Accessibility links

Breaking News

ບົດບັນນາທິການ: ການປະຫານຊີວິດ ນັກຂ່າວອີຣ່ານ ຢ່າງໂຫດຮ້າຍປ່າເຖື່ອນ


ນັກຂ່າວຣູໂຮລລາ ແຊມ ຈາກອີຣ່ານ

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ແມ່ນແຕ່ອຳນາດການປົກຄອງທີ່ໂຫດຫ້ຽມອຳມະຫິດຂອງອີຣ່ານ ການລັກ ພາໂຕ ແລະການປະຫານຊີວິດ ນັກຂ່າວທີ່ຄັດຄ້ານລັດຖະບານ ທ່ານຣູໂຮລລາ ແຊມ (Ruhollah Zam) ກໍຄວນຈົດຈຳໃນຄວາມຊົ່ວຊ້າ ແລະການບໍ່ໃຫ້ຄວາມເຄົາລົບຢ່າງເປີດແປນຂອງພວກເຂົາ ຕໍ່ຫຼັກການສາກົນ.

ອີຣ່ານໄດ້ປະຫານຊີວິດຜູ້ກໍ່ຕັ້ງອົງການຂ່າວອาໝາດນິວສ໌ (AmadNews) ຊຶ່ງເປັນ ເວັບໄຊຕໍ່ຕ້ານອຳນາດການປົກຄອງອີຣ່ານ ທີ່ໄດ້ຮັບຄວາມນິຍົມຈາກປະ ຊາຊົນ ເມື່ອວັນທີ 12 ທັນວາຜ່ານມາ ບໍ່ເທົ່າໃດມື້ຫຼັງຈາກສານອີຣ່ານ ໄດ້ຕັດ ສິນເຫັນພ້ອມກັບໂທດປະຫານຊີວິດ ຊຶ່ງທ່ານໄດ້ຖືກກ່າວຫາໃນອັນທີ່ເອີ້ນວ່າ ກໍ່ອາຊະຍາກຳຍ້ອນໄດ້ຂະຫຍາຍການສໍ້ລາດບັງຫຼວງເທິງໂລກມະນຸດ.

ແຕ່ອາຊະຍາກຳທີ່ແທ້ຈິງຂອງທ່ານແຊມ ໃນສາຍຕາຂອງພວກເຈົ້າໜ້າທີ່ອີຣ່ານ​ແມ່ນການທ້າທາຍຕໍ່ການປົກຄອງຂອງພວກເຂົາແລະເປີດເຜີຍໂສມໜ້າການທຳ ທ່າເປັນຄົນດີຂອງພວກເຂົາ.

ມີລາຍງານວ່າ ທ່ານແຊມທີ່ລີ້ໄພການເມືອງຢູ່ປະເທດຝຣັ່ງໄດ້ຖືກລັກພາໂຕໂດຍກຳລັງພິທັກປະຕິວັດອິສລາມ ແລະນຳໂຕກັບຄືນໄປປະເທດອີຣ່ານໃນປີ 2019. ທ່ານໄດ້ຖືກດຳເນີນຄະດີ ໃນເດືອນກຸມພາປີ 2020. ທ່ານໄດ້ຖືກກ່າວຫາວ່າ ຍຸແຍ່ໃຫ້ມີການເດີນຂະບວນຕໍ່ຕ້ານລັດຖະບານ ທີ່ລະເບີດຂຶ້ນ ໃນປີ 2017 ແລະການບັງຄັບໃຫ້ທ່ານສາລະພາບໄດ້ຖືກນຳມາອອກອາກາດທາງໂທລະພາບແລະທ່ານຖືກຕັດສິນໂທດໃນເດືອນມິຖຸນາ.

ລັດຖະມົນຕີການຕ່າງປະເທດພອມພຽວໄດ້ປະນາມຢ່າງແຂງຂັນຕໍ່ການປະຫານຊີວິດທ່ານແຊມໂດຍເອີ້ນການປະຫານຊີວິດນີ້ວ່າ “ບໍ່ເປັນທຳ” ແລະ “ປ່າເຖື່ອນ” ຢູ່ໃນການສົ່ງທວີດເຕີ້ນັ້ນ ທ່ານໃຫ້ຂໍສັງເກດວ່າ “ທ່ານແຊມໄດ້ເຜີຍໃຫ້ເຫັນເຖິງ
ຄວາມໂຫດຮ້າຍປ່າເຖື່ອນ ແລະການສໍ້ລາດບັງຫຼວງຂອງອຳນາດການປົກຄອງທີ່ໄດ້ສັງຫານ ຫຼືວ່າຈັບກຸມພວກນັກຂ່າວຫຼາຍກວ່າ 860 ຄົນ ໃນຊ່ວງການປົກຄອງທີ່ໃຊ້ຄວາມຮຸນແຮງ ໂດຍພວກກຳອຳນາດຜະເດັດການເປັນເວລາ 41 ປີ.” ທ່ານພອມພຽວກ່າວຕື່ມວ່າ “ປະຊາຊົນຊາວອີຣ່ານສົມຄວນຈະໄດ້ຮັບການມີສື່ມວນຊົນທີ່ເສລີແລະຫຼາກຫຼາຍ, ບໍ່ແມ່ນການກວດກາ ການຈັບກຸມຄຸມຂັງ ແລະການປະຫານຊີວິດພວກນັກຂ່າວ.”

