តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
អ្នកស្រី Kerri Hannan ឧបការីរងរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការតំបន់អឌ្ឍគោលខាងលិច (Western Hemisphere) បាននិយាយថា ការលេចឡើងនូវចំណុចខ្សោយនៅក្នុងខ្សែសង្វាក់ផ្គត់ផ្គង់គឺជាផលប៉ះពាល់មិនរំពឹងទុកមួយនៃវិបត្តិជំងឺកូវីដ១៩។
អ្នកស្រីបញ្ជាក់ដូច្នេះថា៖ «យើងកំពុងប្រឈមនឹងវិបត្តិដ៏ពិតប្រាកដមួយដែលវិបត្តិជំងឺកូវីដ១៩ បានបង្ហាញឱ្យឃើញ នៅពេលដែលយើងមិនធ្វើពិពិធកម្ម ឬក៏មិនមានខ្សែសង្វាក់ផ្គត់ផ្គង់ដែលមានភាពធន់។ យើងកំពុងមានហានិភ័យនៃការដួលរលំសេដ្ឋកិច្ច នៃការមិនមានឧបករណ៍ពាក់ការពារខ្លួន (PPE) នៃការមិនមានលទ្ធភាពឆ្លើយតបចំពោះជំងឺរាតត្បាត ឬក៏វិបត្តិណាមួយផ្សេងទៀតដែលអាចកើតឡើងនៅក្នុងតំបន់នៅពេលខាងមុខ»។
អ្នកស្រី Hannan បានថ្លែងនៅក្នុងកិច្ចប្រជុំកំពូលស្ដីពីទ្វីបអាមេរិក (Summit of the Americas) កាលពីពាក់កណ្ដាលខែមិថុនាកន្លងទៅនេះថា វាជាការសំខាន់បំផុតដែលយើងត្រូវស្វែងរកវិធីពង្រឹងការធ្វើឱ្យមានតុល្យភាពឡើងវិញនូវខ្សែសង្វាក់ផ្គត់ផ្គង់ ឬក៏ផលិតកម្មក្នុងស្រុក និងវិធីផ្សេងទៀតដើម្បីធ្វើពិពិធកម្មនិងកសាងខ្សែសង្វាក់ផ្គត់ផ្គង់ដែលមានភាពធន់។
អ្នកស្រីបានលើកឡើងដូច្នេះថា៖ «វាក៏ជាឱកាសសេដ្ឋកិច្ចដ៏កម្រមួយផងដែរដែលយើងបានឃើញ ដើម្បីធ្វើការជាមួយនឹងដៃគូនានានៅក្នុងតំបន់ដើម្បីបង្កើតខ្សែសង្វាក់ផ្គត់ផ្គង់។ ...ក្រឡេកមើលទៅលើរបៀបដែលទំនិញអាចធ្វើចរាចរនិងទីផ្សារអាចដំណើរការនៅទូទាំងតំបន់ មិនថាតាមរយៈការមើលលើកំពង់ផែ ឬក៏ការមើលលើផ្លូវធ្វើដំណើរនោះទេ ទាំងអស់នេះគឺជាផ្នែកមួយនៃកិច្ចប្រឹងប្រែងដ៏ធំនេះនៅក្នុងតំបន់ដើម្បីធ្វើពិពិធកម្មខ្សែសង្វាក់ផ្គត់ផ្គង់របស់យើង»។
អ្នកស្រី Hannan បានបន្ថែមថា៖ «ទាំងនេះ គឺជាឱកាសទាំងអស់សម្រាប់ការរីកចម្រើនសេដ្ឋកិច្ច»។
ជាការពិត ប្រធានបទនៃកិច្ចប្រជុំកំពូលស្ដីពីទ្វីបអាមេរិកនៅក្នុងឆ្នាំនេះគឺ «ការកសាងអនាគតមួយដែលមានចីរភាព ភាពធន់ និងសមភាព»។ ករណីនេះ «មានន័យថា មនុស្សគ្រប់រូប ដែលរួមមានទាំងស្ត្រី ក្រុមមនុស្សដែលគេមិនសូវយកចិត្តទុកដាក់ សហគ្រាសធុនតូចនិងធុនមធ្យម និងសេដ្ឋកិច្ចក្រៅប្រព័ន្ធផងដែរ មានលទ្ធភាពប្រើប្រាស់ទីផ្សារ ចូលរួមក្នុងសេដ្ឋកិច្ច និងទទួលបានថវិកា»។
ចំណុចនេះមានន័យថា ការពង្រីកលទ្ធភាពចូលរួមក្នុងសេដ្ឋកិច្ចឌីជីថលនៅទូទាំងតំបន់អាមេរិកឡាទីនគឺជាអាទិភាពកំពូលនៃកិច្ចប្រជុំកំពូលនេះ។
វាក៏មានន័យផងដែរថាជាការជំរុញឱ្យស្ត្រីមានភាពក្លាហាន ដោយហេតុថានៅពេលណាដែលស្ត្រីទទួលបានជោគជ័យ សង្គមទាំងមូលនឹងទទួលបានប្រយោជន៍ពីនេះ។
ជាឧទាហរណ៍ អនុប្រធានាធិបតីសហរដ្ឋអាមេរិកអ្នកស្រី Kamala Harris បានស្នើនូវគំនិតផ្ដួចផ្ដើម «នៅក្នុងដៃរបស់ស្ត្រី» នៅឯកិច្ចប្រជុំកំពូលនោះ។
អ្នកស្រី Hannan បានបញ្ជាក់ថា គំនិតផ្ដួចផ្ដើមនេះ «មានបំណងឱ្យស្ត្រីបានចូលរួមនៅក្នុងវិស័យសេដ្ឋកិច្ច»។
អ្នកស្រី Hannan ថ្លែងថា៖ «ការតាំងចិត្តនិងការទទួលស្គាល់នេះដែលលើកកម្ពស់ស្ត្រី ជាពិសេសស្ត្រីនៅក្នុងតំបន់អាមេរិកកណ្ដាល គឺនឹងជះលទ្ធផលដល់តំបន់នេះទាំងមូល»។
អ្នកស្រី Hannan លើកឡើងបន្តដូច្នេះថា៖ «នេះគឺជាកិច្ចប្រជុំកំពូលដែលមានការចូលរួមពីភាគីច្រើនបំផុតដែលមិនធ្លាប់មានពីមុនមក។ សាលប្រជុំគឺពោរពេញដោយវត្តមានរបស់ស្ត្រី និងក្រុមមនុស្សដែលគេមិនសូវយកចិត្តទុកដាក់។ ហើយពួកគេបានជួបពិភាក្សាជាមួយនឹងមេដឹកនាំនិងអ្នកតំណាងរដ្ឋាភិបាលនានាដែលមានវត្តមាននៅក្នុងកិច្ចប្រជុំនោះ ដើម្បីឱ្យមេដឹកនាំទាំងនោះស្ដាប់នូវអ្វីដែលពួកគេចាំបាច់ត្រូវដោះស្រាយដើម្បីស្វែងរកវិធីផ្ដល់ជូនតាមការចង់បានរបស់សង្គមស៊ីវិលក្នុងគោលបំណងធ្វើយ៉ាងណាឱ្យជីវភាពរស់នៅរបស់ពលរដ្ឋបានប្រសើរឡើង»។
អ្នកស្រីបានបន្ថែមថា៖ «យើងនឹងឃើញទសវត្សរ៍មួយដែលមានការផ្លាស់ប្ដូរ»៕
