Kounyea, yon editoryal ki reflete opinyon Gouvènman Etazini an:
Avans ki fèt nan domèn dijital la yo se yon kokenn elan pou pèp yo ak sosyete yo tout kote, e se an menm tan youn nan pi gwo defi pou sekirite nan tan nou an. Dapre yon deklarasyon ke plis pase 60 manm l-ONU ansanm ak Inyon Ewòp la pibliye ansanm, “izaj mechan ki fèt nan espas entènèt la poze yon gwo defi nan mond la jounen jodi a kote tout peyi konekte antre yo, nan moman eta yo depann anpil de enfrastrikti dijital pou kominikasyon, komès, ak gouvènans.”
“Se sekirite sou entènèt la ki pèmèt sistèm ki pi senp nou yo fonksyone: ekonomi nou yo ak enstitisyon demokratik nou yo,” se pawòl Linda Thomas-Greenfield, ki se Reprezantan Pèmanan Etazini nan l-ONU. “E poutan, gen twòp aktè ki se leta, ak lòt aktè ki pa leta, ki pran yon wout ki ale nan sans kontrè.”
“Toupatou nan mond la, yo eksplwate koneksyon dijital pou yo kase ponyèt viktim pou fè pwofi, vòlè lajan ak lide lakay gouvènman ak gwoup prive, yo vize jounalis ak sitwayen ki ap defann dwa moun, pran pozisyon davans pou konfli ki ap vini, e yo menase enfrastrikti ki pi enpòtan nou yo, antwòt isit la nan Nasyon Zini.”
“Kad travay pou Konpòtman yon Leta Serye nan Espas Entènèt la – ke nou te apwouve plizyè fwa e ki gen konsantman manm yo – moutre klè le lalwa entènasyonal sèvi pou entènèt la e ke nou atann ke leta yo kenbe tout pratik volontè nòmal pou konpòtman leta nan tan lapè,” se Anbasadè Thomas-Greenfield ki pale konsa. “E poutan, kèk nan yo ki andose kad travay sa a, sa pa anpeche ke yo chwazi pou iyore bon pratik sa yo, oubyen, sa ki pi mal toujou, yo ankadre move aktè.”
“Nan tou sa, gen operasyon mechan DPRK [ki se Kore di Nò] nan espas entènèt la, ki sèvi pou finanse zam li ki ka detwi moun pa bann e pa pakèt, ak pwogram misil balistik li yo.
“E gen nan sa tou aktivite LaRisi sou entènèt nan Ikrèn, ann Almay, nan Tcheki, Lityani, Polòy, Slovaki, ak Swèd – kote, pami lòt aktivite, Prensipal Depatman Ransèyman pou Estaf Jeneral LaRisi a vize pati politik yo ak enstitisyon demokratik yo.
“Non sèlman sa, gouvènman ris la sèvi kòm refij pou aktè ki ap mande ranson sou entènèt la – ki, depi kèk ane, lakoz plizyè milya dola pèdi epi gwo dega fèt nan lopital ak lòt enfrastrikti ki enpòtan anpil.”
Nou mande tout leta pou yo jwe patisyon pa yo nan fè aplike Kad Travay la e pouse lapè ak estabilite nan espas entènèt la, » se pawòl Anbasadè Thomas-Greenfield.
« Kit Konsèy sa ap konsidere jan operasyon lapè ka ankouraje bon jan netwayaj pou limite risk piratri, kit li fè konprann pi byen jan sekirite sou entènèt ka redui zak piratri sou entènèt la, li dwe kontinye sèvi ak sekirite sou entènèt kòm linèt pou wè defi yo.
« Ann di byen e di di ankò ke li posib pou aplike lwa entènasyonal sou konpòtman ant leta yo, » se Anbasadè Thomas-Greenfield ki pale konsa. « An nou akouraje peyi yo respekte konpòtman ke leta serye pratike nan tan lapè e ede redui risk pou gen konfli akoz ensidan sou entènèt. E an nou respekte lòd entènasyonal ki baze sou regleman e asire ke mond dijital la reflete sou mond fizik la pou amelyore li. »
Sete yon editoryal ki reflete opinyon Gouvènman Etazini an.
