ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໃນຕົ້ນເດືອນພະຈິກນີ້ ເກົາຫຼີເໜືອ ຊຶ່ງຮູ້ກັນໃນຊື່ທີ່ເປັນທາງການວ່າ ສາທາລະນະລັດ ປະຊາທິປະໄຕ ປະຊາຊົນເກົາຫຼີ ຫຼື ສປປ ເກົາຫຼີນັ້ນ ໄດ້ຍິງລູກສອນໄຟຈຳນວນນຶ່ງ ຮວມທັງລູກສອນໄຟທີ່ຍິງຈາກພື້ນດິນສູ່ອາກາດ ທີ່ຕົກລົງ 57 ກິໂລແມັດ ຫ່າງຈາກເກົາຫຼີໃຕ້ ຫຼືໃນຊື່ທີ່ເປັນທາງການວ່າ ສາທາລະນະລັດເກົາຫຼີ. ລູກສອນໄຟອີກຊະນິດນຶ່ງທີ່ຍິງໃນຕົ້ນເດືອນພະຈິກນີ້ ແມ່ນລູກສອນໄຟຂີປະນາວຸດຂ້າມທະວີບ ທີ່ ສປປ ເກົາຫຼີກ່າວອ້າງວ່າ ມີຄວາມສາມາດບັນທຸກຫົວລະເບີດນິວເຄລຍໄດ້. ພຽງຢາງປະກາດວ່າ ການຍິງລູກສອນໄຟເຫຼົ່ານີ້ ແມ່ນເປັນການຝຶກຊ້ອມການໂຈມຕີ “ແບບໄຮ້ຄວາມປານີ” ຕໍ່ເປົ້າໝາຍຂອງສາທາລະນະລັດເກົາຫຼີ ແລະຂອງສະຫະລັດ.
ໃນການຖະແຫຼງ ຕໍ່ກອງປະຊຸມສະພາຄວາມໝັ້ນຄົງອົງການສະຫະປະຊາຊາດ ກ່ຽວກັບການຍິງລູກສອນໄຟຂອງ ສປປ ເກົາຫຼີນັ້ນ ເອກອັກຄະລັດຖະທູດສະຫະລັດ ປະຈຳອົງການສະຫະປະຊາຊາດ ທ່ານນາງ ລິນດາ ໂທມັສ ກຣີນຟິລ ໄດ້ປະນາມ “ດ້ວຍຄຳເວົ້າ ທີ່ແຮງທີ່ສຸດເທົ່າທີ່ເປັນໄປໄດ້ ກ່ຽວກັບການຍິງລູກສອນໄຟທັງໝົດເມື່ອໄວໆມານີ້ຂອງ ສປປ ເກົາຫຼີ ເລີ້ມມາແຕ່ວັນທີ 27 ຕຸລາ.” ທ່ານນາງໃຫ້ຂໍ້ສັງເກດວ່າ ການຍິງທົດລອງເທື່ອຫຼ້າສຸດລູກສອນໄຟຂີປະນາວຸດຂ້າມທະວີບ ແມ່ນ “ກໍ່ໃຫ້ເກີດຄວາມກັງວົນເປັນພິເສດ.” ເອກອັກຄະລັດຖະທູດໂທມັສ ກຣີນຟິລ ປະກາດວ່າ ການເອົາທ່າທີແບບຮຸກຮານ ຂອງ ສປປ ເກົາຫຼີ “ແມ່ນຮ້າຍແຮງໄປກວ່າ ການສ້າງຄວາມກ້າວໜ້າໃຫ້ແກ່ຄວາມສາມາດທາງທະຫານແບບຜິດກົດໝາຍ ຂອງ ສປປ ເກົາຫຼີ ແລະບ່ອນທຳລາຍ ຕໍ່ການຫ້າມແຜ່ຜາຍອາວຸດຂອງໂລກ. ນີ້ຍັງແມ່ນຄວາມພະຍາຍາມຂອງ ສປປ ເກົາຫຼີທີ່ຕັ້ງໃຈ ກໍ່ໃຫ້ເກີດຄວາມເຄັ່ງຕຶງ ແລະສ້າງຄວາມຢ້ານກົວ ໃຫ້ແກ່ປະເທດເພື່ອນບ້ານ.”
