Men yon editoryal ki pral prezante opinyon gouvènman ameriken an.
Nan dat 6 desanm pase a, rejim ilejitim Nicolas Maduro a nan Venezuela te òganize yon maskarad politik ki te dwe sanble ak yon eleksyon palmantè. Sekretè Deta Mike Pompeo di nan yon deklarasyon:
“Erezman, pa gen anpil moun ki kwè nan manti sa a.”
Lèzetazini ansanm avèk plizyè douzèn lòt demokrasi atravè lemond, kondane madigra sa a ki pa satisfè okenn prensip kredibilite minimòm. Sekretè Deta Pompeo di: “Maduro te gen odas ase pou l fè magouy ak eleksyon sa yo anfavè pwòp tèt li lè l te sezi ilegalman non pati politik yo ak slogan ki te sou bilen vòt yo, li te fè yon konsèy elektoral ki fidèl anvè li manipile pwosesis la, li te itilize vyolans ak entimidasyon, mete sou lòt taktik ki pa demokratik.” Sepandan, yon afè de 60 peyi ak òganizasyon atravè lemond –pami yo gen Lèzetazini, Inyon Ewòp la, Òganizasyon Eta Ameriken yo, Gwoup Lima a avèk Gwoup Kontak Entènasyonal la- pa aksepte rezilta eleksyon an, paske yo ilejitim.
Sekretè Deta Pompeo ajoute: “Maskarad sa a se pa t anyen dòt ke yon tantativ pou enstale yon Asanble Nasyonal ak yon gwoup palmantè “j’approuve” konplis ladan l, ki anba kontwòl Maduro sèlman, tandiske l ap detwi sèl enstitisyon demokratik ki rete nan peyi a e ki vrèman reprezante pèp venezuelyen an.”
Makakri elektoral sa a dewoule nan moman rejim ilejitim Maduro a fèmen je l pou l asasinen opozan li yo, kraze zo yo e mete yo nan prison, yon bagay Nasyon Zini, Òganizasyon Eta Ameriken yo ak lòt obsèvatè endepandan denonse nan rapò yo prepare sa pa gen lontan. Anvan dewoulman eleksyon magouy la, rejim nan te pran dispozisyon tou pou l ranfòse pèsekisyon li kont travayè imanitè yo e menase pwogram distribisyon manje yo. Sekretè Deta Pompeo deklare: “Yon rejim brital e san kè konsa pa kapab reyalize eleksyon li e onèt.”
Lèzetazini pral kontinye rekonèt Prezidan Pwovizwa a, Juan Guaido, ak Asanble Nasyonal lejitim nan. Kominote Entènasyonal la pa kapab pèmèt Maduro –ki sou pouvwa a paske li te vòlè eleksyon 2018 la- tire pyès avantaj nan yon 2èm eleksyon li vòlè.
Lèzetazini ankouraje tout peyi ki angaje nan demokrasi pou yo pote-kole avèk li nan kondanasyon eleksyon maskarad 6 desanm nan, an menm tan ke yo va apiye Asanble Nasyonal lejitim nan avèk Prezidan Pwovizwa pou yo ka fè pwogrè. Ni Maduro ni yon Asanble Nasyonal ki eli nan koken pa p reprezante vwa lejitim pèp venezuleyen an. Se eleksyon prezidansyèl lib e onèt sèlman ki kapab eksprime vwa sa a,
Sete yon editoryal ki t ap prezante opinyon gouvènman ameriken an.