Kounyea, yon editoryal ki reflete opinion Gouvènman Etazini an:
Venezyela òganize eleksyon prezidansyèl ki gen anpil twou nan manch 28 Jiyè pase. Lè Konsyèl Elektoral la fin konte 80 pousan bilten, prezidan ki nan pouvwa a, Nicolas Maduro, te gen plis pase 51 pousan vwa pou li, kote li kale kandida Platfòm Inite Demokratik la Edmundo Gonzalez Urrutia ki pran plis pase 44 pousan vwa, dapre yon kominike ki soti nan Konsèy Elektoral Nasyonal la (CNE).
Sekretè Deta Antony Blinken chante lwamj pèp Venezyela a pou patisipasyon li nan eleksyon an e li konplimante sitwayen yo pou “kouraj yo ak angajman yo vizavi demokrasi menm lè yo ap fè fas ak represyon ak kalamite.” Ak tou sa, li eksprime anpil rezèv sou rezilta vòt la :
« Nou gen gwo enkyetid ke rezilta ke yo anonse a ka pa reflete volonte pèp la oubyen vòt pèp venezyelyen an. Li enpòtan anpil pou yo konte chak bilten vòt kòmsadwa e san kache anyen, pou responsab eleksyon yo pataje enfòmasyon imedyatman ak opozisyon an e ak obsèvatè endepandan yo san reta, e pou otorite eleksyon yo pibliye tabilasyon vwa yo an detay. Kominote entènasyonal la ap swiv sityasyon an ak anpil atansyon e pwal reponn selon sa yo jwenn. »
Pawòl te koumanse pale sou iregilarite pandan menm responsab yo t ap konte bilten yo – tankou kèk temwen opozisyon di ke yo pa te jwenn otorizasyon antre nan katye jeneral kote Konsèy Elektoral Nasyonal la t ap konte bilten yo. Konsèy elektoral la tonbe anba anpil kritik kòmkwa li nan patipri.
Vrèman vre, Depatman Deta te pale de enkyetid li ane pase sou sa, li di, ki sete « efò ki t ap kontinye pou refè konpozisyon » konsèy la, pandan palman ewopeyen an te adopte yon rezolisyon nan mwa Fevriye a ki akize rejim Maduro a kòmkwa l ap fè chanjman nan Konsèy Elektoral Nasyonal la, chanjman ki, li di, « te vize jennen dewoulman eleksyon an ak siprime tout posiblite pou peyi a retounen nan demokrasi. »
Efò Maduro pou li manipile eleksyon an te tanmen byen anvan biwo vòt yo te ouvè Dimanch la. Dapre yon rapò Laboratorio de Paz, Laboratwa Lapè, pou pi piti 71 moun jwenn arestasyon san rezon pandan kanpay t ap fèt pou eleksyon an – nan pifò ka yo, se apre yo te fin ede opozisyon an.
Gouvènman Maduro a mete baryè tou devan dè milyon moun Venezyela ki ap viv nan peyi etranje, pa ekzanp anpil nan yo paka jwenn paspò ni dokiman ke yo dwe genyen pou yo rezide legalman nan peyi kote yo ap viv la.
Plis toujou, se sèlman yon ti kantite limite obsèvatè ki te gen dwa swiv dewoulman eleksyon an.
Nan eleksyon sa a, Venezyelyen te gen pou fè yon chwa, dapre Sekretè Deta Blinken, “pèp Venezyela a merite yon eleksyon ki reflete kòmsadwa volonte li, san okenn manipilasyon. » Sepousa fòk responsab yo konte chak bilten kòmsadwa e san kachotri.
Sete yon editoryal ki reflete opinion Gouvènman Etazini an.
