តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កាលពីពេលថ្មីៗនេះ រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ចប់ដំណើរទស្សនកិច្ចលើកទីបួនរបស់លោកទៅកាន់តំបន់មជ្ឈិមបូព៌ា ចាប់តាំងពីការវាយប្រហារដ៏រន្ធត់ដោយក្រុមហាម៉ាស់ប្រឆាំងនឹងអ៊ីស្រាអែលកាលពីថ្ងៃទី៧ ខែតុលា ឆ្នាំ ២០២៣។ ក្នុងជំនួបជាមួយថ្នាក់ដឹកនាំ លោកបានសង្កត់ធ្ងន់ពីសារៈសំខាន់នៃការទប់ស្កាត់ជម្លោះកុំឱ្យរីករាលដាល។
លោកបានថ្លែងយ៉ាងដូច្នេះថា៖ «យើងមានការប្តេជ្ញាចិត្តរួមមួយដើម្បីធានាថាជម្លោះមិនរីកធំឡើង ហើយខ្ញុំគិតថា យើងក៏មានការប្តេជ្ញាចិត្តរួមដើម្បីប្រើប្រាស់ឥទ្ធិពល ទំនាក់ទំនង ចំណងទាក់ទងដែលយើងមានជាមួយភាគីផ្សេងៗនៅក្នុងតំបន់ដើម្បីព្យាយាមបញ្ចៀសការកើនឡើងនិងរារាំងការបើកសមរភូមិថ្មី។ នេះមិនមែនគ្រាន់តែជាបញ្ហាក្នុងតំបន់ប៉ុណ្ណោះទេ។ វាជាបញ្ហានៃការព្រួយបារម្ភជាសកល»។
លោករដ្ឋមន្រ្តី Blinken បានពិភាក្សាថាតើត្រូវការពារជនស៊ីវិលនៅតំបន់ហ្កាហ្សានិងដើម្បីផ្តល់ជំនួយមនុស្សធម៌បន្ថែមទៀតដល់ពួកគេយ៉ាងដូចម្តេច។ លោកក៏បាននិយាយអំពីរបៀបរំដោះចំណាប់ខ្មាំងដែលនៅសល់ផងដែរ។
ជាការពិត លោករដ្ឋមន្រ្តី Blinken បានរំឭកឡើងវិញនូវការប្តេជ្ញាចិត្តរបស់សហរដ្ឋអាមេរិកក្នុងការឃើញចំណាប់ខ្មាំងទាំងអស់ត្រូវបានដោះលែង។
លោក Blinken បានថ្លែងយ៉ាងដូច្នេះថា៖ «ចំពោះអ្នកដែលត្រូវបានគេចាប់ធ្វើជាចំណាប់ខ្មាំងនៅឡើយ ចំពោះមនុស្សជាទីស្រលាញ់របស់ពួកគេ ចំពោះគ្រួសាររបស់ពួកគេ ខ្ញុំសូមសន្យាចំពោះអ្នកយ៉ាងដូច្នេះថា៖ សហរដ្ឋអាមេរិកនឹងបន្តធ្វើការដោយមិនឈប់ឈរ ដើម្បីនាំអ្នកមកផ្ទះវិញ ដើម្បីនាំអ្នកមកជួបជុំជាមួយគ្រួសារវិញ ហើយនឹងមនុស្សជាទីស្រលាញ់របស់អ្នកវិញ»។
លោករដ្ឋមន្រ្តី Blinken បាននិយាយថា មានវឌ្ឍនភាពលើការបង្កើនជំនួយចូលទៅក្នុងតំបន់ហ្កាហ្សា ប៉ុន្តែវានៅតែមិនគ្រប់គ្រាន់ដើម្បីបំពេញតម្រូវការដ៏ធំនៅឡើយទេ។ «យើងបន្តលើកឡើងអំពីរឿងនេះជាមួយអ៊ីស្រាអែលអំពីតម្រូវការដើម្បីធ្វើអ្វីៗគ្រប់យ៉ាងដែលអាចធ្វើទៅបានដើម្បីជួយសម្រួលដល់ការផ្តល់ជំនួយមនុស្សធម៌ទៅក្នុងតំបន់ហ្កាហ្សា»។
លោករដ្ឋមន្រ្តី Blinken បាននិយាយថា នៅពេលដែលអ៊ីស្រាអែលឈានទៅដល់ដំណាក់កាលដែលមានប្រតិបត្តិការយោធារបស់ខ្លួនតិចជាងមុននៅភាគខាងជើង អង្គការសហប្រជាជាតិក៏អាចដើរតួនាទីយ៉ាងសំខាន់ក្នុងការវាយតម្លៃនូវអ្វីដែលត្រូវធ្វើដើម្បីអនុញ្ញាតឱ្យពលរដ្ឋប៉ាឡេស្ទីនដែលខ្ចាត់ព្រាត់អាចត្រឡប់ទៅផ្ទះវិញបានផងដែរ។
លោក Blinken បានថ្លែងថា៖ «ជនស៊ីវិលប៉ាឡេស្ទីនត្រូវតែអាចត្រឡប់ទៅផ្ទះវិញបានឆាប់តាមលក្ខខណ្ឌអនុញ្ញាត។ ពួកគេមិនអាចនិងមិនត្រូវបង្ខំឱ្យចាកចេញពីតំបន់ហ្កាហ្សាឡើយ។ យើងច្រានចោលសេចក្តីថ្លែងការណ៍របស់រដ្ឋមន្ត្រី និងសមាជិកសភាអ៊ីស្រាអែលមួយចំនួនដែលអំពាវនាវឱ្យមានការតាំងទីលំនៅថ្មីរបស់ជនជាតិប៉ាឡេស្ទីននៅខាងក្រៅតំបន់ហ្កាហ្សា។ សេចក្តីថ្លែងការណ៍ទាំងនេះ គឺគ្មានការទទួលខុសត្រូវ វាមានលក្ខណៈបង្ករឿង ហើយពួកគេគ្រាន់តែធ្វើឱ្យវាពិបាកក្នុងការធានាអំពីអនាគតនៃតំបន់ហ្កាហ្សាដែលដឹកនាំដោយប៉ាឡេស្ទីនដោយគ្មានក្រុមហាម៉ាស់គ្រប់គ្រង ហើយដោយគ្មានក្រុមភេរវជនមកគំរាមកំហែងដល់សន្តិសុខរបស់អ៊ីស្រាអែលទៀត»។
លោក Blinken បានប្រកាសថា៖ «យើងទាំងអស់គ្នាមានអារម្មណ៍ថា មានចំណែកនៅក្នុងការបង្កើតផ្លូវឆ្ពោះទៅមុខ។ យើងទាំងអស់គ្នាទទួលស្គាល់ថា យើងត្រូវធ្វើការជាមួយគ្នា។ នោះគឺជាផ្លូវតែមួយគត់ឆ្ពោះទៅមុខ ហើយមិនអាចរង់ចាំបានទេ»៕
បទវិចារណកថា៖ រដ្ឋមន្រ្តីការបរទេសសហរដ្ឋអាមេរិកលោក Blinken ត្រឡប់ទៅមជ្ឈិមបូព៌ា
