ԱՄՆ Առափնյա պահպանության արձագանքման քաղաքականության գծով հրամանատարի օգնական, դերծովակալ Ադամ Չեյմին վերջերս տեղի ունեցած Կոնգրեսի լսումների ժամանակ ներկայացրել է ծառայության հաջողությունները։
«Փետրվարի 2-ին առափնյա պահպանության «Ջոզեֆ Դոյլ» մոտորանավակը և առափնյա պահպանության օդանավը պարեկություն էին իրականացնում ԱՄՆ Վիրջինյան կղզիների հարավում։ Մոտորանավակը կանգնեցրել և ստուգել է GOFAST նավը՝ առգրավելով 2,000 ֆունտ (մոտ 900 կիլոգրամ) կոկաին։ Ձերբակալվել են երեք վենեսուելացի մաքսանենգներ։ Այդ մոտորանավակի և օդանավի անձնակազմի շնորհիվ կանխվել է ավելի քան 16 միլիոն դոլար արժողությամբ թմրանյութերի մուտքը ամերիկյան փողոցներ»։
Հունվարի 23-ին առափնյա պահպանության մոտորանավակը պարեկություն էր իրականացնում Մեքսիկայի ափերից հեռու, երբ անձնակազմը նկատեց երեք արտաքին շարժիչներով GOFAST նավը։ Արդյունքում՝ առափնյա պահպանության անձնակազմը առգրավել է վեց տոննա կոկաին՝ մոտ 100 միլիոն դոլար արժողությամբ, և ձերբակալել տասը մաքսանենգների Մեքսիկայից և Էկվադորից։
«Ընդհանուր առմամբ 2024 թվականի ֆինանսական տարվա ընթացքում առափնյա պահպանությունը առգրավել է 106 տոննա կոկաին, որի փողոցային արժեքը կազմում է 3,2 միլիարդ դոլար, և ձերբակալել 213 մաքսանենգների»,- հայտարարել է դերծովակալ Չեյմին։
«Այս տարի մեր անձնակազմերը առգրավել են 108 տոննա կոկաին՝ ֆինանսական տարվա ընդամենը հինգերորդ ամսում գերազանցելով նախորդ տարվա ընդհանուր ցուցանիշը»։
«Կոկաինի շրջանառության կանխումը կարևոր է, քանի որ կոկաինի մաքսանենգությամբ զբաղվող այդ նույն կարտելները նաև ֆենտանիլի արտադրությամբ ու մաքսանենգությամբ են զբաղվում»,- նշել է դերծովակալ Չեյմին։
«Կոկաինը կանխիկ եկամտի հիմնական աղբյուրն է կարտելների համար»,- հավելել է նա։ «Կոկաինի վաճառքից ստացված նրանց ահռելի շահույթն ուղղվում է այլ անօրեն գործողությունների ֆինանսավորմանը, ինչպիսիք են մարդկանց մաքսանենգությունը, զենքի առևտուրը և ֆենտանիլի նման սինթետիկ թմրանյութերի արտադրությունը»։
«Ֆենտանիլը մեր երկրում թմրանյութերի հետ կապված մահվան դեպքերի հիմնական պատճառն է, սակայն կոկաինը դեռ տարեկան ավելի քան 25 հազար ամերիկացիների կյանք է խլում։ Չնայած հազվադեպ ենք ֆենտանիլ հայտնաբերում ծովում, առափնյա պահպանությունը ակտիվորեն նոր ուղիներ է փնտրում այս խնդրի դեմ պայքարելու համար։ Մենք համագործակցում ենք դաշնային, նահանգային, տեղական, ցեղային և միջազգային գործընկերների հետ՝ պաշտպանելու ամերիկացի ժողովրդին և երաշխավորելու մեր ազգային անվտանգությունը»։
«Առափնյա պահպանությունը բազմաթիվ գործառույթներ է իրականացնում, բայց մենք միայնակ չենք գործում»,- ընդգծել է դերծովակալ Չեյմին։ «Հպարտ ենք, որ կողք-կողքի ծառայում ենք Պաշտպանության նախարարության և մեր ներքին անվտանգության կառույցների հետ, ինչպիսիք են Մաքսային և սահմանապահ ծառայությունը և Ներքին անվտանգության հետաքննությունների վարչությունը, ինչպես նաև Պետքարտուղարության և Արդարադատության նախարարության հետ»։ Այս ամենը արվում է Ամերիկան կրկին անվտանգ դարձնելու համար։
Սույն խմբագրականն արտացոլում է Միացյալ Նահանգների կառավարության տեսակետը։
