Կրեմլը հայտարարեց, որ առաջ է շարժվելու Ուկրաինայի այս մարզերի մտացածին անեքսիայի ճանապարհով, չնայած, որ Ռուսաստանը լիովին չի վերահսկում այդ տարածքները։
Պետքարտուղար Էնթոնի Բլինքենը դատապարտել է «Կրեմլի շինծու հանրաքվեները»՝ դրանք անվանելով «անիմաստ փորձ՝ քողարկելու այն, ինչը Ուկրաինայում հողերի գրավման հերթական քայլ էր»։ «Ավելի պարզ ասած», հավելել է նա, «արդյունքները կազմակերպվել են Մոսկվայում և չեն արտացոլում Ուկրաինայի ժողովրդի կամքը։
Միացյալ Նահանգները չի ճանաչում և երբեք չի ճանաչի այս շինծու հանրաքվեների կամ Ռուսաստանի կողմից ուկրաինական տարածքի մտացածին անեքսիայի օրինականությունը կամ արդյունքները»։ Ուկրաինական տարածքի բռնակցման Ռուսաստանի փորձերը խախտում են միջազգային իրավունքը և անարգանք են միջազգային խաղաղության և անվտանգության սկզբունքների հանդեպ։
«Ռուսաստանը հարկադրել է իր գրաված շրջանների բնակչության մեծ մասին փախչել, իսկ մնացած Ուկրաինայի քաղաքացիներին ստիպել է քվեարկել զենքի սպառնալիքի տակ, իրենց անվտանգության և իրենց մտերիմների անվտանգության համար վախի մթնոլորտում», ասել է պետքարտուղար Բլինքենը։ Ուկրաինայի ժողովուրդը մշտապես արտահայտել է ազատ և ժողովրդավարական ապագայի իր ձգտումը։ Նրանց զինվորները խիզախորեն մարտնչում են, իսկ Ռուսաստանի կողմից վերահսկվող Ուկրաինայի տարածքներում քաղաքացիները դիմադրում են Ուկրաինայի միջազգայնորեն ճանաչված սահմանները կոպիտ ուժով փոխելու Մոսկվայի ջանքերին։
Միացյալ Նահանգները և նրա դաշնակիցներն ու գործընկերները կշարունակեն սատարել Ուկրաինային Ռուսաստանի ագրեսիայի դեմ իր տարածքը պաշտպանելու պայքարում։ «Մենք ամբողջ սրտով աջակցում ենք Ուկրաինայի միասնությանը, ինքնիշխանությանը, անկախությանը և տարածքային ամբողջականությանը նրա միջազգայնորեն ճանաչված սահմաններում», հայտարարել է պետքարտուղար Բլինքենը։
Նախագահ Ջո Բայդենն ասել է. «Մենք երբեք չենք ճանաչի այդ տարածքները՝ որպես որևէ այլ երկրի մաս, բացի Ուկրաինայից, և կաջակցենք Ուկրաինային այնքան, որքան պահանջվի»։ Նա նաև նախազգուշացրել է, որ Միացյալ Նահանգները «լրացուցիչ անհապաղ և լուրջ տնտեսական հետևանքներ կպարտադրի Ռուսաստանին»։ Միացյալ Նահանգները ամբողջ աշխարհում իր գործընկերների հետ միասին մերժում է ցանկացած կեղծված արդյունք, որի մասին հայտարարում է Ռուսաստանը։ «Մենք կշարունակենք սատարել ուկրաինացի ժողովրդին և նրանց աջակցություն ցուցաբերել անվտանգության ոլորտում, որպեսզի օգնենք նրանց պաշտպանվելու Ռուսաստանի ներխուժմանը խիզախորեն դիմակայելիս», հայտարարել է նախագահ Բայդենը։
Սույն խմբագրականն արտացոլում է Միացյալ Նահանգների կառավարության պաշտոնական դիրքորոշումը։
Կրեմլի նախաձեռնած հանրաքվեները Ուկրաինայում անօրինական են
Russia's Federation Council ratifies annexation of four Ukrainian regions. October 4, 2022.
Մոսկվայի կողմից աջակցվող իշխանությունները շինծու հանրաքվեներ անցկացրեցին Ուկրաինայի չորս մարզերում՝ Դոնեցկում, Խերսոնում, Լուգանսկում և Զապորոժիեում։