ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເພື່ອເປັນການຕອບໂຕ້ຕໍ່ “ການເສຍຊີວິດທີ່ໜ້າເສົ້າສະຫຼົດໃຈແລະໂຫດຮ້າຍ” ຂອງຍິງສາວຊາວອີຣ່ານ ນາງມາຊາ ອາມີນີ ຕະຫຼອດທັງການກົດຂີ່ທີ່ໃຊ້ຄວາມຮຸນແຮງຕໍ່ການປະທ້ວງແບບສັນຕິນັ້ນ ລັດຖະມົນຕີກະຊວງການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ປະກາດການລົງໂທດຕໍ່ອັນທີ່ເອີ້ນວ່າ ຕຳຫຼວດສິນທຳ ແລະເຈົ້າໜ້າທີ່ຮັກສາຄວາມສະຫງົບອະວຸໂສຂອງອີຣ່ານ.
ນາງມາຊາ ອາມີນີ ອາຍຸ 22 ປີ ໄດ້ຖືກຈັບທີ່ນະຄອນເຕຫະຣ່ານ ຍ້ອນຖືກກ່າວຫາວ່າ ໃສ່ຜ້າປົກຫົວທີ່ບໍ່ເໝາະສົມຄືບໍ່ແໜ້ນເທົ່າທີ່ຄວນ. ນາງໄດ້ເສຍຊີວິດໃນລະຫວ່າງທີ່ຢູ່ພາຍໃຕ້ການຄວບຄຸມຂອງອັນທີ່ເອີ້ນວ່າ ຕຳຫຼວດສິນທຳ ຂອງອີຣ່ານ.
ການລາດຕະເວນຂອງຕຳຫຼວດສິນທຳໃນອີຣ່ານໄດ້ເພີ້ມທະວີຂຶ້ນໃນລະດູຮ້ອນປີນີ້. ປະທານາທິບໍດີອີບຣາຮິມ ຣາຍຊີ ໄດ້ຮຽກຮ້ອງໃຫ້ມີການຈັດຕັ້ງປະຕິບັດກົດໝາຍຊຶ່ງໄດ້ມີການນຳໃຊ້ຫຼັງຈາກການປະຕິວັດໃນປີ 1979 ຢ່າງເຂັ້ມງວດ ຂຶ້ນກວ່າເກົ່າ ທີ່ໄດ້ບັງຄັບໃຫ້ພວກແມ່ຍິງ ປົກຜົມເຂົາເຈົ້າ ແລະນຸ່ງຊຸດຍາວທີ່ຫຼວມໆ.
ການປະທ້ວງໃນທົ່ວປະເທດອີຣ່ານໄດ້ລະເບີດຂຶ້ນ ຫຼັງຈາກການເສຍຊີວິດຂອງນາງອາມີນີ. ພວກເຂົາເຈົ້າໄດ້ຖືກຮັບມື ໂດຍກຳລັງ ຂອງພວກເຈົ້າໜ້າທີ່. ການປາບປາມຂອງລັດຖະບານອີຣ່ານທີ່ພວມກຳລັງດຳເນີນຢູ່ ຊຶ່ງພວກເຈົ້າໜ້າທີ່ລາຍງານວ່າ ມີພວກປະທ້ວງຫຼາຍສິບຄົນຖືກຂ້າຕາຍ ແລະໃນອາທິດແລ້ວນີ້ ລັດຖະບານອີຣ່ານໄດ້ຕັດການໃຊ້ອິນເຕີແນັດສຳລັບປະຊາຊົນສ່ວນໃຫຍ່ 80 ລ້ານຄົນ ເພື່ອປ້ອງກັນບໍ່ໃຫ້ພວກເຂົາເຈົ້າ ແລະປະຊາຊົນຢູ່ໃນທົ່ວໂລກໄດ້ເບິ່ງການປາບປາມຢ່າງຮຸນແຮງທີ່ພວກດຳເນີນຢູ່ຕໍ່ພວກປະທ້ວງດ້ວຍຄວາມສະຫງົບ.
