Accessibility links

Breaking News

Jefò Kontinye pou Diminye Tansyon sou Frontyè Ikrèn


US military aid for Ukraine

Sa se yon editorial ki bay opinyon gouvènman Ameriken an

Apre yon semèn aktivite diplomatik entans sou plan entènasyonal la konsènan agresyon militè La Risi kap kontinye tou pre frontyè Ikrèn, Sekretè d'Eta Antony Blinken ap kontinye jefò diplomatik li pou dezamòse kriz la. Jou ki te 19 Janvye, li te rankontre Prezidan Ikròn nan, Volodymyr Zelenskyy ak Minis Afò Etranje Dmytro Kuleba nan Kyèv. Li gen pou'l rankontre Minis Afè Etranjè Ris la Sergei Lavrov nan Jenèv 21 Janvye.

Nan diskou li te pwononse nan Anbasad Etazini nan Kyiv anvan konsiltasyon ni ak responsab Ikrenyen yo, Sekretè Blinken te lanse avètisman pou di si La Risi anvayi Ikrèn pi plis, se pral yon defi pou prensip de baz ki soutni sistèm entènasyonal la ki kle pou mentni lapè. Prensip sa a di yon peyi paka chanje frontyè yon lot pa lafos; yon peyi paka dikte chwa yon lot peyi; epi peyi paka fè lot peyi egzijans pou eseye kontwole yo.

"Si nou kite yo vyole prensip sa yo ak enpinite, nou pral louvri yon gwo bwat Pandora, e le mond ap veye," Sekretè Blinken deklare.

Apre rankont li ak wo responsab Ikrenyen yo, Sekretè Blinken te bay yon konferans pou laprès ak Minis Afè Etranje Kuleba. Li te souliyen yon lot fwa anko ke Etazini "pran angajman fèm vizavi souvrènte Ikrèn ak entegrite teritoryal li." Se poutèt sa, sekretè a di " Nou pral kontinye jefo san pran souf pou'n anpeche yon lot agresyon e pou ankouraje diyalog ak lapè."

An menm tan, Sekretè Blinken fè remake, "Nou kontinye ede Ikrèn ogmante kapasite li genyen pou'l defann tèt li, epi di klèman ki konsekand Etazini ak Ewop pare pou enpoze sou Moskou si li rejte chimen diplomatik la... e kontinye pouse pou pi devan ak envasyon san rezon, san pwovokasyon, inakeptab li a ak jefo pou destabilize Ikrèn."

Sekretè Blinken mete aksan sou ide ke "demokrasi nou gen fos, jefo pou'n dekouraje Moskou ak nempot ki repons fak ak zak agresyon li yo se inite -- pami alye nou ak patnè nou yo, ansanm ak nan andedan Ikrèn...fok Ikrenyen yo kole tèt ansanm, sitou kounyea."

Men li fè remake youn nan objektif La Risi ap pouswiv depi lontan "se eseye simen divizyon nan Ikrèn, pou rann ni pi difisil pou Ikrenyen yo travay ansanm pou reyalize anbisyon Ewo-demokratik yo...pa kite Moskou divize nou," li deklare.

"Pandan nou kanpe pou fè fas ak jefo pou divize nou, kraponnen nou, menase nou," Sekretè Blinken deklare, "Etazini kanpe bo kote'w pou apiye dwa ou genyen pou pran desizyon poukont ou sou avni ou, epi chwazi yon avni antanke Ikrenyen pou Ikrèn."

Sete yon editoryal ki reflete opinyon gouvenman Ameriken an.

XS
SM
MD
LG