តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ថ្នាំញៀន Fentanyl ដែលត្រូវបានគេជួញដូរចូលព្រំដែនភាគខាងត្បូងសហរដ្ឋអាមេរិក ជាដើមហេតុជាង៦៣ភាគរយនៃករណីការស្លាប់មនុស្ស ៩៦.៧៧៩ នាក់ដោយសារការប្រើថ្នាំហួសចំណុះនៅក្នុងសហរដ្ឋអាមេរិកនៅចន្លោះខែមីនា ឆ្នាំ២០២០ដល់ឆ្នាំ២០២១។ ដើម្បីទប់ស្កាត់ការហូរចូលថ្នាំញៀនក្នុងសហរដ្ឋអាមេរិក សហរដ្ឋអាមេរិក បានតាំងចិត្តដល់កិច្ចខំប្រឹងប្រែងរបស់រដ្ឋាភិបាលទាំងមូលដើម្បីកាត់បន្ថយតម្រូវការរបស់សហរដ្ឋអាមេរិក ហើយនឹងធ្វើការប្រយុទ្ធប្រឆាំងឧក្រិដ្ឋកម្មនៃការជួញដូរថ្នាំញៀន និងឧក្រិដ្ឋកម្មជួញដូរដែលមានការចាត់តាំងទូទាំងសាកលលោក និងនៅក្នុងប្រទេសម៉ិកស៊ិក។
កាលពីពេលថ្មីៗនេះ ក្រសួងការបរទេស បានប្រកាសផ្តល់រង្វាន់ជាប្រាក់រហូតដល់៥លានដុល្លារ ចំពោះព័ត៌មានដែលនាំឲ្យមានការចាប់ខ្លួន ឬកាត់ទោសអ្នកជួញដូរថ្នាំញៀន៤នាក់ដែលកំពុងប្រតិបត្តិការនៅក្នុងរដ្ឋ Chihuahua និង Sinaloa នៃប្រទេសម៉ិកស៊ិក។ Aureliano Guzman-Loera ដែលជាបងប្អូនប្រុសរបស់ Joanquin Guzman-Leora អតីតមេដឹកនាំក្រុមជួញដូរថ្នាំញៀន Sinaloa Cartel ហើយនឹងបងប្អូនប្រុស Ruperto Salgueiro-Nevarez, Jose Salgueiro-Nevarez, និង Heriberto Salgueiro-Nevarez សុទ្ធតែប្រតិបត្តិការនៅក្រោមអង្គការមេ គឺសហព័ន្ធក្រុមជួញដូរថ្នាំញៀន Sinaloa Cartel។
Aureliano Guzman-Leora និងក្រុមបងប្អូនប្រុស Salgueiro-Nevarez បានរងការចោទប្រកាន់ពីការរំលោភច្បាប់ប្រឆាំងនឹងថ្នាំញៀនសហរដ្ឋអាមេរិក រួមទាំងការឃុបឃិតអន្តរជាតិដើម្បីចែកចាយកញ្ឆា ថ្នាំញៀនកូកាអ៊ីន Methamphetamine និង Fentanyl ផងដែរ។
រង្វាន់នេះ បានបន្ថែមលើសេចក្តីប្រកាសនៃការចោទប្រកាន់របស់ក្រសួងយុត្តិធម៌លើ Aureliano Guzman-Loera និងបងប្អូនប្រុស៣នាក់ទៀតត្រកូល Salgueiro-Nevarez ចំពោះការរំលោភច្បាប់ការជួញដូរថ្នាំញៀនអន្តរជាតិណាកូទិក។
រង្វាន់នេះ ត្រូវបានផ្តល់ឲ្យនៅក្រោមកម្មវិធីការផ្តល់រង្វាន់ជូនចំពោះការប្រឆាំងនឹងការជួញដូរថ្នាំញៀនណាកូទិករបស់ក្រសួងការបរទេស។ ឧក្រិដ្ឋជន និងអ្នកជួញដូរថ្នាំញៀនណាកូទិកសំខាន់ៗចំនួន៧៥នាក់ បានត្រូវនាំខ្លួនទៅកាន់តុលាការនៅក្រោមកម្មវិធីការផ្តល់រង្វាន់ប្រឆាំងនឹងការជួញដូរថ្នាំញៀនណាកូទិក និងកម្មវិធីឧក្រិដ្ឋកម្មការជួញដូរថ្នាំញៀនឆ្លងដែន ដែលមានការចាត់តាំងចាប់តាំងពីឆ្នាំ១៩៨៦ មក។ ក្រសួងការបរទេស បានបង់ប្រាក់ជាង ១៣៥ លានដុល្លារដែលជារង្វាន់សម្រាប់ព័ត៌មានដែលនាំឲ្យមានការចាប់ខ្លួននេះ។
ការិយាល័យកិច្ចការថ្នាំញៀនណាកូទិកអន្តរជាតិនិងពង្រឹងច្បាប់ បានរៀបចំចាត់ចែងកម្មវិធីផ្តល់រង្វាន់ថ្នាំញៀនណាកូទិកនេះ ដោយមានការសម្របសម្រួលដ៏ជិតស្និទ្ធជាមួយរដ្ឋបាលប្រឆាំងគ្រឿងញៀន ការិយាល័យសហព័ន្ធស៊ើបអង្កេត ការិយាល័យស៊ើបអង្កេតសន្តិសុខមាតុភូមិនៃទីភ្នាក់ងារពង្រឹងច្បាប់អន្តោប្រវេសន៍និងគយសហរដ្ឋអាមេរិក និងទីភ្នាក់ងារផ្សេងៗទៀតរបស់រដ្ឋាភិបាលសហរដ្ឋអាមេរិក។ សកម្មភាពទាំងនេះ បង្ហាញថា ការតាំងចិត្តរបស់ក្រសួងដើម្បីគាំទ្រកិច្ចខំប្រឹងប្រែងពង្រឹងច្បាប់ដើម្បីនាំយកឧក្រិដ្ឋជនជួញដូរថ្នាំញៀនអន្តរជាតិឡើងតុលាការ៕
