តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ប្រទេសបេឡារុសជាសម្ព័ន្ធមិត្តជិតស្និទ្ធបំផុតមួយរបស់ប្រទេសរុស្ស៊ី។ របបគ្រប់គ្រងផ្តាច់ការរបស់លោក Aleksandr Lukashenko បានគ្រប់គ្រងប្រទេសនេះ២៨ឆ្នាំមកហើយ ហើយបានពឹងពាក់យ៉ាងច្រើនលើរុស្ស៊ីដើម្បីឱ្យមានជីវិតតទៅទៀត។
ប្រទេសរុស្ស៊ីបានផ្តល់ប្រាក់ជំនួយដល់សេដ្ឋកិច្ចខ្សោយនៃប្រទេសបេឡារុសច្រើនទសវត្សរ៍មកហើយតាមរយៈប្រាក់កម្ចីយកការប្រាក់ទាប និងការបញ្ចុះតម្លៃឧស្ម័ន និងប្រេងយ៉ាងច្រើន។ ដើម្បីបន្ថយផលប៉ះពាល់នៃការដាក់ទណ្ឌកម្មលើរបបគ្រប់គ្រង Lukashenko ដោយសមាជិកសហគមន៍អន្តរជាតិ រុស្ស៊ីបានផ្តល់ជំនួយហិរញ្ញវត្ថុជាថ្មីម្តងទៀត។
ចាប់តាំងពីពេលនោះមក បេឡារុសបានឃុបឃិតជាមួយការលុកលុយរបស់លោក Putin ក្នុងប្រទេសអ៊ុយក្រែន ដោយបានបម្រើការជាតំបន់ ដែលកងអង្គភាពរុស្ស៊ីបើកការវាយប្រហារ ពីផ្នែកខាងជើងនៃប្រទេសអ៊ុយក្រែន ព្រមទាំងបានផ្តល់ការគាំទ្រឯទៀតដល់កងយោធាអ៊ុយក្រែនផងដែរ។ មិនយូរប៉ុន្មាន ក្រោយការចាប់ផ្តើមសង្គ្រាមនេះ ការបោះឆ្នោតប្រជាមតិក្លែងបន្លំមួយបានដកអនុប្រយោគស្តីពីអព្យាក្រឹតភាពនៃប្រទេសបេឡារុស និងគោលដៅខ្លួនជាប្រទេសគ្មានអាវុធនុយក្លេអ៊ែរ ដោយបន្ថែមវិសោធនកម្មដែលពង្រីក និងពង្រឹងការក្តាប់អំណាចរបស់លោក Lukashenko។ លោក Lukashenko ថែមទាំងបានស្នើថា បេឡារុសអាចទទួលអាវុធនុយក្លេអ៊ែររុស្ស៊ីទៀតផង។
លោក Ned Price អ្នកនាំពាក្យនៃក្រសួងការបរទេសស.រ.អ. បាននិយាយថា «ប្រទេសបេឡារុស និងលោកប្រធានាធិបតី Lukashenko បានអនុញ្ញាតឱ្យលោកប្រធានាធិបតី Putin ចំអកដល់ឯករាជ្យនិងអធិបតេយ្យភាពនៃប្រទេសអ៊ុយក្រែន»។
លោក Price បាននិយាយថា៖ «ការណ៍នេះបានកើតមានឡើងមួយរយៈពេលមកហើយ នៅពេលដែលកងកម្លាំងរុស្ស៊ីបានចូលក្នុងប្រទេសបេឡារុស នៅពេលដែលកងកម្លាំងរុស្ស៊ីបានបើកការវាយប្រហារពីខាងក្នុងដែនដីបេឡារុសដែលមានអធិបតេយ្យភាព ដើម្បីធ្វើការវាយលុក ដែលបានរៀបចំទុកជាមុន និងគ្មានមូលហេតុត្រឹមត្រូវ និងគ្មានការបង្ករឿងប្រឆាំងនឹងប្រទេសទីបី»។
សេចក្តីសម្រេចរបស់លោក Lukashenko ក្នុងការគាំទ្រ និងការសម្រួលអំពើឈ្លានពានរបស់រដ្ឋាភិបាលម៉ូស្គូប្រឆាំងនឹងអ៊ុយក្រែនជាការជំទាស់នឹងមនោសញ្ចេតនារបស់ប្រជារាស្ត្របេឡារុស។ បើតាមអង្គការ Chatham House ដែលជាវិទ្យាស្ថានគោលនយោបាយឯករាជ្យមានមូលដ្ឋាននៅក្រុងឡុងដ៍ថា ជនជាតិបេឡារុស៧៩ភាគរយ យល់ថា ទាហានបេឡារុសមិនគួរស្លាប់ក្នុងសង្គ្រាមរបស់លោក Putin ជាមួយអ៊ុយក្រែនទេ។ ជនជាតិបេឡារុសជាងពាក់កណ្តាលយល់ថា បេឡារុសគួរឋិតនៅអព្យាក្រឹត។
លោក Price បានថ្លែងថា៖«បេឡារុស...បានចុះញ៉មរុស្ស៊ីខ្លាំងជាងមុន ដែលបង្ហាញទៀតអំពីបំណងរបស់ប្រធានាធិបតី Lukashenko ក្នុងការធ្វើសកម្មភាពប្រឆាំងនឹងផលប្រយោជន៍របស់ប្រជារាស្ត្រផ្ទាល់របស់លោក ដើម្បីឱ្យបានការអនុគ្រោះពីរដ្ឋាភិបាលមូស្គូ ហើយដើម្បីឱ្យលោកបានកាន់អំណាចតទៅទៀត»។
អ្នកនាំពាក្យ Price បានថ្លែងថា៖ «ជាលទ្ធផលនៃការគាំទ្រនិងការសម្រួលរបស់របបគ្រប់គ្រងនេះដល់អ្វីដែលយើងឃើញពួករុស្ស៊ីកំពុងធ្វើក្នុងអ៊ុយក្រែន យើងដាក់ទណ្ឌកម្មលើបុគ្គល និងអង្គភាពបេឡារុសប្រមាណជាងម្ភៃ។ សកម្មភាពទាំងនេះផ្តោតលើវិស័យការពារប្រទេសបេឡារុសនិងផ្នែកសម្ភារៈនិងហិរញ្ញវត្ថុផង ដែលមានទំនាក់ទំនង ជិតស្និទ្ធជាមួយរុស្ស៊ី»។
អ្នកនាំពាក្យលោក Price បានពោលទៀតថា៖ «យើងបានឃើញថា ប្រធានាធិបតី Lukashenko បានផាត់ចោលឆន្ទៈរបស់ប្រជារាស្ត្រលោកផ្ទាល់ ហើយបានចូលដៃជាមួយលោកប្រធានាធិបតី Putin និងគោលដៅយោធារបស់លោកប្រឆាំងនឹងអ៊ុយក្រែន។ ប្រសិនបើការណ៍នេះមានតទៅទៀត បេឡារុសនឹងប្រឈមតទៅទៀតនឹងវិធានការដែលនាំឱ្យមានការទទួលខុសត្រូវខ្ពស់»៕
