Kounyea, yon editoryal ki reflete opinyon Gouvènman Etazini an:
Mwa ki ap vini an make 8èm anivèsè siyati Akò Lapè Kolonbi a ki te mete fen nan yon konfli 54 lane ant gouvènman Kolonbi a ak Fòs Ame Revolisyonè Kolonbi a yo (FARC).
Akò Lapè a abode zak atwòs ki gen rapò ak konfli a, ak abi ki te fèt pandan plis pase 50 lane,’’ se pawòl Dorothy Shea ki se Asistan Reprezantan Etazini nan l-ONU. «Malgre pwogrè ki fèt … Kolonbi kontinye ap sibi konsekans konfli sa a, konsekans ki ap la pou lontan. Aplikasyon total Akò Lapè 2016 la enpòtan anpil pou Kolonbi ka travay sou konsekans sa yo epi reyalize yon lapè dirab. »
«Pou akonpli objektif sa a, fòk gen efò pou akselere aplikasyon akò a totalman epi jwenn jistis pou viktim ak sivivan konfli a yo, pami yo moun ki siviv vyolans ki baze sou sèks. Si Kolonbi pa fè pa sa yo, li pwal kontinye fè fas ak defi sa yo ki kanpe devan sekirite li, estabilite li ak objektif li pou konbat trafik dwòg. »
Kolonbi ap devlope yon plan repons rapid ki chache moute pwojè devlopman, ak envestisman piblik ak sèvis, pou bay aplikasyon Akò Lapè a jarèt. Anbasadè Shea te di devan Konsèy Sekirite l-ONU an, sa pa gen lontan, ke «nou byen akeyi nouvo efò pou remete enèji nan Dènye Akò a.»
«Sa gen lontan depi Etazini ap sipòte efò Kolonbi pou pratike refòm nan zonn riral yo, yon refòm byen detaye e ki chaje ak defi, men ki se yon pati kle nan Akò Lapè a. Pou vanse nan chapit Refòm Detaye nan zonn riral yo ak pou kreye kominote ki pi byen balanse, fòk gen plis ki fèt – sitou pou ogmante dwa peyizan sou tè yo ak agrikilti entelijan ki konprann klima a, ouvèti sou finansman pou medam yo, jèn yo, ak kominote rasyal, etnik, ak gwoup endijèn, kidonk kominote pitit tè a, ki anba tab sosyete a.»
Gen yon bezwen klè «pou gen pi gwo mezi sekrite pou pwoteje defansè dwa moun, lidè sosyal, ak ansyen konbatan. … Menm jan an, vyolans ki ap kontinye kont lidè sosyal yo ak defansè dwa moun, li twoublan anpil, »
«Li enpòtan pou gouvènman Kolonbi a kenbe angajman li ak Nwa Kolonbyen yo ak kominote endijèn yo nan kad Chapit Etnik la. Pandan akò entènasyonal ki akonpaye Chapit Etnik nan Akò Lapè a, Etazini ekzòte Kolonbi pou li fè pwogrè rapid epi aplike plis pwen nan domèn sa a. »
Nan 8 ane ki pase depi Akò Final la, gen plis atik ki rete kle nan aplikasyon akò lapè sa a, » se Anbasadè Shea ki ap pale. « Fè lapè nan benefis tout Kolonbyen, espesyalman kominote sivil yo ak kominote ki pi frajil yo ki se endijèn yo ak pèp Kolonbyen Nwa yo, se sa tout moun ki enplike yo ta dwe vize anvan tout bagay. »
Sete yon editoryal ki reflete opinyon Gouvènman Etazini an.
