តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ភេរវកម្មនិងឧក្រិដ្ឋកម្មមានការចាត់ចែងមានវត្តមានកាន់តែច្រើនជាងមុននៅទូទាំងទ្វីបអាហ្វ្រិក។ បើតាមអង្គការសហប្រជាជាតិក្រុមទាំងនេះមានប្រាក់កាស មួយផ្នែកដោយសារបានទាញយកអត្ថប្រយោជន៍ដោយខុសច្បាប់ពីធនធានធម្មជាតិក្នុងតំបន់ដែលពួកគេកាន់កាប់។ លោក Ghada Waly ប្រធានការិយាល័យអ.ស.ប.ខាងគ្រឿងញៀនស្រវឹងនិងឧក្រិដ្ឋកម្មបានកត់សម្គាល់ថា មានភ័ស្តុតាងថា ការទាញយកអត្ថប្រយោជន៍ដោយខុសច្បាប់នៃលោហធាតុនិងខនិជមានតម្លៃនាំឱ្យពួកជ្រុលនិយមបានទទួលប្រាក់កាសច្រើន។ ការជួញដូរសត្វព្រៃក៏ជាប្រភពធំមួយដែរនៃប្រាក់ចំណូលសម្រាប់ក្រុមទាំងនេះដែរ។ ពាណិជ្ជកម្មភ្លុកដំរីដោយខុសច្បាប់ក៏នាំឱ្យបានប្រាក់៤រយលានដុល្លារក្នុងមួយឆ្នាំៗ។
ឯកអគ្គរដ្ឋទូតស.រ.អ.ប្រចាំអ.ស.ប. លោកស្រី Linda Thomas Greenfield បាននិយាយថា ដើម្បីទប់ទល់នឹងសកម្មភាពទាំងនេះ យើងត្រូវផ្តោតការយកចិត្តទុកដាក់លើវិស័យសំខាន់ៗបី។ លោកស្រីបានថ្លែងថា «ទីមួយ នៅក្នុងបរិបទអាហ្វ្រិក វត្តមានរបស់ពួក al-Qa’ida និងពួកបុគ្គលនិងក្រុមមានទាក់ទិនជាមួយពួក ISIS ត្រូវតែមានការតាមឃ្លាំមើលដោយដិតដល់និងមានសកម្មភាពប្រឆាំងនឹងពួកទាំងនេះ»។
លោកស្រីបានមានប្រសាសន៍ថា៖ «ប្រាក់កាសនៅតែធ្វើឱ្យពួកភេរវជនមានសកម្មភាពតទៅទៀត។ យើងត្រូវតែពង្រឹងការប្រឹងប្រែងរបស់យើងតាមរកពួកហិរញ្ញិកនិងពួកអ្នកផ្តល់ប្រាក់កាសឱ្យពួកភេរវជន និងអង្គការភេរវកម្ម។ ហើយយើងត្រូវរារាំងលំហូរប្រភពធនធានដែលទាញយកអត្ថប្រយោជន៍ពីការត្រួតពិនិត្យតាមបទបញ្ញត្តិខ្សោយ»។
លោកស្រី Greenfield បាននិយាយថា«ទីពីរ កង្វល់បន្ទាន់និងកើនជាងមុនបំផុតនៅអាហ្វ្រិកគឺយុទ្ធសាស្ត្ររបស់ក្រុម Wagner គាំទ្រដោយអាជ្ញាធរវិមានក្រឹមឡាំងដែលទាញយកអត្ថប្រយោជន៍ពីធនធានធម្មជាតិនៅក្នុងសាធារណរដ្ឋអាហ្វ្រិកកណ្តាល ប្រទេសម៉ាលី និងប្រទេសស៊ូដង់ ព្រមទាំងប្រទេសឯទៀតៗផងដែរ»។
លោកស្រីបានថ្លែងថា៖ «សកម្មភាពទាំងនេះត្រូវបានប្រមូលចងក្រងជាឯកសារច្បាស់លាស់ហើយមិនអាចត្រូវបដិសេធបានទេ។ ហើយយើងដឹងថាការចំណេញមិនត្រឹមត្រូវតាមច្បាប់ទាំងនេះត្រូវបានយកទៅប្រើប្រាស់ដើម្បីផ្តល់ប្រាក់កាសដល់ម៉ាស៊ីនសង្គ្រាមរបស់រដ្ឋាភិបាលក្រុងមូស្គូនៅអាហ្វ្រិក មជ្ឈិមបូព៌ានិងប្រទេសអ៊ុយក្រែន។ ហើយដោយមិនមែនជាដៃគូមានតម្លាភាពខាងការកែលម្អសន្តិសុខ ក្រុម Wagner ទាញយកអត្ថប្រយោជន៍ពីពួករដ្ឋជាអតិថិជនដែលបង់សោហ៊ុយឱ្យពួកគេសម្រាប់សេវាសន្តិសុខជាមាស ពេជ្រ ឈើហ៊ុប និងធនធានធម្មជាតិឯទៀតៗ-ហើយនេះជាផ្នែកមួយនៃគម្រូនៃការរកស៊ីរបស់ក្រុម Wagner»។
ជាទីបញ្ចប់ ពួកប្រទេសជាសមាជិកអ.ស.ប.ត្រូវតែមានរបៀបដោះស្រាយសកម្មជាងមុនដើម្បីទប់ទល់នឹងពួក al-Qa’ida ក្រុម ISIS និងក្រុមឧក្រិដ្ឋជនឯទៀតៗនៅអាហ្វ្រិក។ ការដាក់ទណ្ឌកម្មលើរបបគ្រប់គ្រងដែលអត់ឱនសកម្មភាពបែបនេះ ឬជំរុញពួកគេឱ្យធ្វើសកម្មភាពបែបនេះមានសារៈសំខាន់ដើម្បីប្រយុទ្ធប្រឆាំងនឹងការជួញដូរធនធានធម្មជាតិ។
លោកស្រីឯកអគ្គរដ្ឋទូត Thomas Greenfield បានមានប្រសាសន៍ថា៖ «យើងទាំងអស់គ្នាមានផលប្រយោជន៍ក្នុងការទប់ទល់នឹងការជួញដូរធនធានធម្មជាតិដោយខុសច្បាប់នៅអាហ្វ្រិក ដែលជាការលួចធនធានពីប្រជារាស្ត្រនៃទ្វីបអាហ្វ្រិក។ វាជាអត្ថប្រយោជន៍របស់យើងក្នុងការបញ្ចៀសពួកអ្នកជួញដូរទាំងនេះកុំឱ្យធ្វើសកម្មភាពឧក្រិដ្ឋរបស់ពួកគេនិងប្រើប្រាស់ធនធានខុសច្បាប់របស់ពួកគេដើម្បីបញ្ឆេះសង្គ្រាមនិងភេរវកម្ម។ ហើយយើងចាំបាច់ត្រូវបញ្ចៀសកុំឱ្យខូចខាតបរិដ្ឋាន កុំឱ្យប្រើប្រាស់ពលកម្មកុមារ កុំធ្វើឱ្យពលរដ្ឋឃ្លាតចាកពីផ្ទះសំបែងពួកគេ រំលោភលើសិទ្ធិមនុស្ស និងការខាតបង់ចំណូលរបស់រដ្ឋាភិបាលដោយសារការជួញដូរខុសច្បាប់»៕