ໃນຖະແຫຼງການຕ່າງຫາກອີກສະບັບນຶ່ງນັ້ນ ກະຊວງການເງິນຂອງສະຫະລັດກໍກ່າວວ່າ ພວກເຈົ້າໜ້າທີ່ ທີ່ຖືກລະບຸໂດຍຫ້ອງການຄວບຄຸມຊັບສິນຕ່າງປະເທດ “ກຳກັບນຳການຈັດຕັ້ງ ຊຶ່ງຕາມປົກກະຕິແລ້ວນຳໃຊ້ການປາບປາມແບບຮຸນແຮງຕໍ່ພວກປະທ້ວງດ້ວຍຄວາມສະຫງົບ ສະມາຊິກກຸ່ມສັງຄົມພົນລະເຮືອນອີຣ່ານ ຕໍ່ພວກຄັດຄ້ານລັດຖະບານ ພວກນັກເຄື່ອນໄຫວເພື່ອສິດທິຂອງພວກແມ່ຍິງແລະສະມາຊິກຂອງປະຊາຄົມບາຮາຍ.
ເຈົ້າໜ້າທີ 7 ຄົນທີ່ຖືກລະບຸໂຕແມ່ນຮວມທັງລັດຖະມົນຕີກະຊວງສືບລັບ ແລະຄວາມໝັ້ນຄົງຂອງອີຣ່ານ ຜູ້ບັນຊາການຕຳຫຼວດສິນທຳຂອງອີຣ່ານ ແລະຜູ້ບັນຊາການຕຳ ຫຼວດສິນທຳ ໃນເຂດນະຄອນຫຼວງເຕຫະຣ່ານ. ການລົງໂທດນີ້ຍັງໄດ້ແນເປົ້າໝາຍໃສ່ຮອງຜູ້ບັນຊາການບາຊິສ, ຮອງຜູ້ບັນຊາການ ກອງກຳລັງປະຕິບັດກົດໝາຍຂອງ ອີຣ່ານຫຼື LEF, ຜູ້ບັນຊາກນກຳລັງ LEF ໃນແຂວງຈາຮາມາຮາລ ແຂວງບັກຕີອາຣີ ແລະຜູ້ບັນຊາການກຳລັງພາກພື້ນດິນ ຂອງອີຣ່ານ.
ພວກຜູ້ຊາຍເຫຼົ່ານີ້ ແມ່ນພົວພັນໃນການລະເມີດສິດທິມະນຸດຢ່າງຮ້າຍແຮງຮວມທັງກໍ່ຄວາມຮຸນແຮງຕໍ່ພວກທີ່ຖືກຈັບກຸມຄຸມຂັງ ແລະການໃຊ້ກຳລັງຢ່າງຮຸນແຮງຕໍ່ພວກປະທ້ວງ.
ລັດຖະມົນຕີກະຊວງການເງິນ ທ່ານນາງຈາແນັດ ແຢລເລັນ ເອີ້ນການເສຍຊີວິດຂອງ ນາງມາຊີ ອາມີນີວ່າ ເປັນ “ການກໍ່ຄວາມໂຫດຮ້າຍປ່າເຖື່ອນ ອີກບົດນຶ່ງໂດຍກຳລັງຮັກສາຄວາມສະຫງົບຂອງອຳນາດການປົກຄອງອີຣ່ານຕໍ່ປະຊາຊົນຂອງຕົນ.” ທ່ານນາງກ່າວຕື່ມວ່າ “ພວກເຮົາຂໍປະນາມ ຕໍ່ການກະທຳ ແບບບໍ່ມີສາມັກສຳນຶກ ໂດຍການໃຊ້ຄຳເວົ້າທີ່ແຮງສຸດ ແລະຮຽກຮ້ອງໃຫ້ລັດຖະບານອີຣ່ານຍຸຕິການກໍ່ຄວາມຮຸນແຮງຕໍ່ພວກແມ່ຍິງ ແລະການປາບປາມຢ່າງແຮງທີ່ຍັງດຳເນີນຢູ່ໃນການສະແດງອອກຊຶ່ງສິດເສລີພາບໃນການປາກເວົ້າແລະການໂຮມຊຸມນຸມກັນ.”
ລັດຖະມົນຕີແຢລເລັນ ປະກາດວ່າ “ການເອົາບາດກ້າວໃນມື້ນີ້ ແມ່ນໄດ້ສະແດງໃຫ້ເຫັນເຖິງຄວາມໝາຍໝັ້ນຕັ້ງໃຈຢ່າງຈະແຈ້ງຂອງລັດຖະບານທ່ານໄບເດັນແລະທ່ານນາງແຮຣິສ ທີ່ຈະລຸກຂຶ້ນ ປົກປ້ອງສິດທິມະນຸດ ແລະສິດທິຂອງພວກແມ່ຍິງ ຢູ່ໃນປະເທດອີຣ່ານ ແລະໃນທົ່ວໂລກ.”