Kounyea, yon editoryal ki reflete opinyon Gouvènman Etazini an:
Gouvènman Etazini an ap travay ak gouvènman yo nan Amerik Latin nan, sosyete sivil, ak òganizasyon entènasyonal yo pou abòde koz ki nan rasin migrasyon ilegal la e ankouraje yon fason imen, san danje epi nan lòd, pou jere migrasyon, dapre Vis Asistan Sekretè pou Amerik Santral ak Migrasyon, Eric Jacobstein.
Yon jan Etazini fè sa, se moutre jenerozite pou bezwen refijye, migran, ak lòt popilasyon ki frajil, antwòt nan sipòte kominote ki ap resevwa yo nan tout Amerik Latin nan ak Karayib la.
« Etazini fyè deske se li ki bay plis asistans imanitè pou Emisfè Wès la, » pou repete Vis Asistan Sekretè Jacobstein :
« Nan 2 lane ki pase yo, Etazini founi plis pase 2 milya 400 milyon dola asistans imanitè nan rejyon an e prèske 3 milya 700 milyon dola nan asistans pou devlopman, sekirite ekonomik, ak sante nan tout Emisfè Wès la. »
Yon 2èm mwayen pou jere kriz migrasyon an gen ladann kreyasyon plis mwayen legal pou moun antre Etazini, dapre eksplikasyon Vis Asistan Sekretè Jacobstein :
« Depi nou fin lanse nan mwa Jen an pwojè pou Deplasman San Danje a, plis pase 2.000 moun rive Etazini. Pwojè sa a fasilite travay vit sou ka refijye yo gras ak Pwogram Etazini pou Admèt Refijye a yo, e li bay pwogram pawòl imanitè a ak pwogram reyinifikasyon familyal yo enfòmasyon sou imigran yo ak moun ki ap resevwa yo, ak mwayen pou yo jwenn travay. Dè santèn aplikan anplis rive nan etap final sou ka yo e ap rive Etazini nan semenn ki ap vini yo. »
Pami lòt mwayen pou imigrasyon legal, nou pwolonje Pwogram Reyinifikasyon Familyal la pou plis peyi e nou ajoute dè dizèn milye nouvo viza travay H-2B, lòt pwogram toujou.
An menm tan, « Etazini kontinye fè respekte konsekans yo pou migran ki janbe fwontyè nou ilegalman, » se avètisman Vis Asistan Sekretè Jacobstein. Depi mwa Me 2023, Depatman Sekirite Enteryè retounen plis pase 380.000 moun.
« Konsa, li ekstrèmman enpòtan pou moun konprann ke malgre pawòl raketè ki ap fè trafik moun yo, reyalite a sèke migran ki janbe fwontyè Etazini ilegalman e ki pa gen yon rezon legal pou yo rete Etazini, otorite yo ap pimpe yo tounen rapid, e nou ap tounen plis moun nan peyi kote yo soti. »
Vis Asistan Sekretè Deta Jacobstein, « ekzòte moun ki fè lide lage kò yo nan migrasyon ilegal, pou yo chache enfòmasyon nan sous Gouvènman ameriken an olye yo anbake yo nan vwayaj migrasyon long ki koute yon pakèt lajan, ki danjere, nan direksyon nò a. »
Sete yon editoryal ki reflete opinyon Gouvènman Etazini an.
