តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ដប់ឆ្នាំបានកន្លងផុតទៅហើយ ចាប់តាំងពីការចេញផ្សាយរបាយការណ៍របស់គណៈ កម្មការស៊ើបអង្កេតសិទ្ធិមនុស្សនៃអង្គការសហប្រជាជាតិនៅសាធារណរដ្ឋប្រជាធិប តេយ្យប្រជាមានិតកូរ៉េ។ របាយការណ៍នេះបានចងក្រងជាឯកសារភស្តុតាងនៃការរំ លោភសិទ្ធិមនុស្សជាប្រព័ន្ធ ការរីករាលដាល និងការរំលោភសិទ្ធិមនុស្សយ៉ាងច្បាស់ក្រឡែតនិងមិនអាចទទួលយកបានដោយកូរ៉េខាងជើង។ ក្នុងរបាយការណ៍នោះបានអះអាងថា កូរ៉េខាងជើងបានប្រព្រឹត្តអំពើរំលោភសិទ្ធិមនុស្ស និងការរំលោភបំពានដែលស្មើនឹងឧក្រិដ្ឋកម្មប្រឆាំងមនុស្សជាតិ។
ជាអកុសល មួយទសវត្សរ៍ក្រោយមក ការរំលោភសិទ្ធិមនុស្សនៅតែកើតមានដដែល។ យោងតាមសេចក្តីថ្លែងការណ៍រួមរបស់សហរដ្ឋអាមេរិក ជប៉ុន និងកូរ៉េខាងត្បូង ក្នុងពិធីរំឭកខួបលើកទី១០នៃការចេញផ្សាយរបាយការណ៍របស់អង្គការសហប្រជាជាតិនេះថា កូរ៉េខាងជើងនៅតែជារបបគាបសង្កត់ខ្លាំងបំផុតមួយនៅក្នុងពិភពលោក ដោយដាក់ការរឹតត្បិតយ៉ាងខ្លាំងក្លាលើសេរីភាពនៃការបញ្ចេញមតិ ការជួបប្រមូលផ្តុំគ្នាដោយសន្តិវិធី សមាគម សាសនា ឬជំនឿ និងចលនា។ ការបំពាននិងការរំលោភបំពានទាំងនេះ ក៏ដូចជាទំនាក់ទំនងដែលមិនអាចបំបែកបានរវាងពួកគេ និងអាវុធប្រល័យលោក និងកម្មវិធីកាំជ្រួចផ្លោងខុសច្បាប់របស់កូរ៉េខាងជើង ត្រូវបានចងក្រងជាឯកសារយ៉ាងហ្មត់ចត់។
ការប្រើប្រាស់គោលនយោបាយចែកចាយស្បៀងអាហាររបស់កូរ៉េខាងជើង ដែលលម្អៀងទៅយោធា បាននាំឱ្យមានកង្វះអាហារូបត្ថម្ភរយៈពេលយូរក្នុងចំណោមពលរដ្ឋរបស់ខ្លួន។ ការបដិសេធសិទ្ធិមនុស្ស និងសេរីភាពជាមូលដ្ឋានយ៉ាងទូលំទូលាយនោះ អនុញ្ញាតិឱ្យកូរ៉េខាងត្បូងអាចចំណាយធនធានរបស់ខ្លួនដោយមិនកំណត់ដែលធនធានទាំងនោះភាគច្រើនបានមកពីសកម្មភាពតាមអ៊ីនធឺណែតខុសច្បាប់របស់ខ្លួន ហើយយកទៅចំណាយលើការអភិវឌ្ឍអាវុធប្រល័យលោក និងកម្មវិធីកាំជ្រួចផ្លោង។
កាលពីខែសីហាឆ្នាំមុន ក្នុងអំឡុងពេលដែលសហរដ្ឋអាមេរិកកាន់តំណែងជាប្រធានក្រុមប្រឹក្សាសន្តិសុខបានធ្វើសន្និសីទសារព័ត៌មានបើកចំហជាលើកដំបូងរបស់ខ្លួនចាប់ តាំងពីឆ្នាំ២០១៧ ស្តីពីស្ថានភាពសិទ្ធិមនុស្សនៅក្នុងប្រទេសកូរ៉េខាងជើង។ រដ្ឋសមាជិកចំនួន៥២ និងគណៈប្រតិភូសហភាពអឺរ៉ុបបានទាមទារឱ្យក្រុមប្រឹក្សាបន្តផ្តោតទៅលើការរំលោភសិទ្ធិមនុស្ស និងការរំលោភបំពានរបស់កូរ៉េខាងជើង។ សេចក្តីថ្លែងការណ៍រួមបាននិយាយថា «នៅឆ្នាំនេះ យើងនឹងធ្វើការដើម្បីធានាថា ក្រុមប្រឹក្សាសន្តិសុខនៅតែបន្តផ្តោតការយកចិត្តទុកដាក់ទៅលើបញ្ហាសន្តិភាព និងសន្តិសុខអន្តរជាតិនេះ»។
សហរដ្ឋអាមេរិក ជប៉ុន និងកូរ៉េខាងត្បូងបានអំពាវនាវឱ្យមាន«កិច្ចខិតខំប្រឹងប្រែងពង្រឹងឡើងវិញដើម្បីផ្តល់យុត្តិធម៌ដល់ជនរងគ្រោះនៃការរំលោភសិទ្ធិមនុស្ស និងការរំលោភបំពាននៅក្នុងប្រទេស[កូរ៉េខាងជើង]។ ហើយយើងជំរុញឱ្យ[កូរ៉េខាងជើង] គោរពតាមកាតព្វកិច្ចរបស់ខ្លួនក្រោមច្បាប់អន្តរជាតិ ចាត់វិធានការជាបន្ទាន់ដើម្បីបញ្ចប់ការរំលោភសិទ្ធិមនុស្ស និងការរំលោភបំពានទាំងអស់ រួមទាំងការដោះស្រាយជាបន្ទាន់នូវបញ្ហាពាក់ព័ន្ធនឹងការចាប់ពង្រត់ អ្នកជាប់ឃុំ និងអ្នកទោសសង្គ្រាមដែលមិនទាន់ធ្វើមាតុភូមិនិវត្តន៍ និងចូលរួមជាមួយអ្នកជំនាញសិទ្ធិមនុស្សរបស់អង្គការសហប្រជាជាតិដើម្បីសម្រេចគោលបំណងទាំងនោះ»។
សេចក្តីថ្លែងការណ៍រួមបានអំពាវនាវឱ្យរដ្ឋជាសមាជិកទាំងអស់ចូលរួមក្នុងការធ្វើឱ្យប្រទេសកូរ៉េខាងជើងទទួលខុសត្រូវចំពោះការរំលោភសិទ្ធិមនុស្ស និងការរំលោភបំពានរបស់ខ្លួនដោយការអនុវត្តអនុសាសន៍របស់គណៈកម្មការស៊ើបអង្កេតអង្គការសហប្រជាជាតិ៕
