តទៅនេះ ជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ជាលើកដំបូងក្នុងពេល២០ឆ្នាំដែលការជឿនលឿនទៅកាន់ការបញ្ឈប់ពលកម្មកុមារមានជំហានថយក្រោយ។ លោកស្រី Thea Lee អនុរដ្ឋលេខាធិការក្រសួងការងារសម្រាប់កិច្ចការអន្តរជាតិបាននិយាយថា៖ «ជាសាកល ពលកម្មកុមារកំពុងកើនឡើង មិនមែនចុះថយទេ។ នៅចន្លោះឆ្នាំ២០១៦ និងឆ្នាំ២០២០ ចំនួនកុមារក្នុងពលកម្មកុមារសាកលបានកើនឡើងពី១៥២លាននាក់ ទៅ១៦០លាននាក់»។
លោកស្រី Lee បាននិយាយថា៖ «តួលេខទាំងនេះមានរហូតដល់ដើមឆ្នាំ២០២០ ហើយយើងដឹងថា ជំងឺកូវីដ១៩បានធ្វើឱ្យបញ្ហានេះអាក្រក់ជាងមុន ដែលបានជំរុញគ្រួសារឱ្យធ្លាក់ក្នុងភាពក្រីក្រ ហើយបានបង្អាក់សេដ្ឋកិច្ចនិងសង្វាក់ផ្គត់ផ្គង់ ហើយក៏បានដាក់ក្រុមកុមារច្រើនជាងមុនឱ្យស្ថិតនៅក្នុងហានិភ័យកាន់តែខ្លាំងផងដែរ»។
បើតាមអង្គការពលកម្មអន្តរជាតិថា ក្នុងបណ្តាកុមារ១៦០លាននាក់ មានកុមារជាង៧២លាននាក់រស់នៅក្នុងតំបន់ខាងត្បូងសមុទ្រខ្សាច់សាហារ៉ាក្នុងទ្វីបអាហ្វ្រិក។
កុមារច្រើននាក់មិនបានទទួលការសិក្សាអប់រំទេ ហើយធ្វើការក្នុងស្ថានភាពមានគ្រោះថ្នាក់ ជាក្រុមទាហានកុមារ ជាកម្មករអណ្តូងរ៉ែ cobalt ជាអ្នកធ្វើការក្នុងចម្ការកាកាវ។ កុមារខ្លះត្រូវបានគេចាត់ទុកស្ទើរតែដូចជាទាសករអ៊ីចឹង។ កុមារខ្លះទៀតត្រូវបានល្បួងដោយការក្លែងបន្លំឱ្យទៅធ្វើការងារមានគ្រោះថ្នាក់និងមិនសមរម្យ។
ថ្លែងនៅក្នុងសន្និសីទសាកលដើម្បីកម្ចាត់ពលកម្មកុមារលើកទី៥កាលពីពាក់កណ្តាលខែឧសភា លោកស្រីអនុរដ្ឋមន្ត្រី Lee បាននិយាយថា នេះជាពេលវេលាមានវិបត្តិមួយ។ លោកស្រីបានមានប្រសាសន៍ថា៖ «យើងដឹងថា ក្រុមពលករជាកុមារនិងក្រុមពលករពេញវ័យក្នុងការធ្វើការងារដោយបង្ខំជាញឹកញយមិនសូវត្រូវគេឃើញទេ»។
លោកស្រី Lee បានពោលថា៖ «ពលករទាំងនេះជាច្រើនមិនងាយត្រូវប្រទះដោយក្រុមនិយ័តករទេ។ ពួកគេធ្វើការនៅតាមផ្ទះ នៅក្នុងអណ្តូងរ៉ែ ឬនៅក្នុងស្រែចម្ការដែលក្រុមអធិការការងារមិនសូវបានទៅជួបទេ ហើយដែលស្ថិតនៅផ្នែកទាបបំផុតនៃសង្វាក់ផ្គត់ផ្គង់សាកល ហើយពួកអ្នកប្រើប្រាស់គ្រឿងឧបភោគបរិភោគដែលទិញផលិតកម្មរបស់ពួកគេមិនបានឃើញពលករទាំងនេះឡើយ»។
លោកស្រីអនុរដ្ឋលេខាធិការ Lee បាននិយាយថា រដ្ឋាភិបាលសហរដ្ឋអាមេរិកមានរបៀបដោះស្រាយចម្រុះដល់បញ្ហានេះ។ លោកស្រីបានថ្លែងថា៖ «យើងប្រើការសិក្សាស្រាវជ្រាវនិងការរាយការណ៍របស់យើង តែយើងក៏មានការពង្រឹងពាណិជ្ជកម្មនិងការតាមឃ្លាំមើលផងដែរ។ យើងប្រើគម្រោងការជំនួយ...ហើយយើងមានទំនាក់ទំនងពហុភាគីនិងការទូតខាងពលកម្មដើម្បីដោះស្រាយបញ្ហាទាំងនេះ... ដោយអាចតាមដានអ្វីដែលកើតមានឡើងនិងអំពីកន្លែងដែលទំនិញត្រូវដឹកជញ្ជូនទៅកាន់សង្វាក់ផ្គត់ផ្គង់សាកល ជាឧបករណ៍សំខាន់ក្នុងការប្រយុទ្ធដើម្បីបញ្ឈប់ការកេងប្រវ័ញ្ចពលកម្ម»។
លោកស្រី Lee បានថ្លែងថា៖ «យើងពិនិត្យមើលសង្វាក់ផ្គត់ផ្គង់សំខាន់ៗ ដូចជាកាកាវពីតំបន់ខាងលិចនៃទ្វីបអាហ្វ្រិក លោហធាតុគូប័ល (cobalt) ពីសាធារណរដ្ឋប្រជាធិបតេយ្យកុងហ្គោ polysilicon ពីប្រទេសចិនដែលជាសារធាតុសំខាន់សម្រាប់ផលិតបន្ទះកញ្ចក់ស្រូបយកពន្លឺអាទិត្យ និងវត្ថុឯទៀតៗ»។
លោកស្រី Lee បាននិយាយថា៖ «ពលកម្មកុមារជាទម្រង់មួយនៃការរំលោភលើកុមារ។ វាជាការងាររបស់រដ្ឋាភិបាលនានា ដើម្បីធ្វើឱ្យប្រាកដថា គ្មាននរណាអាចទាញយកផលប្រយោជន៍ពីការកេងប្រវ័ញ្ចកុមារ ពីព្រោះនេះជាឧក្រិដ្ឋកម្មដ៏សាហាវយង់ឃ្នងមួយ»៕
