Kounyea, yon editoryal ki prezante pozisyon Gouvènman Etazini an:
Nan kèk mwa ki pase yo, toupatou nan mond la, sitwayen òdinè te pran lari pou manifeste pasifikman kont politik kraze-zo gouvènman an; e anpil nan yo ap peye sa chè.
Lavèy Jounen Entènasyonal Dwa Moun nan, 10 Desanm, Prezidan Joe Biden te parèt klè devan je tout moun lè li t ap pale de kouraj manifestan sa yo ki sou menm emisfè ak Etazini.
“Yon lòt fwa ankò, mwen mande liberasyon dè santèn prizonye politik nan Kiba ki rete anba kòd apre manifestasyon 11 Jiyè 2021 an yo,” se sa li te di nan yon kominike. E li te kontinye pou di, “Fas ak yon rejim kraze-zo, manifestan sa yo te brave danje pou ekzèse libète fondamantal yo, pami yo dwa pou yo eksprime yo e rasanble pasifikman.”
Dè dizèn milye Kiben te pran lari nan jounen mwa Jiyè sa a nan gwo foul moun ke peyi an pa te janm wè anvan, kote yo t ap manifeste kont gouvènman an akoz mank medikaman, gaz ak manje, ak dè dizèn lane kote rejim nan te foule dwa yo anba pye. Anpil moun te chante “Libète” epi tou « Patri nou ak lavi! »
Rèl moun sa yo ak enkyetid yo te jwenn ak vyolans brital rejim nan e ak represyon. Tankou denye rapò Depatman Deta ameriken sou dwa moun nan Kiba te di, “Fòs sekirite yo te reponn ak gaz lakrimojèn, kout baton, ak arestasyon. » Dè milye moun te jwenn arestasyon yo, pami yo kèk gwo militan dwa moun, atis, ak lidè relijye.
Anpil nan moun ki te anba kòd yo te rapòte tretman mechan ak degradan nan prizon, » se sa Depatman Deta te moutre. « Gouvènman-an te fè jijman rapid pou kèk manifestan; te chache santans prizon byen long, kèk nan yo jiska 30 lane, nan dè santèn ka; e te kenbe lòt manifestan nan prizon pandan lontan anvan jijman. Kèk militan te chwazi pou ale ann ekzil, e gouvènman an te fòse kèk lòt fè sa. »
Jouk kounyea, gen dè santèn manifestan pasifik ki te jwenn arestasyon yo 11 Jiyè a ak nan kèk semèn apre, ki rete nan prizon. Depi manifestasyon yo, administrasyon Biden-Harris la enpoze sanksyon sou dè douzèn otorite kiben e sou fòs espeyal ki te konplis nan represyon sou manifestan ak lòt moun ki pa dakò ak rejim nan.
« Etazini kanpe bò kote pèp Kiben an ki pran pozisyon pou defann dwa li e pou li gen dizon li nan avni Kiba, » se pawòl Prezidan Biden. « N ap kontinye plede pou liberasyon tout moun ki te pran prizon nan koukou-wouj brital la e n ap kontinye bay otorite kiben pote responsablite pou vyolans kont manifestan pasifik. »
Sete yon editoryal ki prezante pozisyon Gouvènman Etazini an.