តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
តុលាការព្រហ្មទណ្ឌអន្តរជាតិ ឬ ICC គឺជាតុលាការអចិន្ត្រៃយ៍អន្តរជាតិតែមួយគត់ដែលមានយុត្តាធិការកាត់ទោសជនទាំងឡាយណាដែលជាប់ពាក់ព័ន្ធនឹងបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្មឈ្លានពាន។ កាលពីចុងខែតុលាកន្លងទៅ ប្រធានតុលាការ ICC បានបង្ហាញរបាយការណ៍ប្រចាំឆ្នាំរបស់តុលាការនេះជូនដល់មហាសន្និបាតអង្គការសហប្រជាជាតិ។ ឆ្នាំនេះគឺជាខួបទី២០នៃការបង្កើតស្ថាប័នតុលាការនេះ ហើយជាឆ្នាំដ៏ពិសេស ដោយសារមានកំណត់ត្រាសំណុំរឿងដល់ទៅ ៥ ដែលកំពុងបន្តជំនុំជម្រះ។
តុលាការ ICC គឺជាឧបករណ៍សំខាន់ចាំបាច់ក្នុងការធានាយុត្តិធម៌អន្តរជាតិ សមដូចប្រសាសន៍របស់ប្រតិភូសហរដ្ឋអាមេរិកប្រចាំនៅអង្គការសហប្រជាជាតិលោក Andrew Weinstein ដែលបានថ្លែងថា៖ «តុលាការ ICC បានផ្តល់យុត្តិធម៌ដ៏សំខាន់សម្រាប់ជនរងគ្រោះនៅជុំវិញពិភពលោក»។
«សកម្មភាពតុលាការ ICC នៅក្នុងគ្រប់ស្ថានភាពទាំងអស់នៅក្នុងពិភពលោក គូសបញ្ជាក់ពីតួនាទីដ៏សំខាន់របស់ខ្លួនក្នុងឋាន:ជាផ្នែកដ៏សំខាន់នៃនិម្មាបនកម្មសកល ដើម្បីធ្វើឲ្យមានការទទួលខុសត្រូវចំពោះមុខច្បាប់ ហើយជាការរំឭកឲ្យដឹងពីភាពសំខាន់ចាំបាច់នៃយុត្តិធម៌ ទោះបីជាវាត្រូវការពេលវេលាដើម្បីសម្រេចឲ្យបានយុត្តិធម៌នោះក្តី»។
ក្នុងចំណោមសំណុំរឿងសំខាន់ៗបំផុតដែលតុលាការ ICC ជំនុំជម្រះនៅឆ្នាំនេះ គឺការកាត់ទោស មេបញ្ជាការ ក្រុមសកម្មប្រយុទ្ធ Janjaweed ឈ្មោះ Ali Mohammed Ali Abd-al Rahman ដែលគេស្គាល់ជាទូទៅឈ្មោះ Ali Kushayb។ នេះជាការជំនុំជម្រះក្តីលើកដំបូងចំពោះមេដឹកនាំជាន់ខ្ពស់ទាំងឡាយពីបទចោទពាក់ព័ន្ធនឹងឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិដែលបានប្រព្រឹត្ត ដោយរបបគ្រប់គ្រងរបស់អតីតប្រធានាធិបតីស៊ូដង់លោក Omar al-Bashir ទៅលើពលរដ្ឋតំបន់ Darfur។ ដូចគ្នានេះដែរ តុលាការ ICC បានធ្វើកិច្ចការយ៉ាងជិតស្និទ្ធជាមួយរដ្ឋាភិបាលសាធារណរដ្ឋអាហ្វ្រិកកណ្តាល ដើម្បីនាំខ្លួនលោក Alfred Yekatom លោក Patrice Ngaisonna ហើយនិងលោក Mahamat Said Abdel Kani មកកាត់ទោសពីបទឧក្រិដ្ឋកម្មប្រឆាំងនឹងមនុស្សជាតិនិងឧក្រិដ្ឋកម្មសង្គ្រាម។ សំណុំរឿងនេះបង្ហាញពីការប្រឆាំងនឹងភាពគ្មានទោសពៃរ៍ឬនិទណ្ឌភាពដ៏មានសក្តានុពលមួយ។
«ជនទាំងឡាយដែលអាចនឹងត្រូវតុលាការព្រហ្មទណ្ឌអន្តរជាតិ ICC ចេញដីកាចាប់ខ្លួន ត្រូវតែប្រឈមមុខនឹងយុត្តិធម៌នៅចំពោះមុខដំណើរការច្បាប់ដ៏ត្រឹមត្រូវ ឯករាជ្យ និងដ៏គួរឲ្យទុកចិត្តបាន»។
លោក Weinstein ប្រតិភូសហរដ្ឋអាមេរិកប្រចាំអង្គការសហប្រជាជាតិបានឲ្យដឹងទៀតថា៖ មកដល់ចំណុចនេះ យើងត្រូវតែដោះស្រាយ «បញ្ហាសង្គ្រាមដ៏ឃោរឃៅក្នុងប្រទេសអ៊ុយក្រែន ដែលនៅទីនោះមានពលរដ្ឋយ៉ាងច្រើនប្រឈមមុខនឹងការវាយប្រហារយ៉ាងព្រៃផ្សៃដោយកងទ័ពរុស្ស៊ីជារៀងរាល់ថ្ងៃ»។
«សហរដ្ឋអាមេរិកគាំទ្រដល់ការស៊ើបអង្កេតអន្តរជាតិជាបន្តបន្ទាប់ទាក់ទិននឹងអំពើឃោរឃៅក្នុងប្រទេសអ៊ុយក្រែនដោយរួមមានទាំងសំណុំរឿងដែលស៊ើបអង្កេតដោយតុលាការ ICC ដោយអង្គការសហប្រជាជាតិ និងដោយអង្គការសម្រាប់សន្តិសុខនិងកិច្ចសហប្រតិបត្តិការក្នុងសហភាពអឺរ៉ុបផងដែរ។ យើងនឹងបន្តឈរជាមួយអ៊ុយក្រែនប្រឆាំងនឹងការឈ្លានពានដ៏ឃោរឃៅរបស់រុស្ស៉ី និង ស្វែងរកយុត្តិធម៌ ហើយនិងការទទួលខុសត្រូវចំពោះមុខច្បាប់»។
«យុត្តិធម៌មិនមែនជារឿងសំខាន់ចាំបាច់ផ្នែកសីលធម៌តែមួយមុខនោះទេ តែវាជារឿងដ៏សំខាន់ចាំបាច់ក្នុងការថែរក្សាសន្តិភាពនិងសន្តិសុខអន្តរជាតិ។ សហរដ្ឋអាមេរិកគឺជាអ្នកគាំទ្រពេញទំហឹង ចំពោះការទទួលខុសត្រូវ និងយុត្តិធម៌ប្រកបដោយអត្ថន័យសម្រាប់ជនរងគ្រោះពីអំពើឃោរឃៅ ទាំងឡាយ។ ទាំងនេះគឺជាតម្លៃស្នូល និងជាការពង្រឹងយុត្តិធម៌ដ៏ល្អបំផុត តាមរយ:ការប្តេជ្ញារួមគ្នា ហើយតុលាការ ICC គឺជាផ្នែកដ៏សំខាន់មួយនៃការប្តេជ្ញារួមគ្នាដើម្បីយុត្តិធម៌»៕
