Kounyea, yon editoryal ki reflete ideyal ak enstitisyon Etazini yo:
11 Novanm, Ameriken yo selebre sa yo rele Jou Veteran yo. Selebrasyon jou sa a pa limite nan peyi Etazini sèlman – pifò peyi ki te mele nan Premye Gè Mondyal la make jou sa a. Se paske nan 11 minit apre 11 è tapan, 11 Novanm 1918, yon akò ke pwisans alye yo te siyen ak Almay pou mete fen nan gè a te antre ann aplikasyon, sa ki te mete fen nan konfli sa a ki te fè anpil san koule e ke yo te rele nan moman an « Gè pou fini ak tout Gè. »
Malgre santiman sa a ki te fè lavi a parèt bèl, depi Premye Gè Mondyal la te bout, okenn dizèn lane pa pase san ke se pa yon gè ki te ba li fòm li. Kit se konfli nan Kore yo ak nan Endochin, nan sid Azi oubyen nan Balkan yo, batay nan Nò Afrik ak nan Mwayenn Oryan an oubyen pi gwo a, konfli ki te fè plis san koule pase tout lòt yo – 2èm Gè Mondyal la – solda ameriken te goumen e te mouri, kòt a kòt ak alye nou yo, pou defann peyi nou, pèp nou, ideyal nou.
Ane sa a make sa ki rele 80èm Operasyon Overlord. Sete koumansman operasyon pou libere Wès Ewòp la ak pi gwo operasyon militè nan tan modèn nan: aterisaj alye yo sou plaj yo nan Nòmandi, pi gwo ofansiv nan dlo ak nan lè ki te janm dewoule nan listwa.
« Soti nan lanmè ak nan syèl la, prèske 160-mil twoup Alye te desann sou Nòmandi, » se Prezidan Joe Biden ki te pale konsa nan seremoni ki te dewoule nan Colleville-sur-Mer, an Frans. « Anpil nan yo, san di petèt, pa te janm tounen lakay yo. Anpil te siviv ‘jounen ki te pi long la,’ te kontinye batay pandan dè mwa jouk yo te rive genyen gè a. »
« Mesye yo ki te batay isit la te tounen ewo pa paske se yo ki te gen plis fòs oubyen ki te pi malouk oubyen ki te batay ak plis raj – malgre yo te tou sa – men paske yo te resevwa yon kokenn misyon pandan yo te konnen yo chak ke te gen yon posiblite reyèl pou yo mouri, men yo te fè li magre sa. Yo te konnen – san okenn dout, ke gen kèk bagay ki enpòtan ase pou yo goumen pou yo e mouri pou yo. »
« Libète merite sa. Demokrasi merite sa. Etazini merite sa. Mond la merite sa – nan epòk la, kounyea, e pou tout tan, » se pawòl Prezidan Biden.
« Demokrasi pa janm garanti. Se chak jenerasyon ki dwe prezève li, defann li, e batay pou li. Se nan sa pou nou teste moun ki ap viv nan chak epòk, » se Prezidan Biden ki ap pale.
« Nan memwa moun sa yo ki te goumen isit la, mouri isit la, te vrèman sove mond la isit la, ann nou bat pou nou merite sakrifis yo a. »
Nan jounen sa a, nou remèsi tout veteran, nan tan lontan ak kounyea. Nou onore yo, e nou toujou sonje sakrifis ke yo te fè pou pèp nou an, pou peyi nou an, pou tout mond la.
Sete yon editoryal ki reflete ideyal enstitisyon Etazini yo.
