Իսրայելի հետ հակամարտության ընթացքում ««Համասը» բազմիցս օգտագործել է քաղաքացիական ենթակառուցվածքները, օրինակ՝ դպրոցներն ու հիվանդանոցները, զենքի համար որպես պահեստ ծառայեցնելու, գրոհայիններին տեղակայելու և Իսրայելի վրա հարձակումները համակարգելու համար»,- ՄԱԿ-ում ԱՄՆ ներկայացուցչի տեղակալ Դորոթի Շի:
Այդուհանդերձ, «Իսրայելի պայքարը «Համասի» դեմ է, ոչ թե խաղաղ պաղեստինցիների, որոնց, իբր, ներկայացնում է այդ ահաբեկչական խմբավորումը»։
«Նույնիսկ «Համասի» դեմ պայքարի ժամանակ՝ Իսրայելը բարոյական պարտավորություն ունի կանխելու քաղաքացիական բնակչությանը հասցվող վնասը։ Չենք ցանկանում, որ հիվանդանոցները դառնան բռնության վայրեր։ Ոչ ոք չի շահում այդ իրավիճակից, առավել ևս՝ խաղաղ բնակիչները, որոնք չեն սկսել այս հակամարտությունը և չունեն այն դադարեցնելու միջոցներ, բայց ունեն բժշկական օգնության խիստ կարիք»։
«Իսրայելի համար շատ կարևոր է պահպանել միջազգային մարդասիրական իրավունքը և ձեռնարկել բոլոր հնարավոր քայլերը՝ քաղաքացիական բնակչության վնասը կանխելու համար»,- ասել է դեսպան Շին։
Բացի այդ, քանի որ «Գազայում չափազանց շատ քաղաքացիական անձինք քաղցած են, չունեն դեղորայք, մաքուր խմելու ջուր կամ պատշաճ կացարան, … Իսրայելին հստակ հասկացրել ենք, որ նրանք պետք է ավելին անեն՝ այս կանխարգելելի հումանիտար խնդիրները լուծելու համար»։
«Բացահայտ նշել ենք այն կոնկրետ քայլերը, որոնք ակնկալում ենք Իսրայելից, այդ թվում՝ դեպի Գազա պարենի, դեղորայքի և առաջին անհրաժեշտության այլ պարագաների մատակարարումների ավելացումը՝ հաշվի առնելով, որ ձմեռ է։
Գազայում չպետք է լինի բռնի տեղահանություն կամ սովի տանող քաղաքականություն, ինչը լուրջ հետևանքներ կունենա ինչպես ԱՄՆ օրենքների, այնպես էլ միջազգային իրավունքի տեսանկյունից։
Մենք պետք է հասնենք մարդասիրական օգնության մատակարարումների անհապաղ ավելացմանը։ Միայն աջակցության, սննդի, մաքուր ջրի և բժշկական պարագաների կայուն հոսքը Գազա կթեթևացնի իրավիճակը և կմեղմի պարենային անվտանգության աղետալի մակարդակը»։
«Առջևում մեզ սպասվում է բարդ աշխատանք հրադադարի հաստատման ուղղությամբ։ Պաղեստինի իշխանության՝ առանց «Համասի» Գազայի վերականգնմանն ուղղված ջանքերին օժանդակելու մարտահրավերը ահռելի է»,- ասել է դեսպան Շին։
«Այնուամենայնիվ, առաջին հերթին պետք է զբաղվենք հումանիտար անհետաձգելի իրավիճակով։ Քանի որ վտանգված են կյանքեր՝ Գազայում խաղաղ պաղեստինցիների կյանքը և պատանդների կյանքը, որոնք սոսկալի տառապանքների են ենթարկվել այն պահից, երբ «Համասը» [2023 թվականի] հոկտեմբերի 7-ին սկսեց այս սարսափելի հակամարտությունը»։
«Անհրաժեշտ է հասնել նրան, որ պաղեստինցիները ձգտեն ապագայի՝ հիմնված ինքնորոշման, արժանապատվության և անվտանգության վրա։ Անհրաժեշտ է հասնել նրան, որ Իսրայելն իրեն ապահով զգա իր սահմաններում»,- ընդգծել է դեսպան Շին։
«Միացյալ Նահանգները շարունակում է հրադադարի և պատանդների ազատման գործարքի ուղղությամբ ջանքեր գործադրել, որոնք հնարավորություն կտան ավելացնել պաղեստինցի խաղաղ բնակիչների համար անհրաժեշտ կենսական օգնությունը։ Պարզապես դա միակ ելքն է, որը կբերի տարածաշրջանում կայուն խաղաղության և հանդարտության»։
Սույն խմբագրականն արտացոլում է Միացյալ Նահանգների կառավարության տեսակետը։