ນອກນັ້ນ ປະຊາຄົມນາໆຊາດຍັງໄດ້ສະແດງຄວາມໂກດແຄ້ນ ຕໍ່ການສັງຫານ ທ່ານຣູໂຮລລາ ແຊມ. ຂ້າຫຼວງໃຫຍ່ໃນດ້ານສິດທິມະນຸດຂອງອົງການສະຫະປະຊາຊາດ ທ່ານນາງມີແຊລ ບາເຊີແລັດ (Michelle Bachelet) ກ່າວວ່າ ທ່ານນາງ “ຕື່ນຕົກໃຈ” ໂດຍການປະຫານຊີວິດ. ທ່ານນາງກ່າວຕື່ມວ່າ ກໍລະນີຂອງທ່ານແຊມ ແມ່ນ “ເປັນສັນຍາລັກຂອງຮ່ອງຮອຍໃນການຖືກບີບບັງຄັບໃຫ້ສາລະພາບ ພາຍໃຕ້ການຖືກທໍລະມານ ແລະອອກອາກາດ ໂດຍທີ່ສື່ມວນຊົນຂອງລັດຖະບານ ຖືກໃຊ້ເປັນພື້ນຖານໃນການລົງໂທດຕໍ່ປະຊາຊົນ.”

ທ່ານເຊຣິຟ ແມນຊົວ (Sherif Mansour) ຈາກຄະນະກໍາມະການປົກປ້ອງນັກຂ່າວ ກ່າວເຖິງການເສຍຊີວິດຂອງທ່ານແຊມວ່າ “ໂຫດຮ້າຍແລະໜ້າລະອາຍ.”

ໃນຖະແຫຼງການທີ່ອອກໄປນັ້ນ ກະຊວງການຕ່າງປະເທດຝຣັ່ງເອີ້ນການປະຫານຊີວິດທ່ານແຊມວ່າ “ໂຫດຮ້າຍປ່າເຖື່ອນແລະຮັບເອົາບໍ່ໄດ້” ແລະປະເທດຝຣັ່ງໄດ້ເຂົ້າຮ່ວມກັບເຢຣະມັນ ອອສເຕຣຍ ແລະອີຕາລີ ຍົກເລີກການເຂົ້າຮ່ວມໃນກອງປະຊຸມທຸລະກິດ ຢູໂຣບ-ອີຣ່ານ ຊຶ່ງມີກຳນົດຈັດຂຶ້ນ ໃນວັນທີ 14 ທັນວາຜ່ານມາ.

ທູດພິເສດຂອງສະຫະລັດ ຮັບຜິດຊອບກ່ຽວກັບເລື້ອງອີຣ່ານ ແລະເວເນຊູເອລາ ທ່ານເອລີອອດ ເອແບຣັມ ຊີ້ໃຫ້ເຫັນວ່າ ການປະຫານຊີວິດຂອງທ່ານແຊມມີຂຶ້ນ ຫຼັງຈາກການປະຫານຊີວິດແຊ້ມມວຍປ້ຳອີຣ່ານ ນາວີດ ອັຟກາຣີ (Navid Afkari) ໃນເດືອນກັນຍາ. ທ່ານເອແບຣັມ ກ່າວວ່າ “ມັນເປັນການເຕືອນຄວາມຈຳອີກອັນນຶ່ງວ່າພວກເຮົາກຳລັງເວົ້າເຖິງອຳນາດການປົກຄອງທີ່ໂຫດຮ້າຍປ່າເຖື່ອນ ແລະຫົວຮຸນແຮງ ທີ່ບໍ່ມີຄວາມລັງເລໃຈໃດໆ ທີ່ຈະທ້າທາຍຕໍ່ກົດໝາຍ ແລະຫຼັກການລະຫວ່າງປະເທດ ເພື່ອນຳໃຊ້ອຳນາດແລະການຄວບຄຸມ. ນັ້ນຄືເຫດຜົນທີ່ວ່າ ເປັນຫຍັງ ມັນຈຶ່ງມີຄວາມສຳຄັນຫຼາຍ ສຳລັບປະເທດທີ່ນຳໜ້າ ໃນການໃຫ້ຄວາມສະໜັບສະໜຸນພວກກໍ່ການຮ້າຍໃນໂລກ ຈຶ່ງບໍ່ຄວນໄດ້ຮັບອາວຸດທີ່ມີອະນຸພາບຮ້າຍແຮງທີ່ສຸດໃນໂລກ.”

XS
SM
MD
LG