Accessibility links

Breaking News

បទវិចារណកថា៖ ការជំរុញ​ឲ្យ​មេដឹកនាំ​រដ្ឋប្រហារ​យោធា​មីយ៉ាន់ម៉ា​និង​ក្រុម​គ្រួសារ​ពួកគេ ទទួល​ខុស​ត្រូវ​ចំពោះ​មុខ​ច្បាប់


រូបឯកសារ៖ ក្រុមអ្នកតវ៉ា កាន់ទង់ជាតិ​នៅពេល​ពួកគេ​បើកម៉ូតូ​ក្នុង​​អំឡុង​ពេល​ធ្វើ​បាតុកម្ម​ប្រឆាំងនឹង​រដ្ឋប្រហារ​នៅ​ប្រទេស​មីយ៉ាន់ម៉ា កាលពី​ថ្ងៃព្រហស្បតិ៍ ទី២៥ ខែមីនា ឆ្នាំ២០២១។

តទៅនេះ គឺជា​បទ​វិចារណកថា​ដែល​ឆ្លុះ​បញ្ចាំង​អំពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

អស់​រយៈពេល​ជា​ច្រើន​សប្ដាហ៍​កន្លង​មក​នេះ ប្រជាពលរដ្ឋ​មីយ៉ាន់ម៉ា​បាន​ចេញ​តវ៉ា​តាម​ដង​ផ្លូវ​ដោយ​សន្តិវិធី និង​ទាមទារ​ឲ្យ​ប្រទេស​មីយ៉ាន់ម៉ា​វិល​ទៅ​រក​ការ​គ្រប់គ្រង​តាម​បែប​ប្រជាធិបតេយ្យ​របស់​រដ្ឋាភិបាល​ជាប់​ឆ្នោត​ឡើង​វិញ ក៏​ដូចជា​ទាមទារ​នូវ​សិទ្ធិ​ និង​សេរីភាព​ជា​មូលដ្ឋាន​នៃ​ការ​ជួបជុំ​និង​ការ​បញ្ចេញ​មតិ​ដោយ​សន្តិវិធី និង​នីតិរដ្ឋ។

ជា​ការ​ឆ្លើយតប​ទៅ​នឹង​ការ​តវ៉ា​នេះ កង​កម្លាំង​សន្តិសុខ​មីយ៉ាន់ម៉ា​បាន​ធ្វើ​តាម​បញ្ជា​របស់​មេដឹកនាំ​យោធា ដោយ​បាន​ចាប់​ដាក់​ឃុំ​ដោយ​ខុស​ច្បាប់​និង​វាយ​ប្រហារ​ដ៏​ឃោរឃៅ​លើ​អ្នក​តវ៉ា​គ្មាន​អាវុធ និង​អ្នក​កាសែត និង​បាន​សម្លាប់​មនុស្ស​យ៉ាង​តិច ១២៦ នាក់ តាំងពី​ថ្ងៃ​ធ្វើ​រដ្ឋប្រហារ​នៅ​ថ្ងៃ​ទី១ ខែ​កុម្ភៈ​មក។

រដ្ឋមន្ត្រី​ការបរទេស​សហរដ្ឋ​អាមេរិក​លោក Antony Blinken បាន​បញ្ជាក់​នៅ​ក្នុង​សេចក្ដី​ថ្លែងការណ៍​មួយ​ថា៖ «យើង​ថ្កោលទោស​ការ​វាយ​ប្រហារ​ដ៏​ឃោរឃៅ​ទាំង​នេះ។ យើង​ថ្កោលទោស​ការ​បន្ត​ចាប់​ខ្លួន​និង​ឃុំ​ខ្លួន​មនុស្ស​ជាង ១.៧០០ នាក់ ដែល​មាន​តាំង​ពី​មេដឹកនាំ​នយោបាយ វេជ្ជបណ្ឌិត អ្នក​ការពារ​សិទ្ធិ​មនុស្ស អ្នក​កាសែត មេដឹកនាំ​សហជីព រហូត​ដល់​ពលរដ្ឋ​សាមញ្ញ​ដែល​អនុវត្ត​សិទ្ធិ​របស់​ពួកគេ។ ហើយ​យើង​ថ្កោលទោស​ថ្នាក់​ដឹកនាំ​យោធា​ដែល​បាន​អនុញ្ញាត​ឲ្យ​មាន​អំពើ​ហិង្សា​នេះ​កើត​ឡើង​ប្រឆាំង​នឹង​ប្រជាពលរដ្ឋ​របស់​ខ្លួន»។

សហរដ្ឋ​អាមេរិក​ ប្ដេជ្ញា​ចាត់​វិធានការ​បន្ថែម​ដើម្បី​ជំរុញ​ឲ្យ​មាន​ការ​ទទួល​ខុស​ត្រូវ​សម្រាប់​អ្នក​ដែល​ទទួល​ខុសត្រូវ​លើ​ការ​ធ្វើ​រដ្ឋ​ប្រហារ​នេះ និង​ដើម្បី​ដាក់​គោលដៅ​ទណ្ឌកម្ម​លើ​អ្នក​ណា​ដែល​ទទួល​ប្រយោជន៍​ផ្នែក​ហិរញ្ញវត្ថុ​ពី​ទំនាក់ទំនង​របស់​ពួកគេ​ជាមួយ​នឹង​របប​យោធា។

