តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅពេលដែលក្រុមហាម៉ាស់បានបើកការវាយប្រហារដ៏សាហាវទៅលើអ៊ីស្រាអែលកាលពីថ្ងៃទី៧ ខែតុលា កន្លងទៅនេះ វាបានធ្វើឱ្យសង្រ្គាមចាប់ផ្តើមឡើង។ ហើយជាធម្មតា វាធ្វើឱ្យប្រជាជនស៊ីវិលទាំងសងខាង ក្លាយជាជនរងគ្រោះ។ មនុស្សរាប់ពាន់នាក់មកពីជាង៣០ ប្រទេស ត្រូវបានសម្លាប់ និងរងរបួសនៅក្នុងការវាយប្រហារដែលបានចាប់ផ្តើមឡើងដោយក្រុមហាម៉ាស់ ហើយជាលទ្ធផល អ៊ីស្រាអែលបានធ្វើការវាយប្រហារសងសឹកវិញ។
នៅមុនការចាប់ផ្តើមទម្លាក់គ្រាប់បែក អ៊ីស្រាអែលបានព្រមានយ៉ាងច្បាស់ថា ប្រជាជនស៊ីវិលនៅតំបន់ហ្កាហ្សាត្រូវជម្លៀសចេញ។ តែទោះជាយ៉ាងនេះក៏ដោយ ក៏ក្រុមហាម៉ាស់បានបញ្ជាឱ្យប្រជាជនស្ថិតនៅតែក្នុងផ្ទះរបស់ពួកគេ ហើយបានបិទផ្លូវដើម្បីរារាំងពួកគេមិនឱ្យចាកចេញ។ ច្បាស់ណាស់ថា ពលរដ្ឋស៊ីវិលត្រូវបានគេយកធ្វើជាខែលការពារពួកជនសកម្មប្រយុទ្ធ។
រដ្ឋមន្រ្តីក្រសួងការបរទេសសហរដ្ឋអាមេរិកលោក Antony Blinken បាននិយាយថា «យើងដឹងថា ក្រុមហាម៉ាស់មិនតំណាងឱ្យប្រជាជនប៉ាឡេស្ទីនទេ ហើយជនស៊ីវិលប៉ាឡេស្ទីនមិនពាក់ព័ន្ធនឹងការសម្លាប់រង្គាលដែលប្រព្រឹត្តដោយក្រុមហាម៉ាស់នោះទេ។ ជនស៊ីវិលប៉ាឡេស្ទីនត្រូវតែទទួលបាននូវការការពារ»។
តំបន់ហ្កាហ្សាស្ទ្រីព (Gaza Strip) ដែលមានបណ្តោយប្រវែង ៤១ គីឡូម៉ែត្រ និងទទឹង ប្រវែង ៦ ទៅ ១២ គីឡូម៉ែត្រ ស្ថិតនៅតាមបណ្តោយឆ្នេរសមុទ្រមេឌីទែរ៉ាណេ មានផ្ទៃដីសរុប ៣៦៥ គីឡូម៉ែត្រការ៉េ។ តំបន់ហ្កាហ្សាស្ទ្រីពនេះ មានមនុស្សរស់នៅជាង ២.៣៧៥.០០០ នាក់។ ប្រជាជនប៉ាឡេស្ទីនប្រហែលមួយលាននាក់ត្រូវបានផ្លាស់ទីលំនៅនៅក្នុងតំបន់នោះ ដោយគ្មានវិធីចាកចេញពីតំបន់ហ្កាហ្សា ហើយនោះមានន័យថា ជំនួយមនុស្សធម៌មានសារៈសំខាន់ណាស់សម្រាប់ការរស់រានមានជីវិតរបស់ពួកគេ។
លោករដ្ឋមន្រ្តីការបរទេស Blinken បាននិយាយថា៖ «យើងបន្តសម្របសម្រួលយ៉ាងដិតដល់ជាមួយអេហ្ស៊ីប អ៊ីស្រាអែល និងដៃគូនានានៅទូទាំងតំបន់ ក៏ដូចជាជាមួយអង្គការសហប្រជាជាតិ ដើម្បីកសាងយន្តការដែលអាចឱ្យជំនួយមនុស្សធម៌ប្រកបដោយនិរន្តរភាព បានទៅដល់ជនស៊ីវិលនៅតំបន់ហ្កាហ្សា ដោយមិនផ្តល់ផលប្រយោជន៍ដល់ក្រុមហាម៉ាស់ ឬក្រុមភេរវជនណាមួយឡើយ»។
លោក Blinken បានថ្លែងបន្តទៀតថា៖ «សហរដ្ឋអាមេរិកបានសន្យាផ្តល់ជំនួយមនុស្សធម៌បន្ថែមដែលគិតជាប្រាក់មានចំនួន ១០០ លានដុល្លារដល់ពលរដ្ឋប៉ាឡេស្ទីននៅតំបន់ហ្កាហ្សា និងតំបន់វែសប៊ែង (West Bank) ដោយនាំឱ្យជំនួយសរុបដែលយើងបានផ្តល់ដល់ប្រជាជនប៉ាឡេស្ទីនក្នុងរយៈពេល២ ឆ្នាំកន្លះមកនេះ ឡើងដល់ជាង ១,៦ពាន់លានដុល្លារ។ ចំនួននៃប្រាក់ជំនួយនេះ បានធ្វើឱ្យសហរដ្ឋអាមេរិកក្លាយជាប្រទេសម្ចាស់ជំនួយធំបំផុតដែលជួយដល់ប្រជាជនប៉ាឡេស្ទីន។ យើងសូមអំពាវនាវដល់ប្រទេសទាំងអស់ ជាពិសេសប្រទេសដែលមានសមត្ថភាពខ្ពស់បំផុតក្នុងការផ្តល់ជំនួយ ឱ្យចូលរួមជាមួយយើងក្នុងការបំពេញតាមការអំពាវនាវរបស់អង្គការសហប្រជាជាតិសម្រាប់ស្ថានភាពមនុស្សធម៌នៅតំបន់ហ្កាហ្សា»។
លោក Blinken បានថ្លែងទៀតថា៖ «គោលបំណងសំខាន់នៃកិច្ចខិតខំប្រឹងប្រែងរបស់យើងក្នុងការជួយសង្គ្រោះជីវិតជនដែលគ្មានកំហុសនៅក្នុងជម្លោះនេះ និងនៅក្នុងគ្រប់ជម្លោះផ្សេងទៀតនោះគឺថា ជំនឿដ៏សំខាន់របស់យើងគឺជីវិតរបស់ជនស៊ីវិលគ្រប់រូបមានតម្លៃស្មើគ្នា។ ការជួយជីវិតជនស៊ីវិល គឺយើងមិនគិតពីឋានៈខ្ពស់ទាបឡើយ។ មិនថាពួកគេជាជាតិសាសន៍អ្វី អាយុ ភេទ និងជំនឿអ្វីនោះឡើយ ជនស៊ីវិល គឺជាជនស៊ីវិល»៕
