ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ລັດຖະທຳມະນູນຂອງຫວຽດນາມໃຫ້ການຄ້ຳປະກັນ ໃນການສະແດງອອກ ຊຶ່ງຄວາມຄິດຄວາມເຫັນ ຮວມທັງສິດເສລີພາບ ໃນການອອກຂ່າວ. ແຕ່ໃນລາຍງານເມື່ອໄວໆມານີ້ ຂອງກະຊວງການຕ່າງປະເທດສະຫະລັດ ກ່ຽວກັບການປະຕິບັດ ສິດທິມະນຸດໃນຫວຽດນາມນັ້ນໃຫ້ຂໍ້ສັງເກດວ່າ “ໃນທາງປະຕິບັດໂຕຈິງແລ້ວ ລັດຖະບານບໍ່ໄດ້ໃຫ້ການເຄົາລົບຕໍ່ສິດທິເຫຼົ່ານີ້ເລີຍ.” ກະຊວງການຕ່າງປະເທດກໄດ້ສັງເກດເຫັນວ່າ “ລັດຖະບານ ນອກນັ້ນ ຍັງສືບຕໍ່ນຳໃຊ້ຢ່າງກວ້າງຂວາງ ກົດໝາຍວ່າດ້ວຍຄວາມໝັ້ນຄົງແຫ່ງຊາດ ແລະຂໍ້ກຳນົດ ວ່າດ້ວຍການຕໍ່ຕ້ານ ການໃສ່ຮ້າຍປ້າຍສີເພື່ອຈຳກັດຮັດແຄບສິດເສລີພາບໃນການສະແດງຄວາມຄິດຄວາມເຫັນ.” ນອກຈາກນັ້ນແລ້ວ ລາຍງານຍັງເວົ້າວ່າ “ກົດໝາຍດັ່ງກ່າວ ໄດ້ຫ້າມຢ່າງເປັນ ການຈະແຈ້ງ ‘ຕໍ່ການສວຍໂອກາດນຳໃຊ້ອິດສະຫຼະພາບປະຊາທິປະໄຕ ແລະສິດທິ ເພື່ອລະເມີດຕໍ່ຜົນປະໂຫຍດຂອງລັດ ຫຼືສິດທິຢ່າງຖືກຕ້ອງຕາມກົດໝາຍ ແລະຜົນປະໂຫຍດຂອງອົງການຈັດຕັ້ງຕ່າງໆ ຫຼືຂອງສ່ວນບຸກຄົນ.’”
ໃນການສຳຫຼວດ ພວກນັກໂທດຄັ້ງຫຼ້າສຸດຂອງຕົນ ຄະນະກຳມະການປົກປ້ອງນັກຂ່າວພົບວ່າ ມາຈົນຮອດວັນທີ 1 ທັນວາ ປີ 2020 ຜ່ານມານີ້ ຫວຽດນາມໄດ້ຈັບກຸມຄຸມຂອງພວກນັກຂ່າວຢ່າງໜ້ອຍ 15 ຄົນຍ້ອນພວກເຂົາເຈົ້າໄດ້ເຮັດວຽກຂອງເຂົາເຈົ້າ ເຮັດໃຫ້ຫວຽດນາມກາຍ ເປັນປະເທດຈັບກຸມຄຸມຂັງນັກຂ່າວຫຼາຍເປັນອັນດັບສອງ ຢູ່ໃນເຂດເອເຊຍ.
ທ່າອຽງໃນທາງທີ່ບໍ່ດີດັ່ງກ່າວ ຍັງດຳເນີນຢູ່ຕໍ່ມາໃນປີ 2021. ເມື່ອວັນທີ 28 ຕຸລາຜ່ານມານີ້ ສານຫວຽດນາມໄດ້ຕັດສິນລົງໂທດນັກຂ່າວ 5 ຄົນທີ່ເຮັດວຽກໃຫ້ແກ່ກຸ່ມນັກຂ່າວ ບາວ ຊັກ ຫຼືກຸ່ມນັກຂ່າວມືສະອາດ ແລະໄດ້ຕັດສິນລົງໂທດໃຫ້ພວກເຂົາເຈົ້າຖືກຄຸມຂັງຫຼາຍໆປີຍ້ອນ “ໃຊ້ສິດເສລີພາບປະຊາທິປະໄຕໄປໃນທາງຜິດ” ພາຍໃຕ້ມາດຕາ 331 ຂອງກົດໝາຍອາຍາຫວຽດນາມ.
