«Սահմանային ճգնաժամը դարձել է ազգային հետախուզության խնդրո առարկա, հարցի լրջությունը նաև պահանջում է Պաշտպանության նախարարության ներգրավվածությունը»,- ասել է ԱՄՆ փոխնախագահ Ջեյ Դի Վենսը։
Ազգային հետախուզության տնօրեն Թուլսի Գաբարդը նշել է, որ նախորդ վարչակազմի օրոք 21 միլիոն մարդ հատել է սահմանը՝ շատերը առանց որևէ ստուգման։
«Կենտրոնական Ասիայից ավելի քան 4,000 մարդ հատել է մեր սահմանները՝ «Իսլամական պետության» հետ կապված ցանցի միջոցով։ Մեր Ազգային հակաահաբեկչական կենտրոնը ստուգումներ է իրականացրել և բացահայտել է այդ անձանց։ Նրանցից հարյուրավորները կամ հայտնի ահաբեկիչներ են եղել, կամ փոխկապակցված են եղել հայտնի ահաբեկիչների հետ։ ... Մեր Հակաահաբեկչական կենտրոնը փորձում է ստուգման միասնական համակարգ ապահովել, որպեսզի կարողանանք պարզել, թե ովքեր են իրականում գտնվում մեր երկրում, բացահայտել նրանց, ովքեր սպառնալիք են ներկայացնում, և հեռացնել երկրից»։
ԱՄՆ պաշտպանության նախարար Փիթ Հեգսեթը նշել է, որ իր գլխավորած գերատեսչությունը ռեսուրսներ է հատկացրել, որոնք նպաստում են սահմանի անվտանգության ամրապնդմանը։
«Խոսքը ոչ միայն զորքերի, վերահսկողության և սարքավորումների մասին է, այլև պլանավորում է իրականացվում ու կարողություններ են ներդրվում, որոնք ուժեղացնում են Սահմանային պարեկային ծառայության գործունեությունը։ ... Մենք այդ տեսնում ենք թվերով՝ հարավային սահմանի անօրինական հատումները նվազել են 98%-ով։ Դեռ չենք հասել 100%-ով իրականացվող օպերատիվ վերահսկողության, բայց այդ ճանապարհին ենք, քանի որ դա է նախագահի կողմից մեզ տրված հանձնարարականը»։
ԱՄՆ փոխնախագահ Վենսն ընդգծել է, որ սահմանի անվտանգությունն ապահովելու միջոցներից մեկն է «դյուրացնել անօրինական ներգաղթյալների համար սեփական նախաձեռնությամբ տուն վերադառնալը».
«Մենք չենք ցանկանում հետապնդել և ձերբակալել յուրաքանչյուր անձի, բայց կիրառելու ենք ամերիկյան ժողովրդի ներգաղթի օրենքները։ Եթե այստեղ անօրինական եք գտնվում, մեր վարչակազմը հորդորում է վերադառնալ տուն, իսկ եթե ցանկանում եք գալ Միացյալ Նահանգներ, դիմեք օրենքով սահմանված համապատասխան միջոցների»։
Փոխնախագահ Վենսը նաև կոչ է արել Մեքսիկայի կառավարությանը լրջորեն վերաբերվել թմրակարտելների և թմրանյութերի թրաֆիքինգով զբաղվողների դեմ պայքարին և դադարեցնել թմրանյութերի հոսքը ԱՄՆ։ «Ցանկանում ենք, որ Մեքսիկայի կառավարությունն օգնի ինքն իրեն, բայց նաև այդ գործընթացում օգնի ամերիկացի ժողովրդին»,- ասել է նա։ «Հուսով ենք, որ այդպես էլ կլինի»։
Սույն խմբագրականն արտացոլում է Միացյալ Նահանգների կառավարության տեսակետը։
