តទៅនេះគឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក មានការប្តេជ្ញាខ្ពស់ដល់សម្ព័ន្ធភាពរវាងសហរដ្ឋអាមេរិកនិងប្រទេសជប៉ុន។ នៅក្នុងដំណើរទស្សនកិច្ចកាលពីពេលថ្មីៗនេះទៅកាន់ប្រទេសជប៉ុន រដ្ឋមន្ត្រីការបរទេសសហរដ្ឋអាមេរិក លោក Anthony Blinken បានគូសបញ្ជាក់ថា រួមគ្នា សហរដ្ឋអាមេរិកនិងជប៉ុន «ដោះស្រាយកង្វល់ស្នូលខាងសន្តិសុខ» ដោយមានរួមបញ្ចូលកម្មវិធីអាវុធនុយក្លេអ៊ែររបស់ប្រទេសកូរ៉េខាងជើង និងសន្តិសុខដែនសមុទ្រនៅទូទាំងតំបន់នោះ។ បញ្ហាជាអាទិភាពឯទៀតៗដែលសហរដ្ឋអាមេរិកនិងជប៉ុនកំពុងប្រឈម មានរួមបញ្ចូលជំងឺកូវីដ១៩ ការប្រែប្រួលអាកាសធាតុ និងសន្តិសុខតាមប្រព័ន្ធអ៊ីនធឺណិត។
សហរដ្ឋអាមេរិកនិងប្រទេសជប៉ុន ប្តេជ្ញាឧបត្ថម្ភផ្ចុងផ្តើមលទ្ធិប្រជាធិបតេយ្យសិទ្ធិមនុស្ស និងនីតិរដ្ឋ។ ក៏ប៉ុន្តែគុណតម្លៃទាំងនេះ កំពុង«ឋិតក្រោមការគំរាមកំហែងនៅក្នុងកន្លែងជាច្រើន ដោយមានរួមបញ្ចូលទាំងតំបន់នេះផងដែរ»។
លោករដ្ឋមន្ត្រី Blinken បានព្រមានថា៖ «នៅក្នុងប្រទេសមីយ៉ាន់ម៉ា កងយោធាប៉ុនប៉ងប្រែក្រឡាស់លទ្ធផលនៃការបោះឆ្នោតប្រជាធិបតេយ្យ និងបង្ក្រាបយ៉ាងឃោរឃៅលើក្រុមបាតុករដោយសន្តិវិធី។ ប្រទេសចិនប្រើប្រាស់ការបង្ខិតបង្ខំនិងការឈ្លានពានដើម្បីបំផ្លាញស្វ័យភាពនៅទីក្រុងហុងកុង បំផ្លាញលទ្ធិប្រជាធិបតេយ្យនៅកោះតៃវ៉ាន់ រំលោភសិទ្ធិមនុស្សក្នុងតំបន់ Xinjiang និងដែនដីទីបេ ហើយការពារការទាមទាររបស់ខ្លួនក្នុងសមុទ្រចិនខាងត្បូងដោយរំលោភលើច្បាប់អន្តរជាតិ»។
លោករដ្ឋមន្ត្រី Blinken បានមានប្រសាសន៍ថា៖ «យើងរួបរួមគ្នាក្នុងទស្សនវិស័យនៃតំបន់ឥណ្ឌូ-ប៉ាស៊ីហ្វិកសេរីនិងបើកចំហដែលនៅទីនោះប្រទេសនានាធ្វើតាមបទបញ្ញត្តិ ធ្វើកិច្ចសហប្រតិបត្តិការនៅពេលណាពួកគេអាចធ្វើបាន និងដោះស្រាយការខ្វែងគំនិតគ្នាដោយសន្តិវិធី»។
លោករដ្ឋមន្ត្រី Blinken បានមានប្រសាសន៍ថា៖ «ជាពិសេស យើងនឹងធ្វើការរុញច្រានប្រសិនបើជាការចាំបាច់ នៅពេលប្រទេសចិនប្រើការបង្ខិតបង្ខំ ឬការឈ្លានពានដើម្បីឱ្យសម្រេចបំណងរបស់ខ្លួន...តំបន់ឥណ្ឌូ-ប៉ាស៊ីហ្វិកជាតំបន់ស្នូលនៃភូមិសាស្ត្រនយោបាយសាកល។ តំបន់នោះ ជាកន្លែងដែលគេនឹងសរសេរច្រើនអំពីប្រវត្តិសាស្ត្រនៃសតវត្សរ៍ទី២១។ មានទស្សនវិស័យប្រជែងគ្នាច្រើនអំពីថាតើរឿងនេះគួរសរសេរបែបណា។ ជប៉ុននិងសហរដ្ឋអាមេរិកជាមួយពួកសម្ព័ន្ធមិត្តនិងបណ្ដាដៃគូរបស់យើង ជាអ្នកគាំទ្រខ្លាំងដល់របៀបដោះស្រាយរបស់យើងដែលផ្អែកលើគុណតម្លៃ និងការប្តេជ្ញារួមគ្នារបស់យើងដល់សន្តិសុខ និងសុខុមាលភាពរបស់ប្រជាជនយើង»។
លោករដ្ឋមន្ត្រី Blinken បានមានប្រសាសន៍ថា៖ «យើងក្រឡេកមើលទៅមុខទៅអនាគតជាមួយគ្នាដោយមានទំនុកចិត្តថា មិត្តភាពរវាងជប៉ុននិងសហរដ្ឋអាមេរិកនឹងនៅឋិតថេរ តែមិនមែនគ្រាន់តែឋិតថេរប៉ុណ្ណោះទេ មិត្តភាពនេះនឹងលូតលាស់ថែមទៀតផងដែរ ហើយជាមួយគ្នា យើងនឹងកសាងអនាគតមួយខ្លាំងជាងមុន និងល្អប្រសើរជាងមុនសម្រាប់ប្រជាពលរដ្ឋរបស់យើង»៕
