Այս ամիս լրանում է Մինսկի երկրորդ համաձայնագրերի տասներորդ տարելիցը։ Խոսքը մի շարք համաձայնագրերի մասին է, որոնք Ռուսաստանը պարտադրեց Ուկրաինային՝ Կիևի կրած ռազմական պարտություններից հետո։
Համաձայնագրերը անհաջող փորձ էին վերջ տալու հակամարտությանը, ինչի հետևանքով Ռուսաստանը բռնակցել էր Ուկրաինայի Դոնբասի տարածաշրջանը։
Մինսկի համաձայնագրերի նպատակներից էր նաև կանխել Ռուսաստանի հետագա ներխուժումը Ուկրաինա։ Երկու կողմն էլ բազմիցս խախտել են համաձայնագրերը, հատկապես՝ Ռուսաստանը։ Այնուհետև, 2022 թվականի փետրվարի 22-ին, Ռուսաստանի նախագահ Վլադիմիր Պուտինը միակողմանիորեն չեղյալ հայտարարեց Մինսկի համաձայնագրերը և երկու օր անց ներխուժեց Ուկրաինա։
«Ռուսաստանը ստորագրեց այդ համաձայնագրերը, բայց այդպես էլ չկատարեց ստանձնած պարտավորություններից և ոչ մեկը՝ ո՛չ Մինսկի արձանագրությունը, ո՛չ Մինսկի համաձայնությունների կատարման համալիր միջոցառումների փաթեթը, ո՛չ էլ Եռակողմ կոնտակտային խմբի կողմից համաձայնեցված բազմաթիվ քայլեր»,- հայտարարել է ՄԱԿ-ում ԱՄՆ-ի ներկայացուցչի տեղակալի պաշտոնակատար Ջոն Քելլին։
«Այդ պարտավորությունները ներառում էին հրադադարի մասին համաձայնությունները, Ուկրաինայի ինքնիշխան տարածքից «օտարերկրյա զինված ուժերի» դուրսբերումը, Ուկրաինայի արևելքում Ռուսաստանի կողմից աջակցվող ապօրինի զինված խմբավորումների լուծարումը, ինչպես նաև Ուկրաինայի միջազգայնորեն ճանաչված սահմանների նկատմամբ ուկրաինական կողմի վերահսկողության վերականգնումը։ Ռուսաստանը դրանցից ոչ մեկը չի կատարել»։
«Փոխարենը, Ռուսաստանը հետևողականորեն և բազմիցս փորձել է խափանել Մինսկի համաձայնագրերի հիմնարար նպատակի [կատարումը], սրել մարտական գործողությունները և խաթարել միջազգային մոնիթորինգի ջանքերը»։
Միացյալ Նահանգները ցանկանում է տեսնել «ինքնիշխան և բարգավաճ Ուկրաինա»,- նշել է դեսպան Քելլին։ «Սակայն պետք է սկսենք այն գիտակցումից, որ Ուկրաինայի՝ մինչև 2014 թվականի սահմաններին վերադառնալը անիրատեսական նպատակ է»։
«Այս պատրանքային նպատակի հետևից գնալը միայն կերկարաձգի պատերազմը և կհանգեցնի նոր տառապանքների։ Ուկրաինայի համար կայուն խաղաղությունը պետք է ներառի անվտանգության հուսալի երաշխիքներ՝ ապահովելու համար, որ պատերազմը նորից չի սկսվի»։
Սակայն կասկածից դուրս են այն հիմնարար և անժխտելի փաստերը, որ «Ուկրաինան ինքնիշխան, անկախ երկիր է, և Ռուսաստանի անօրինական զավթողական պատերազմը խախտում է ՄԱԿ-ի կանոնադրությունը»,- նշել է դեսպան Քելլին։
«Ռուսաստանը պետք է անհապաղ դադարեցնի Ուկրաինայի դեմ պատերազմը, որը ոչ միայն խախտում է միջազգային իրավունքը, այլև ռազմավարական սխալ էր հենց Ռուսաստանի համար։ Դյուրին ելքը բանակցություններն են՝ հենց հիմա։ Եթե Ռուսաստանը դրա փոխարեն ընտրի դժվար ճանապարհը, ապա ավելի մեծ ու աճող վնասներ կհասցնի իր տնտեսությանը և կորուստներ կունենա մարտի դաշտում»։
«Միացյալ Նահանգները … հանձնառու է արյունահեղության դադարեցմանը և Եվրոպայում կայունության վերականգնմանը»,- ասել է դեսպան Քելլին։ «Ուկրաինան, Ռուսաստանը և մեր եվրոպացի գործընկերները պետք է մաս կազմեն այս քննարկմանը»։
Սույն խմբագրականն արտացոլում է Միացյալ Նահանգների կառավարության տեսակետը։