ເພື່ອເປັນການຕອບໂຕ້ ຕໍ່ການປະພຶດແບບຮຸກຮານຂອງ ສປປ ເກົາຫຼີ ໃນຮອບຫຼາຍເດືອນທີ່ຜ່ານມານີ້ ສະຫະລັດແລະສາທາລະນະລັດເກົາຫຼີໄດ້ເພີ້ມການຮ່ວມມືແບບລົງເລິກ ເພື່ອເສີມຂະຫຍາຍການຮັກສາຄວາມປອດໄພຮ່ວມກັນຂອງປະເທດທັງສອງ. ໃນເດືອນກໍລະກົດ ສະຫະລັດໄດ້ສົ່ງເຮືອບິນລົບຮຸ້ນທີ 5 ໄປຍັງສາທາລະນະລັດເກົາຫຼີ ແລະໃນເດືອນຕຸລາກຸ່ມໂຈມຕີນຳໂດຍກຳປັ່ນບັນທຸກເຮືອຣໍໂນລ ຣິແກນ ກໍໄດ້ຖືກສົ່ງໄປຍັງທະເລຍີ່ປຸ່ນ ຫຼັງຈາກພຽງຢາງໄດ້ຍິງລູກສອນໄຟຂີປະນາວຸດໄລຍະໄກຂ້າມປະເທດຍີ່ປຸ່ນ.
ນຶ່ງມື້ຫຼັງຈາກ ສປປ ເກົາຫຼີໄດ້ຍິງລູກສອນໄຟຈຳນວນນຶ່ງໃນຕົ້ນເດືອນພະຈິກນີ້ ລັດຖະມົນຕີກະຊວງປ້ອງກັນປະເທດສະຫະລັດ ທ່ານລອຍ ອອສຕິນ ແລະລັດຖະມົນຕີກະຊວງປ້ອງກັນປະເທດສາທາລະນະລັດເກົາຫຼີ ທ່ານລີ ຈອງ ຊັບ ກໍໄດ້ພົບປະກັນທີ່ທຳນຽບຫ້າແຈຕາມໝາຍກຳນົດກອງປະຊຸມປຶກສາຫາລືດ້ານຄວາມໝັ້ນຄົງຄັ້ງທີ 54 ລະຫວ່າງສະຫະລັດ ແລະສາທາລະນະລັດເກົາຫຼີ.
ຄວາມໝັ້ນໝາຍ ຂອງສະຫະລັດ ທີ່ຈະປົກປ້ອງ ສາທາລະນະລັດເກົາຫຼີ ແມ່ນ “ໝັ້ນຄົງບໍ່ມີມື້ປ່ຽນແປງ” ນັ້ນຄືຄຳເວົ້າຂອງລັດຖະມົນຕີກະຊວງປ້ອງກັນປະເທດ ທ່ານລອຍ ອອສຕິນ ລຸນຫຼັງການພົບປະກັນ. “ກ່ຽວກັບແຫຼມເກົາຫຼີນັ້ນ” ທ່ານໃຫ້ຂໍ້ສັງເກດວ່າ “ພວກເຮົາຈະກັບຄືນໄປຫາການຊ້ອມລົບຂະໜາດໃຫຍ່ ເພື່ອເສີມຄວາມເຂັ້ມແຂງໃຫ້ແກ່ຄວາມພ້ອມຂອງກຳລັງປະສົມ ແລະຄວາມສາມາດ ໃນການສູ້ລົບຄືນນີ້ ຖ້າຫາກມີຄວາມຈຳເປັນ. ພວກເຮົາມີຄວາມໝັ້ນໝາຍທີ່ຈະເສີມສ້າງຄວາມພະຍາຍາມເຫຼົ່ານີ້ ເພື່ອເສີມຄວາມເຂັ້ມແຂງໃຫ້ແກ່ການສະກັດກັ້ນຮ່ວມກັນ ແລະຄ້ຳປະກັນວ່າ ການເປັນພັນທະມິດ ຍັງຈະດຳເນີນຕໍ່ໄປເພື່ອເສີມຄວາມເຂັ້ມແຂງໃນດ້ານຄວາມໝັ້ນຄົງແລະສະຖຽນລະພາບໃນແຫຼມເກົາຫຼີ ແລະທົ່ວຂົງເຂດອິນໂດ-ປາຊີຟິກ.
ລັດຖະມົນຕີກະຊວງປ້ອງກັນປະເທດອອສຕິນປະກາດວ່າ “ພວກເຮົາຈະປະເຊີນໜ້າກັບບັນຫາທ້າທາຍໃນອະນາຄົດ ໃນວິທີດຽວກັນກັບທີ່ພວກເຮົາເຄີຍເຮັດໃນໄລຍະເກືອບ 70 ປີຜ່ານມາ ໂດຍການຢືນຄຽງບ່າຄຽງໄຫຼ່ ໃນຖານະທີ່ເປັນພັນທະມິດກັນ.”