Kounyea, yon editoryal ki reflete ideyal ak enstitisyon Etazini yo:
13 Jiyè, yon nèg ak zam te chache asasinen ansyen Prezidan ak kandida Repibliken pou Prezidan Donald Trump nan yon miting politik nan eta Pennsilvani.
Erezman, bal ke asasen an te tire sou li a te sèlman rafle zòrèy dwat li. Men yon lòt sitwayen Ameriken te pèdi lavi l, epi nèg ame a te blese grav plizyè lòt moun.
Nan yon diskou etan nan Biwo Oval la, Prezidan Joe Biden te ensiste pou di, « Nou pa ka – nou pa dwe desann nan wout sa a nan Etazini. »
« Pa janm gen plas nan Etazini pou jan de vyolans konsa. Pwen final. San eksepsyon. Nou paka pèmèt vyolans sa a tounen yon bagay nòmal. »
Prezidan Biden moutre ke « diskou politik nan peyi sa a vin chofe anpil. Li lè pou nou bese ton an. » Li di tou : E nou tout gen yon responsablite pou fè sa. »
Se vre ke « Fòk gen mezantant kan menm nan demokrasi Etazini an,” se Prezidan Biden ki ap pale, li di politik pa dwe tounen « ekzakteman yon chann batay.»
« Mwen kwè politik ta dwe yon lye pou deba pasifik, pou rapousib jistis, pou pran desizyon ki baze sou Deklarasyon Endepandans la ak Konstitisyon nou an. Nou kanpe pou yon Etazini ki pa fèt ak ekstremis e ak firè, men ki gen kontwòl ak jantiyès. »
Nan demokrasi ameriken an, « nou fè deba e nou len konn pa dakò ak lòt. Nou konpare e moutre diferans ant karaktè kandida yo, dosye yo, pwoblèm yo, pwogram yo ak vizyon yo pou Etazini,” se pawòl Prezidan Biden.
“Men nan Etazini, nou rezoud mezantant nou yo nan bwat bilten an … pa ak bal. Pouvwa pou chanje Etazini ta dwe toujou rete nan men pèp la, pa nan men moun ki vle komèt asasinay, » se Prezidan Biden ki pale konsa.
« Depi nan koumansman, fondatè nou yo te konprann pouvwa ki gen nan pasyon, e konsa yo te kreye yon demokrasi ki bay chans pou larezon ak ekilib pou yo triyonfe sou fòs ki san kontwòl, » se eksplikasyon Prezidan Biden.
« Se Etazini sa a nou dwe ye, yon demokrasi ameriken kote diskisyon fèt san malis, yon demokrasi ameriken kote moun respekte rèy lalwa, yon demokrasi ameriken kote kontwòl, diyite, [ak] onètte se pa sèlman bèl pawòl, men reyalite ki vivan e ki ap respire. »
Se moun ki te la anvan nou yo ki te kite sa pou nou, moun ki te bay lavi yo pou peyi sa a. Se nou menm ki fè tout sa. Se pitit nou ak pitit pitit nou ki fè li.
Sete yon editoryal ki reflete ideyal enstitisyon Etazini yo.