ຈຸງ ຊາວ ຫູ ດານ ຜູ້ກໍ່ຕັ້ງກຸ່ມນັກຂ່າວ ບາວ ຊັກ ໄດ້ຖືກຕັດສິນໂທດ ໃຫ້ຕິດຄຸກ 4 ປີເຄິ່ງ. ດວນ ກຽນ ຈຽງ ແລະ ເລ ເຖ ທັງ ໄດ້ຮັບໂທດຜູ້ລະ 3 ປີໃນຂະນະທີ່ ຫງຽນ ຟຸກ ຈຶງ ບາງ ແລະ ຫງຽນ ທັນ ຫງ່າ ໄດ້ຮັບໂທດ ຜູ້ລະ 2 ປີ. ນອກນັ້ນ ພວກນັກຂ່າວທັງ 5 ຍັງໄດ້ຖືກຫ້າມ ບໍ່ໃຫ້ເຮັດວຽກເປັນນັກຂ່າວ 3 ປີ ຫຼັງຈາກໄດ້ຮັບໃຊ້ໂທດ ຄົບຕາມກຳນົດແລ້ວ.
ໃນຖະແຫຼງການ ທີ່ເປັນລາຍລັກອັກສອນສະບັບນຶ່ງ ໂຄສົກຂອງກະຊວງການຕ່າງປະເທດສະຫະລັດ ທ່ານເນດ ໄພຣສ໌ ກ່າວວ່າ ສະຫະລັດ “ມີຄວາມເປັນຫ່ວງຢ່າງເລິກເຊິ່ງ ໃນການຕັດສິນໂທດດັ່ງກ່າວ. ທ່ານໄພຣສ໌ ເວົ້າວ່າ “ພວກເຮົາເຂົ້າໃຈດີວ່າ ນັກຂ່າວຈຸນີ້ໄດ້ເພັ່ງເລັງການລາຍງານຂ່າວແບບສືບສວນໃສ່ການຄໍລັບຊັ່ນ ຊຶ່ງແນ່ນອນມັນບໍ່ແມ່ນອາຊະຍາກຳ. ການຕັດສິນໂທດພວກນັກຂ່າວທັງ 5 ແມ່ນທ່າອຽງໃນທາງທີ່ບໍ່ດີຫຼ້າສຸດ ກ່ຽວກັບການຈັບກຸມຄຸມຂັງແລະການຕັດສິນລົງໂທດ ພວກນັກຂ່າວແລະປະຊາຊົນຊາວຫວຽດນາມທີ່ໄດ້ຊົມໃຊ້ສິດທິຂອງເຂົາເຈົ້າກ່ຽວກັບອິດສະຫຼະພາບໃນການປາກເວົ້າແລະອິດສະຫຼະພາບດ້ານການຂ່າວ ດັ່ງທີ່ໄດ້ລະບຸໄວ້ຢູ່ໃນລັດຖະທຳມະນູນຂອງຫວຽດນາມ.
ທ່ານເນດ ໄພຣສ໌ ປະກາດວ່າ “ສະຫະລັດ ຂໍຮຽກຮ້ອງໃຫ້ເຈົ້າໜ້າທີ່ຫວຽດນາມ ປົກປ້ອງຄຸ້ມຄອງອິດສະຫຼະພາບເຫຼົ່ານີ້ ປ່ອຍພວກນັກຂ່າວທັງ 5 ແລະພວກທີ່ຖືກຈັບກຸມຄຸມຂັງແບບບໍ່ເປັນທຳທັງໝົດ ແລະອະນຸຍາດໃຫ້ທຸກສ່ວນບຸກຄົນຢູ່ໃນຫວຽດນາມ ສາມາດສະແດງອອກຊຶ່ງທັດສະນະຄວາມເຫັນ ຂອງພວກເຂົາເຈົ້າໄດ້ຢ່າງເສລີ ແລະໂດຍປາສະຈາກຄວາມຢ້ານກົວ ທີ່ຈະຖືກແກ້ແຄ້ນຄືນ. ພວກເຮົາຂໍຮຽກຮ້ອງໃຫ້ລັດຖະບານຫວຽດນາມ ຈົ່ງໃຫ້ການຄ້ຳປະກັນວ່າ ການກະທຳຂອງຕົນແມ່ນສອດຄ່ອງກັບຂໍ້ກຳນົດວ່າດ້ວຍສິດທິມະນຸດ ຢູ່ໃນລັດຖະທຳມະນູນຂອງຫວຽດນາມ ແລະພັນທະສາກົນຂອງຕົນ.”