លោក​រដ្ឋមន្ត្រី Blinken បាន​ប្រកាស​ថា សហរដ្ឋ​អាមេរិក​បាន​កំណត់​ដាក់​ទណ្ឌកម្ម​លើ​កូន​ពេញ​វ័យ​ពីរ​នាក់​របស់​អគ្គមេបញ្ជាការ​កងទ័ព​មីយ៉ាន់ម៉ា​លោក Min Aung Hlaing ដែល​មាន​ឈ្មោះ Aung Pyae Sone និង Khin Thiri Thet Mon ក៏​ដូចជា​អង្គភាព​ចំនួន ៦ ផ្សេង​ទៀត​ដែល​ជា​កម្មសិទ្ធិ ឬ​ក៏​គ្រប់គ្រង​ដោយ​បុគ្គល​ទាំង​នេះ ស្រប​តាម​បទ​បញ្ជា​នីតិ​ប្រតិបត្តិ​លេខ ១៤០១៤។

បុគ្គល​ឈ្មោះ Aung Pyae Sone និង Khin Thiri Thet Mon បាន​ប្រើ​ទំនាក់ទំនង​របស់​ពួកគេ​ជា​យូរ​មក​ហើយ​ជាមួយ​នឹង​លោក Min Aung Hlaing ដើម្បី​ប្រយោជន៍​ផ្ទាល់​ខ្លួន។

លោក​រដ្ឋមន្ត្រី Blinken បាន​និយាយ​ថា៖ «មេដឹកនាំ​រដ្ឋប្រហារ និង​សមាជិក​ពេញ​វ័យ​នៃ​ក្រុម​គ្រួសារ​របស់​ពួកគេ មិន​គួរ​មាន​លទ្ធភាព​បន្ត​ទាញ​យក​ប្រយោជន៍​ពី​របប​យោធា​នោះ​ទេ នៅ​ពេល​ដែល​របប​នេះ​ប្រើ​អំពើ​ហិង្សា​និង​ពង្រឹង​ការ​ត្រួតត្រា​តឹងរ៉ឹង​របស់​ខ្លួន​លើ​លទ្ធិ​ប្រជាធិបតេយ្យ»។

លោក​រដ្ឋមន្ត្រី Blinken បាន​បន្ថែម​ថា៖ «យើង​នឹង​បន្ត​ធ្វើការ​ជាមួយ​នឹង​សម្ព័ន្ធភាព​ដ៏​ទូលំទូលាយ​នៃ​ដៃគូ​អន្តរជាតិ​នានា ដើម្បី​ជំរុញ​ឲ្យ​មាន​ការ​ទទួល​ខុស​ត្រូវ​សម្រាប់​មេដឹកនាំ​រដ្ឋប្រហារ អ្នក​ដែល​ទទួល​ខុស​ត្រូវ​ចំពោះ​អំពើ​ហិង្សា​នេះ​និង​ការ​រំលោភ​បំពាន​ផ្សេងៗ និង​អ្នក​ដែល​ទទួល​បាន​ប្រយោជន៍​ផ្នែក​ហិរញ្ញវត្ថុ​ពី​របប​យោធា​នេះ»។

ការ​ដាក់​ទណ្ឌកម្ម​ទាំង​នេះ​គឺ​សំដៅ​លើ​អ្នក​ណា​ដែល​ទទួល​ខុស​ត្រូវ​លើ​ការ​ធ្វើ​រដ្ឋប្រហារ មិន​មែន​លើ​ប្រជាពលរដ្ឋ​មីយ៉ាន់ម៉ា​នោះ​ទេ។

សហរដ្ឋ​អាមេរិក ​អំពាវនាវ​ដល់​សហគមន៍​អន្តរជាតិ​ឲ្យ​រួម​គ្នា​ជា​សំឡេង​មួយ​ដើម្បី​គាំទ្រ​ប្រជាពលរដ្ឋ​មីយ៉ាន់ម៉ា​ដែល​នៅ​បន្ត​បង្ហាញ​ភាព​ក្លាហាន​និង​ការ​តាំងចិត្ត​របស់​ពួកគេ​នៅ​ក្នុង​ការ​ប្រឹងប្រែង​ប្រឆាំង​នឹង​របប​យោធា​នេះ បើ​ទោះបីជា​កង​កម្លាំង​សន្តិសុខ​មីយ៉ាន់ម៉ា​បាន​ប្រើ​អំពើ​ហិង្សា​មក​លើ​ពួកគេ​ក៏ដោយ។

លោក​រដ្ឋមន្ត្រី Blinken បាន​ជំរុញ​ឲ្យ «យោធា [មីយ៉ាន់ម៉ា] ស្ដារ​ឡើង​វិញ​នូវ​រដ្ឋាភិបាល​ជាប់​ឆ្នោត​តាម​បែប​ប្រជាធិបតេយ្យ បញ្ឈប់​ការ​វាយ​ប្រហារ​ទាំង​អស់​លើ​អ្នក​តវ៉ា​ដោយ​សន្តិវិធី ដោះលែង​ជា​បន្ទាន់​នូវ​អ្នក​ជាប់​ឃុំ​ដោយ​អយុត្តិធម៌​ទាំង​អស់ និង​បញ្ឈប់​ការ​វាយ​ប្រហារ​និង​ការ​គំរាមកំហែង​លើ​អ្នក​កាសែត មន្ត្រី​រដ្ឋការ និង​សកម្មជន​នានា»៕

XS
SM
MD
LG