Kounyea, yon editoryal ki reflete opinyon Gouvènman Etazini an:
Nan yon efò pou mete fen nan zak bandi ak vyolans terib ke gang ap simaye ann Ayiti, e sou demann gouvènman ayisyen an, Nasyon Zini te apwouve yon misyon polis pou yon lane nan peyi a.
Plan an se deplòtonnen 2.500 ajan polis ki soti nan divès peyi, ki gen Kenya nan tèt yo. Premye kontenjan an ki gen 400 ajan polis Kenya te debake nan Potoprens nan finisman mwa Jen. Misyon pa yo se redui zak bandi epi ede gouvènman ayisyen an retabli otorite li sou peyi a.
Jounen jodi a, 23 gang kontwole apeprè 80 pousan nan Potoprens. Depi mwa Fevriye, yo ap atake enfrastrikti gouvènman an. Kòm rezilta vyolans la, yon afè 580.000 moun deplase kite kay yo.
« Misyon sipò miltinasyonal ke Kenya ap dirije a [Misyon Sipò Miltinasyonal pou Sekirite] se repons kominote entènasyonal la apre apèl pèp ayisyen an ki te mande sipò, » se pawòl Sekretè Deta Adjwen pou Nakotik Entènasyonal ak Fòs Lòd, Todd Robinson.
« Sityasyon soufrans ke vyolans gang yo mete ann Ayiti a se yon menas pou estabilite rejyon an e sa mande yon repons entènasyonal. Misyon Sipò pou Sekirite a (MSS) gen yon manda ki se sipòte Polis Nasyonal Ayisyen an nan efò li san rete pou retabli sekirite ak lòd demokratik. »
Gouvènman ameriken an ap founi plis pase 300 milyon dola asistans e jiska 60 milyon dola ekipman pou … misyon sa a, » se Asistan Sekretè Deta Robinson ki pale konsa.
« Nou livre machin blende, dronn, ekipman pou pwoteksyon pèsonèl, ak tout kalte atik pou PNH la. Sipò entènasyonal la ede ranfòse kapasite Polis Nasyonal Ayisyen an pou defann popilasyon an kont dènye vag atak vyolans brital gang yo, e nou espere plis sipò kominote entènasyonal la pou misyon an. »
Nan yon reyinyon lòt jou la a, Sekretè Deta Blinken ak Premye-minis ayisyen Garry Conille te diskite sou pwochen etap misyon an, ak sou nesesite pou tabli yon konsèy elektoral pwovizwa ki ouvè pou tout sektè e ke moun ka fè konfyans, se pawòl Asistan Sekretè Deta pou Afè Emisfè Wès la Brian Nichols.
« Kokenn pa ann avan sa a ki pwal bay pèp ayisyen an yon opòtinite pou li chwazi lidè li demokratikman pou premye fwa depi dèz ane. Sekretè a repete ke Etazini ak lòt patnè entènasyonal rete pare pou sipòte pèp ayisyen an pa sèlman ak sipò pou misyon Sipò Miltinasyonal pou Sekirite a ak Polis Nasyonal Ayisyen an, men tou ak gwo efò imanitè, ekonomik, ak efò devlopman pou sipòte pèp ayisyen an. »
Sipò Etazini pou pèp Ayiti a rete solid, » se Asistan Sekretè Nichols ki ap pale e ki kontinye pou di, « Nou kanpe ak kominote entènasyonal la nan sipòte efò istorik sa a e nou pwal kontinye fè tou sa nou kapab pou nou bay sipò. »
Sete yon editoryal ki reflete opinyon Gouvènman Etazini an.