តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកមាន«ការព្រួយបារម្ភនិងខកចិត្តយ៉ាងខ្លាំង» ចំពោះករណីដែលតុលាការនៅក្នុងប្រទេសតួកគីបានកាត់ទោសអភិបាលក្រុង Istanbul លោក Ekrem Imamoglu ឱ្យជាប់ពន្ធនាគារ ២ ឆ្នាំ ៧ ខែ។ ប្រសិនបើសាលក្រមនេះត្រូវបានតម្កល់បន្ទាប់ពីមានការប្ដឹងឧទ្ធរណ៍ ការកាត់ទោសនេះក៏នឹងហាមឃាត់ផងដែរមិនឱ្យលោក Imamoglu កាន់តំណែង ឬក៏ឈរឈ្មោះសម្រាប់តំណែងនយោបាយណាមួយ។
អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានបញ្ជាក់នៅក្នុងសេចក្ដីថ្លែងការណ៍មួយថា៖ «ការផ្ដន្ទាទោសលើលោក [Imamoglu] គឺមិនស្របទៅនឹងការគោរពសិទ្ធិមនុស្ស សេរីភាពជាមូលដ្ឋាន និងនីតិរដ្ឋទេ»។
ប្រទេសបារាំង អាល្លឺម៉ង់ សភាអឺរ៉ុប និងអង្គការសិទ្ធិមនុស្សមួយចំនួនក៏បានថ្កោលទោសផងដែរចំពោះការផ្តន្ទាទោសលោក Imamoglu នេះ។
លោក Imamoglu មិនត្រឹមតែជាអភិបាលក្រុង Istanbul និងជាសមាជិកដ៏លេចធ្លោម្នាក់របស់គណបក្ស Republican People's Party ដែលជាគណបក្សនយោបាយប្រឆាំងនៅក្នុងប្រទេសតួកគីប៉ុណ្ណោះទេ ប៉ុន្តែថែមទាំងអាចជាបេក្ខជនប្រធានាធិបតីនៅក្នុងការបោះឆ្នោតឆ្នាំ ២០២៣ នៅក្នុងប្រទេសតួកគីផងដែរ។
ឧក្រិដ្ឋកម្មដែលគេចោទលោក Imamoglu នោះគឺការប្រមាថមន្ត្រីសាធារណៈនៅក្នុងសុន្ទរកថារបស់លោកដែលបានថ្លែងកាលពីឆ្នាំ ២០១៩។
អ្នកនាំពាក្យក្រសួងការបទេសសហរដ្ឋអាមេរិកលោក Ned Price បាននិយាយថា សហរដ្ឋអាមេរិកនៅតែមាន «ក្ដីបារម្ភខ្លាំងក្លាអំពីការយាយីតាមផ្លូវតុលាការជាបន្តលើសង្គមស៊ីវិល ប្រព័ន្ធផ្សព្វផ្សាយ មេដឹកនាំនយោបាយ និងមេដឹកនាំអាជីវកម្មនានានៅក្នុងប្រទេសតួកគី ដែលក្នុងនោះរួមមានទាំងតាមរយៈការឃុំឃាំងមុនការកាត់ទោស ការចោទប្រកាន់ទូលំទូលាយជ្រុលហួសហេតុថាមានការគាំទ្រអំពើភេរវកម្ម និងករណីប្រមាថបែបព្រហ្មទណ្ឌផងដែរ»។
នៅក្នុងរបាយការណ៍សិទ្ធិមនុស្សកាលពីពេលថ្មីៗនេះបំផុតរបស់ខ្លួនអំពីប្រទេសតួកគី ក្រសួងការបរទេសសហរដ្ឋអាមេរិកបានកត់សម្គាល់ថា៖ «អង្គតុលាការ [របស់ប្រទេសតួកគី] បានប្រឈមនឹងបញ្ហាមួយចំនួនដែលដាក់កំហិតដល់ឯករាជ្យភាពរបស់តុលាការ ដែលក្នុងនោះរួមមានទាំង...ការចោទប្រកាន់ថាមានការជ្រៀតជ្រែកពីអង្គនីតិប្រតិបត្តិផងដែរ»។
របាយការណ៍របស់ក្រសួងការបរទេសសហរដ្ឋអាមេរិកនោះក៏បានបញ្ជាក់ផងដែរថា អ្នកតាមដានស្ថានការណ៍ «បានលើកឡើងអំពីក្ដីបារម្ភដែលថា លទ្ធផលនៃសវនាការមួយចំនួនហាក់ដូចជាត្រូវបានកំណត់ទុកជាមុន» និងថាមិនសូវមានការគោរពនីតិវិធីនិងការប្រកាន់ខ្ជាប់តាមស្ដង់ដារភ័ស្តុតាងដែលគួរឱ្យជឿទុកចិត្តបាននោះទេ។
ក្នុងចំណោមការបំពានសិទ្ធិផ្សេងៗទៀត របាយការណ៍របស់ក្រសួងការបរទេសសហរដ្ឋអាមេរិកនេះក៏បានលើកឡើងផងដែរអំពី «ការចាប់ខ្លួនតាមទំនើងចិត្តនិងការឃុំឃាំងជាបន្តនូវមនុស្សរាប់ម៉ឺននាក់ ដែលក្នុងនោះរួមមានទាំងអ្នកនយោបាយប្រឆាំងនិងអតីតសមាជិកសភា មេធាវី អ្នកកាសែត [និង] សកម្មជនសិទ្ធិមនុស្សផងដែរ»។
លោក Price បានប្រកាសនៅក្នុងសេចក្ដីថ្លែងការណ៍របស់លោកថា៖ «ប្រជាពលរដ្ឋនៃប្រទេសតួកគីសក្ដិសមមានលទ្ធភាពនៅក្នុងការអនុវត្តសិទ្ធិនិងសេរីភាពជាមូលដ្ឋានរបស់ពួកគេដោយគ្មានការភ័យខ្លាចថាមានការសងសឹក។ សិទ្ធិនៅក្នុងការអនុវត្តសេរីភាពនៃការបញ្ចេញមតិ ការជួបជុំដោយសន្តិវិធី និងការបង្កើតសមាគមគឺមានចែងនៅក្នុងរដ្ឋធម្មនុញ្ញរបស់ប្រទេសតួកគី កាតព្វកិច្ចរបស់ប្រទេសតួកគីពាក់ព័ន្ធនឹងច្បាប់អន្តរជាតិ និងការតាំងចិត្តរបស់តួកគីចំពោះអង្គការសន្តិសុខនិងកិច្ចសហប្រតិបត្តិការអឺរ៉ុប (OSCE)»។
លោក Price បានបន្ថែមថា៖ «យើងជំរុញរដ្ឋាភិបាលតួកគីឱ្យបញ្ឈប់ការកាត់ទោសនៅក្រោមច្បាប់ ព្រហ្មទណ្ឌស្ដីពី «ការប្រមាថ» និងឱ្យគោរពសិទ្ធិនិងសេរីភាពរបស់ប្រជាពលរដ្ឋតួកគីទាំងអស់ ដែលក្នុងនោះរួមទាំងតាមរយៈការធានាឱ្យមានបរិយាកាសបើកចំហសម្រាប់ការជជែកដេញដោលជាសាធារណៈផងដែរ»៕