການ​ເມືອງ​ເຫຼົ່າ​ນີ້ ໄດ້​ຖືກ​ປະ​ຕິ​ເສດ ​ບໍ່​ໃຫ້​ໄດ້​ຮັບ​ຄວາມ​ຈຳ​ເປັນ​ຂັ້ນ​ພື້ນ​ຖານ​ຕ່າງໆ ເຊັ່ນ ​ອາ​ຫານ​ການ​ກິນ ນ້ຳ​ຕື່ມ ແລະ ​ຢາ​ປົວ​ພະ​ຍາດ. ຍິ່ງ​ໄປ​ກວ່ານັ້ນ “ພວກ​ນັກ​ໂທດ​ຍັງ​ຖືກ​ທໍ​ລະ​ມານ​ດ້ວຍ​ການ​ທຸບ​ຕີ ເອົາ​ຫົວ​ຈຸ່​ມ​ລົງ​ໄປ​ໃນນ້ຳ ໃຊ້​ໄຟ​ຟ້າ​ຊັອດ ແລະ​ປ່ອຍ​ໃຫ້​ຕາກ​ອາ​ກາດ​ໜາວ. ສຳ​ລັບ​ພວກ​ນັກ​ໂທດ​ແມ່​ຍິງນັ້ນ​ມີ​ລາຍ​ງານ​ວ່າ ໄດ້​ຖືກ​ລວນ​ລາມ​ທາງ​ເພດ​ຢ່າງ​ຮຸນ​ແຮງ​ໂດຍ​ກຳ​ລັງ​ຮັກ​ສາ​ຄວາມ​ປອດ​ໄພ” ນັ້ນ​ຄື​ຄຳ​ເວົ້າ​ຂອງ​ລັດ​ຖະ​ມົນ​ຕີ​ຊ່ວຍ​ວ່າ​ການ​ກະ​ຊວງ​ການ​ຕ່າງ​ປະ​ເທດ​ນິ​ໂຄ​ລ​ສ໌.

“ສະ​ຫະ​ລັດ ຊຶ່ງ​ໄດ້​ມີ​ການ​ຮ່ວມ​ສົມ​ທົບ​ໂດຍ​ບັນ​ດາ​ປະ​ເທດ​ພາ​ຄີ ແລະ​ພັນ​ທະ​ມິດ​ຈາກ​ທົ່ວ​ໂລກ ຍັງ​ສືບ​ຕໍ່​ກົດ​ດັນ​ໃຫ້​ມີ​ການ​ປ່ອຍ​ໂຕ​ພວກ​ທີ່​ຖືກ​ຄຸມ​ຂັງ​ແບບ​ບໍ່​ເປັນ​ທຳ​ທັງ​ໝົດ​ຍ້ອນ​ເຫດ​ຜົນ​ທາ​ດ້ານ​ການ​ເມືອງ… ແລະ​ເງື່ອນ​ໄຂ​ສຳ​ລັບ​ການ​ເລືອກ​ຕັ້ງ​ທີ່​ເສ​ລີ​ແລະ​ມີ​ຄວາມ​ຍຸ​ຕິທຳ ເພື່ອ​ອຳ​ນວຍ​ໃຫ້​ປະ​ຊາ​ຊົນ​ຊາວ​ເວ​ເນ​ຊູ​ເອ​ລາ ຄິວ​ບາ​ ແລະ​ນີ​ກາ​ຣາ​ກົວ ເລືອກ​ເອົາ​ຜູ້​ນຳ​ຂອງ​ພວກ​ເຂົາ​ເຈົ້າ ດ້ວຍ​ຕົວ​ຂອງ​ເຂົາ​ເຈົ້າ​ເອງ” ນັ້ນ​ແມ່ນ​ຄຳ​ເວົ້າ​ຂອ​ງ​ລັດ​ຖະ​ມົນ​ຕີ​ຊ່ວຍ​ວ່າ​ການ​ກະ​ຊວງ​ການ​ຕ່າງ​ປະ​ເທດ​ນິ​ໂຄ​ລ​ສ໌.

“ພວກ​ເຮົາ​ຍັງ​ສືບ​ຕໍ່​ເປັນ​ພາ​ຄີ​ທີ່​ໝັ້ນ​ຄົງ ສຳ​ລັບ​ປະ​ຊາ​ຊົນ​ ຊາວ​ເວ​ເນ​ຊູ​ເອ​ລາ ຄິ​ວ​ບາ​ແລະ​ນິ​ກາ​ຣາ​ກົວ ໃນ​ຂະ​ນະ​ທີ່​ພວກ​ເຂົາ​ເຈົ້າ​ຊອກ​ຫາ​ຊ່ອງ​ທາງ​ເພື່ອ​ຈະ​ສ້າງ​ສາ​ພັດ​ທະ​ນາ​ປະ​ເທດ​ຊາດ​ຂອງ​ພວກ​ເຂົາ​ເຈົ້າ​ ມີ​ອະ​ນາ​ຄົດ ​ທີ່​ດີກວ່າ​ເກົ່າ ນຶ່ງ​ໃນ​ນັ້ນ ​ກໍແມ່ນໃຫ້ພວກ​ຜູ້​ນຳ​ຂອງ​ພວກ​ເຂົາ​ເຈົ້າເຄົາ​ລົບ​ນັບ​ຖື​ສິດ​ທິ​ມະ​ນຸດ​ແລະ​ອິດ​ສະ​ຫຼະຂອງ​ປະ​ຊາ​ຊົນ​ທຸກໆ​ຄົນ.”

ສະ​ຫະ​ລັດ​ຈະ​ສືບ​ຕໍ່​ໃຊ້ເຄື່ອງມື​ທາງ​ດ້ານການ​ທູດ​ແລະ​ເສດ​ຖະ​ກິດ ທີ່​ພວກ​ເຮົາ​ມີ​ຢູ່ ເພື່ອ​ໃຫ້​ການ​ສະ​ໜັບ​ສະ​ໜຸນ​ຕໍ່​ປະ​ຊາ​ຊົນ​ຊາວ​ຄິ​ວາ ນິ​ກາ​ຣາ​ກົວ ແລະ​ເວ​ເນ​ຊູ​ເອ​ລາ ໃນ​ການ​ຊອກ​ສະ​ແຫວງ​ຫາ​ຂອງ​ພວກ​ເຂົາ​ເຈົ້າ​ເພື່ອ​ໃຫ້​ໄດ້​ຮັບ​ສິດ​ເສ​ລີ​ພາບຫຼາຍ​ຂຶ້ນ ໃຫ້ລັດ​ຖະ​ບານ​ມີ​ຄວາມ​ຮັບ​ຜິດ​ຊອບ ແລະ​ມີ​ປະ​ຊາ​ທິ​ປະ​ໄຕ.

XS
SM
MD
LG