Nou envite w suiv yon editoryal k ap bay opinyon gouvènman ameriken an.
Se yon bon nouvèl, le fèt ke lidè opozisyon an nan Larisi, Alexei Navalny, sòti kounyela a nan koma kote l te ye a e li kapab reponn pa siyn si moun pale avèk li, daprè doktè li nan vil Bèlen, ann Almay. Sepandan, yon deklarasyon ki sòti nan Lopital La Charite lanse avètisman pou l di: “Li twò bonè toujou pou moun evalye efè potansyel a-lon-tèm pwazon yo te ba li a.”
Yon avyon te pran Misye Navalny nan Peyi Larisi pou mennen li nan Bèlen apre li te santi l malad pandan li te nan yon avyon ki t ap sòti nan Siberi pou l ale Moskou nan dat 20 daout pase a e aprè doktè ris, sou demand fanmi li, te bay pèmisyon pou yo transpòte li ann Almay. Pandan li nan Bèlen, kèk doktè alman te fin pa konprann se anpwazonnen yo te anpwazonnen Misye Nalvany, ki pa konn mete dlo nan bouch li pou l kritike Prezidan ris la, Vladimir Putin; e pwazon yo te ba li a se yon ajan chimik ki atake nè yon moun e ke espesyalis medikal yo klase nan gwoup novichòk la, yon ajan chimik ke Larisi te devlope.
Apre Gwoup medikal alman an te fin anonse dekouvèt li a, anbasadè Lèzetazini an nan Larisi a, John Sullivan, te mande pou otorite ris yo mennen yon ankèt imedyat, total e transparan, yon ankèt ki pou fe moun ki responsab anpwazonnman an rann kont pou zak yo a.
Sekretè laprès La Mezon Blanch la, Kayleigh McEnany, konsidere anpwazonnman Misye Navalny a kòm “yon zak totalman kondanab.” Madam McEnany ajoute:
“Larisi te itilize ajan chimik sa a deja nan le pase, e n ap travay avèk alye nou yo, avèk kominote entènasyonal la pou n fè responsab yo nan Larisi rann kont pou zak yo a, kèlkeswa kote prèv yo va mennen e nou pral bloke lajan yo konn itilize pou yo mennen aktivite yo. Pèp ris la gen dwa pou l eksprime opinyon li pasifikman san li pa bezwen pè okenn tip zak reprezay, e sitou pa yon anpwazonnman ak ajan chimik.”
Sekretè Jeneral l’OTAN an, Jens Stoltenberg –ki ensiste sou nesesite pou zak sa a jwenn yon repons kolektif- fè konnen alye l’OTAN yo “mete tèt yo ansanm pou yo kondane atak efrayik sa a sou Misye Navalny, e yo lanse apèl bay Larisi pou l patisipe nan yon ankèt entènasyonal san paspouki, pou detèmine sikonstans tantativ asasina sa a epi mete men sou reponsab yo.”
Minis Afè Etranjè gwoup G-7 la, yo menm tou, pibliye yon deklarasyon ekri kote yo mande Larisi montre transparans, yon fason ijan e total, sou kesyon pou konnen kilès ki responsab atak ak anpwazonnman sa a ki tèlman revòltan, pandan yo santre atansyon yo sou angajman Larisi te pran, nan kad Konvansyon sou Zam Chimik yo, pou l trennen responsab yo devan lajistis. Gwoup G-7 la fè konnen:
“Atak sa a ke yo lanse sou lidè opozisyon an, Navalny, se yon lòt kou grav pou demokrasi ak pliralite politik nan Larisi. Nou pral kontinye suiv de prè fason Larisi pral reponn tout apèl entènasyonal ki mande yon eksplikasyon pou anpwazonman efrayik Misye Navalny an.”
Sekretè Deta Mike Pompeo reprann pozisyon G-7 la lè l deklare: “Atak sa a vyole totalman prensip entènasyonal ki entèdi itilizasyon zam konsa.”
Sete yon editoryal ki t ap ba nou opinyon gouvènman ameriken an.