Kounyea, yon editoryal ki reflete ideyal ak enstitisyon Etazini yo:
Premye lendi Septanm, Etazini fete Fèt Travay, kote li selebre travayè li yo ak kontribisyon pa yo nan siksè Etazini.
Pou repete pawòl Prezidan Joe Biden, se klas mwayèn nan ki te bati Etazini, epi se sendika travayè yo ki te bati klas mwayèn nan. Gen anpil verite nan deklarasyon sa a.
Vè finisman ane 1860 yo, machin te koumanse ranplase travay manyèl nan zonn riral yo, men yo te kreye nouvo djòb nan vil endistriyèl yo nan nòdès peyi a. E konsa, gason ki te retounen soti nan channbatay yo nan Gè Sivil la te abandone zonn riral yo pou antre nan vil endistriyèl yo ki t ap grandi vit. An menm tan, vag apre vag imigran te debake, ki te soti sitou ann Ewòp, pou chache travay ak nouvo opòtinite.
Men li te difisil pou yo jwenn opòtinite sa yo lè dè milye travayè endistriyèl te vin travay nan faktori yo, nan moulen asye yo ak nan min yo 12 èdtan pa jou, 7 jou pa semenn, anpil fwa nan kondisyon malouk, menm danjre. E bout pou bout, sa yo te touche a te apèn ase pou yo viv anvan yo touche ankò.
Konsa, yo te antre nan sendika travayè. Lè plis moun te vin manm, sendika yo te gen plis mwayen pou negosye meyè sale ak meyè kondisyon travay. Yo te òganize mach e lè sa te nesesè, yo te fè grèv.
Nan preparasyon pou youn nan manifestasyon konsa kote yo te moutre fòs yo nan kantite manm yo ki ta pwal okipe beton an, sa ki te fèt 5 Septanm 1882, 10.000 travayè nan New York City te vag sou salè jounen travay la e te fè mach soti nan lakomin [City Hall], pou ale nan yon pak toupre a, konsa yo te patisipe nan premye sa yo te rele Konje pou Moun ki nan Travay.
Lide sa a, lide pou gen yon jou pou selebre travayè chak jou yo, te vin pran fòs, e mach menm jan an te kontinye chak ane. Bout pou bout, 12 lane apre, 28 Jen 1894, Kongrè Etazini an te mete ann aksyon yon lwa pou fè Fèt Travay la tounen yon jou konje nasyonal, ke peyi a dwe obsève premye lendi Septanm.
Pou repete pawòl Prezidan Grover Cleveland, ki te siyen pwojè-lwa a pou fè li tounen lwa, « Yon santiman vrèman ameriken rekonèt diyite travay ak reyalite ki moutre ke onè mache ak travay du. »
Nan Jou Fèt Travay la, Labor Day, nou onore verite esansyèl sa a ansanm ak tout devouman ak diyite travayè ameriken yo, ki bay pwosperite nasyon an tout fòs li,” se sa Prezidan Biden te di nan yon deklarasyon ekri.
Nan Jou Fèt Travay la, nou kanpe nan solidarite ak tout travayè ki leve nasyon nou an nan nivo kote li rive a e ak tout sendika yo ki bay tout travayè pouvwa ak yon vwa pou fè tande yo. »
Sete yon editoryal ki reflete ideyal ak enstitisyon Etazini yo.
