Kounyea, yon editoryal ki reflete opinyon Gouvènman Etazini an:
Prezidan Joe Biden te pale ak nasyon an apre eleksyon jeneral 5 Novanm nan, kote pèp ameriken an te vote pou remete nan pouvwa a ansyen Prezidan Donald Trump, ke Biden te kale an 2020.
«Pandan plis pase 200 lane, Etazini reyalize pi bèl eksperyans nan istwa mond la kote yon pèp gouvène tèt li – e se pa yon pawòl pou fè chèlbè; se yon reyalite – kote pèp la vote pou chwazi pwòp lidè li e fè li pasifikman e kote, nan yon demokrasi, se volonte pèp la ki triyonfe. »
Prezidan Biden di li te rele Prezidan-eli Trump pou fè-l konpliman pou viktwa li.
« E mwen asire l ke m-ap pase tout administrasyon mwen an lòd pou travay ak ekip li a pou asire yon tranzisyon pasifik e nan lòd. Se sa pèp ameriken an merite. »
Apre kanpay kote yo te batay kote yo te goumen anpil, ki te mete Vis-Prezidan Kamala Harris devan Msye Trump, Prezidan Biden chante lwanj Vis-prezidan an ak kous li pou Mezon Blanch.
«Li gen yon rèl do ki tankou yon ba fè. Li gen yon bon karaktè, yon vrè karaktè. Li bay tout kè li ak tout efò li, e li menm ak tout ekip li a ta dwe fyè de kanpay ke yo te mennen an. »
Moun ki te vote pou Vis-prezidan Harris, Msye Biden ankouraje yo «pou yo rete angaje» e «pa abandone lafwa yo. » Li souliyen ke kanpay politik «se konpetisyon ant vizyon kandida yo. »
« Peyi a chwazi youn ou lòt. Nou aksepte chwa ke peyi a fè. Mwen te di plizyè fwa ke ou paka renmen peyi w sèlman lè w genyen. Ou paka renmen pwochen w sèlman lè ou dakò ak li. Yon bagay ke mwen espere nou ka fè kèlkeswa kandida ou te vote pou li a se pou nou len wè lòt pa kòm advèsè men kòm konpatriyòt ameriken, bese tanperati a. »
«M pwal fè travay mwen kòm prezidan, » se Prezidan Biden ki ap pale. « Mwen pwal akonpli sa mwen te pwomèt lè m t ap prete sèman, e mwen pwal onore Konstitisyon an. 20 Janvye lòt ane, nou pwal gen yon transfè pouvwa pasifik isit la nan Etazini. »
Sete yon editoryal ki reflete opinyon Gouvènman Etazini an.
