តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក បានបញ្ជាក់ជាថ្មីទៀតអំពីការគាំទ្ររបស់ខ្លួនដល់កោះតៃវ៉ាន់ក្នុងការប្រឈមនឹងសកម្មភាពគំរាមកំហែងពីយោធាចិន។
កាលពីថ្ងៃទី២៣ និងទី២៤ ខែមករា សាធារណរដ្ឋប្រជាមានិតចិនបានបញ្ជូនយន្តហោះចម្បាំងមួយចំនួនទៅកាន់តំបន់ការពារដែនអាកាសតៃវ៉ាន់។
លោក Ned Price អ្នកនាំពាក្យក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា៖ «សហរដ្ឋអាមេរិកកត់សម្គាល់ដោយព្រួយបារម្ភអំពីការប៉ុនប៉ងរបស់សាធារណរដ្ឋប្រជាមានិតចិនក្នុងការបំភិតបំភ័យអ្នកជិតខាងរបស់ខ្លួនដោយមានរួមបញ្ចូលទាំងកោះតៃវ៉ាន់ផងដែរ។ យើងអំពាវនាវដល់រដ្ឋាភិបាលក្រុងប៉េកាំងឱ្យបញ្ឈប់សម្ពាធខាងយោធា ការទូត និងខាងសេដ្ឋកិច្ចប្រឆាំងនឹងកោះតៃវ៉ាន់ ហើយងាកមកធ្វើការសន្ទនាប្រកបដោយអត្ថន័យជាមួយពួកអ្នកតំណាងជាប់ឆ្នោតដោយលទ្ធិប្រជាធិបតេយ្យរបស់កោះតៃវ៉ាន់វិញ។
សាធារណរដ្ឋប្រជាមានិតចិន បានបង្កើនការហោះហើរនៅជិតកោះតៃវ៉ាន់កាលពីឆ្នាំទៅមិញ តែមិនសូវមានយន្តហោះច្រើនបែបនេះ ឬមានកម្លាំងប្រយុទ្ធខ្លាំងបែបនេះទេ។ បើតាមក្រសួងការពារជាតិរបស់កោះតៃវ៉ាន់ កងយន្តហោះសាធារណរដ្ឋប្រជាមានិតចិនមានរួមបញ្ចូលទាំងយន្តហោះចម្បាំង និងយន្តហោះទម្លាក់គ្រាប់បែកដែលមានសមត្ថភាពអាចផ្ទុកអាវុធនុយក្លេអ៊ែរបានផងដែរ។
នៅក្នុងចំណាត់ការបង្ករឿងមួយទៀត កាលពីពេលថ្មីៗនេះសាធារណរដ្ឋប្រជាមានិតចិនបានអនុម័តច្បាប់មួយ ដែលបើកដៃឱ្យកងឆ្មាំឆ្នេរសមុទ្រខ្លួនបាញ់លើនាវាបរទេសនៅក្នុងដែនទឹកមានជម្លោះក្នុងសមុទ្រចិនខាងត្បូង។ ប្រទេសចិនបានអះអាងថាភាគច្រើននៃសមុទ្រចិនខាងត្បូងស្ថិតនៅក្រោមយុត្តាធិការរបស់ខ្លួន។ កាលពីថ្ងៃទី២៧ខែមករា រដ្ឋាភិបាលហ្វីលីពីនបានដាក់ពាក្យតវ៉ាខាងការទូតប្រឆាំងនឹងច្បាប់នេះ។
កាលពីថ្ងៃទី២៣ ខែមករា កងនាវាផ្ទុកយន្តហោះចម្បាំងដឹកនាំដោយនាវាឈ្មោះ USS Theodore Roosevelt បានបើកចូលទៅក្នុងសមុទ្រចិនខាងត្បូងដើម្បីធ្វើប្រតិបត្តិការជាធម្មតាសម្រាប់ឧបត្ថម្ភលើកកម្ពស់សេរីភាពនាវាចរណ៍សមុទ្រ។ លោកឧត្តមនាវី Doug Verissimo មេបញ្ជាការនៃកងនាវាប្រយុទ្ធដឹកមុខដោយនាវាផ្ទុកយន្តហោះចម្បាំងទី៩បាននិយាយថា៖ «ជាមួយការដឹកជញ្ជូនទំនិញពាណិជ្ជកម្មពីរភាគបីនៃពិភពលោកឆ្លងកាត់តំបន់សំខាន់នេះ វាជាការមានសារៈសំខាន់ណាស់ដែលយើងរក្សាវត្តមានរបស់យើងនិងបន្តឧបត្ថម្ភផ្ចុងផ្តើមរបៀបរៀបរយផ្អែកលើបទបញ្ញត្តិដែលអនុញ្ញាតឱ្យយើងទាំងអស់គ្នារុងរឿង»។
លោក Ned Price អ្នកនាំពាក្យនៃក្រសួងការបរទេសសហរដ្ឋអាមេរិកបានប្រកាសនៅក្នុងសេចក្តីថ្លែងការណ៍របស់លោកថា៖ «យើងនឹងឈរជាមួយពួកមិត្តនិងសម្ព័ន្ធមិត្តរបស់យើងដើម្បីជំរុញទៅមុខនូវវិបុលភាព សន្តិសុខនិងតម្លៃរួមគ្នារបស់យើងនៅក្នុងតំបន់ឥណ្ឌូប៉ាស៊ីហ្វិក ដែលនោះមានរួមបញ្ចូលទាំងការពង្រឹងចំណងទាក់ទងរបស់យើងជាមួយកោះតៃវ៉ាន់ ដែលប្រកាន់លទ្ធិប្រជាធិបតេយ្យផងដែរ។ សហរដ្ឋអាមេរិកនឹងបន្តគាំទ្រដល់ដំណោះស្រាយដោយសន្តិវិធីនៃបញ្ហាឆ្លងកាត់ច្រកសមុទ្រតៃវ៉ាន់ដោយទៀងទាត់ជាមួយការប្រាថ្នានិងផលប្រយោជន៍ល្អបំផុតរបស់ប្រជាជនតៃវ៉ាន់»។
លោក Ned Price បានថ្លែងថា៖ «សហរដ្ឋអាមេរិករក្សាការប្តេជ្ញារបស់ខ្លួនជាយូរយារមកហើយ ដូចដែលមានចែងនៅក្នុងសេចក្តីថ្លែងការណ៍បីច្បាប់ស្តីពីទំនាក់ទំនងជាមួយតៃវ៉ាន់និងការធានារ៉ាប់រង៦។ យើងនឹងបន្តជួយតៃវ៉ាន់ក្នុងការធ្វើឱ្យមានសមត្ថភាពគ្រប់គ្រាន់សម្រាប់ការពារខ្លួនឯង។ ការប្តេជ្ញារបស់យើងដល់កោះតៃវ៉ាន់រឹងមាំ ហើយចូលរួមក្នុងការរក្សាឱ្យមានសន្តិភាព និងស្ថិរភាពឆ្លងកាត់ច្រកសមុទ្រតៃវ៉ាន់និងនៅក្នុងតំបន់នោះផងដែរ»៕