Kounyea, yon editoryal ki reflete opinion Gouvènman Etazini an:
Nan diskou pou prezante dènye rapò Etazini sou libète relijyon entènasyonal, Sekretè Deta Antony Blinken fè konnen objektif rapò sa a se fè vanse vizyon Etazini pou yon avni “kote tout moun ka chwazi epi pratike lafwa yo:”
« Respekte libète relijyon, sa bay lòt dwa yo plis fòs, tankou dwa pou moun pale lib e libè, fè reyinyon pasifik, epi patisipe nan politik. Pwoteksyon pou dwa inivèsèl sa a bay moun plis pouvwa pou yo eksprime yo, reyalize tout sa yo ka pwodui, kontribye kòmsadwa nan kominote yo.”
E poutan jounen jodi a, libète relijyon rete anba menas pou dè milyon moun, dapre Sekretè Blinken :
« Sant Rechèch Pew te jwenn, sa pa gen lontan, ke restriksyon ke gouvènman yo mete sou relijyon te rive nan nivo ki pi wo nan mond la depi nan ane 2007. Jounen jodia, gouvènman toupatou nan mond la kontinye ap vize moun, fèmen lye adorasyon, fè kominote deplase palafòs, epi bouche moun nan prizon poutèt kwayans relijye yo. »
Li fè wè ke kèk peyi mete restriksyon sou kèk jan moun abiye pou respekte relijyon yo; gen lòt ki fè restriksyon yo obligatwa. Kèk gouvènman travèse limit fwontyè yo pou yo vize moun poutèt lafwa yo e poutèt yo defann libète relijyon :
« Nan chak relijyon, moun kontinye fè fas ak vyolans ki baze sou relijyon, ak diskriminasyon ki baze sou relijyon kit se bò kote gouvènman, kit se bò kote konpatriyòt yo. Yo ka paka ale lekòl, yo ka paka travay, yo sibi nwizans, pran baton, oubyen jwenn tretman ki pi grav toujou. »
Gen gwoup ekstremis vyolan tou ki vize moun dapre relijyon yo. Sekretè Deta Blinken lonje dwèt sou atak ki te fèt sou kèk legliz ak yon sinagòg nan rejyon Dagestan nan LaRisi kote ajan polis, sivil ak yon prèt te pèdi lavi yo. Li moutre ke depi “atak teworis terib Hamas sou Izrayèl 7 Oktòb pase ak konfli ke sa te deklannche nan Gaza, gen plis rayisman kont Izrayèl ak kont Islam toupatou nan mond la.”
Rasanble dokiman sou jan de abi sa yo, kanpe kont rayisman ak britalite, defann dwa chak moun pou yo gen libète relijyon, sa yo se eleman santral nan politik etranjè Etazini. “Bout pou bout,” dapre Sekretè Blinken, “travay sa a se pou pwoteje yon pati esansyèl nan sa ki fè yon moun: kapasite pou chache bagay ki pi enpòtan pase pwòp lavi nou. … Dwa pou nou chwazi sa nou kwè tou ki pèmèt nou aprann nan men moun ki diferan ak nou epi selebre tou sa nou gen an komen. »
Sekretè Deta Blinken ki t ap site pawòl chèchè relijye Houston Smith, deklare, “ ‘Si nou pran sa ki pi bon nan relijyon ki la depi lontan yo nan mond lan, nou dekouvri nan yo sajès rafine ki genyen nan moun.’ »
Sete yon editoryal ki reflete opinion Gouvènman Etazini an.