ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ຮອງລັດຖະມົນຕີກະຊວງການຕ່າງປະເທດສະຫະລັດ ຮັບຜິດຊອບກິດຈະການດ້ານການເມືອງ ທ່ານນາງວິກທໍເຣຍ ນູແລນ ເມື່ອໄວໆມານີ້ ໄດ້ນຳພາຄະຜູ້ແທນທີ່ມາຈາກຫຼາຍໆພະແນກການກ່ຽວກັບປະເທດທີ່ສຳຄັນໆໃນເຂດຊາແຮລ ປະກອບມີ ມໍຣິເຕເນຍ ມາລີ ໄນເຈີ ແລະ ເບີກີນາຟາໂຊ.
ຄະນະຜູ້ແທນຂອງສະຫະລັດ ໄດ້ພົບປະກັບລັດຖະບານ ກອງທັບ ແລະພວກຜູ້ນຳສັງຄົມພົນລະເຮືອນ ເພື່ອປຶກສາຫາລືກ່ຽວກັບດ້ານຄວາມໝັ້ນຄົງ ການປົກຄອງ ແລະການພັດທະນາ.
ນຶ່ງໃນໄພຂົ່ມຂູ່ທີ່ຮ້າຍແຮງສຸດ ທີ່ສີ່ປະເທດກຳລັງປະເຊີນໜ້າຢູ່ໃນເວລານີ້ ກໍຄືການກໍ່ຄວາມຮຸນແຮງທີ່ເພີ້ມທະວີຂຶ້ນຂອງພວກກໍ່ການຮ້າຍ. ຢູ່ໃນກອງປະຊຸມຖະແຫຼງຂ່າວ ຫຼັງຈາກການເດີນທາງກັບຄືນປະເທດ ຮອງລັດຖະມົນຕີກະຊວງຕ່າງປະເທດນູແລນ ໃຫ້ຂໍ້ສັງເກດວ່າ ສະຫະລັດພວມເຮັດວຽກຢ່າງໃກ້ຊິດກັບກອງທັບຂອງປະເທດມໍຣິເຕເນຍ ໄນເຈີ ເບີກີນາຟາໂຊ ເພື່ອໃຫ້ການສະໜັບ ສະໜຸນແກ່ກອງທັບເຫຼົ່ານີ້ ໃນການດຳເນີນຄວາມພະຍາຍາມ ຂອງພວກເຂົາເຈົ້າເພື່ອໃຫ້ຄວາມຄຸ້ມຄອງ ແກ່ປະຊາຊົນຂອງພວກເຂົາເຈົ້າ. ທ່ານນາງກ່າວເຖິງປະເທດມໍຣິເຕເນຍວ່າ ເປັນ “ບ່ອນທີ່ມີສະຖຽນລະພາບມາໄດ້ 10 ປີ ຢູ່ທ່າມກາງບັນດາປະເທດເພື່ອນບ້ານທີ່ວຸ້ນວາຍທີ່ສຸດ” ແລະໄດ້ກ່າວຊົມເຊີຍຕໍ່ຄວາມສຳເລັດຂອງມໍຣິເຕເນຍ ດ້ວຍການໃຫ້ຄວາມສະໜັບສະໜຸນ ຂອງສະ ຫະລັດ ແລະປະເທດອື່ນໆອີກ ໃນການຕໍ່ສູ້ກັບພວກກໍ່ການຮ້າຍ. ທ່ານນາງໃຫ້ຂໍ້ສັງເກດວ່າ ແນວໃດກໍຕາມ ຄວາມເປັນຫ່ວງກັງວົນຂອງພວກຜູ້ນຳມໍຣິເຕເນຍແມ່ນເຫດການຢູ່ໃນປະເທດມາລີ ໂດຍສະເພາະແລ້ວແມ່ນການເຂົ້າໄປມີໜ້າຂອງກຳລັງກຸ່ມແວັກເນີ ທີ່ໄດ້ຮັບການໜຸງຫຼັງຈາກວັງເຄຣັມລິນ.
ນັບຕັ້ງແຕ່ມີການສົ່ງກຳລັງຂອງກຸ່ມແວັກເນີເຂົ້າໄປໃນປະເທດມາລີ ເມື່ອທ້າຍປີກາຍ ເຫດການກ່ຽວກັບພວກກໍ່ການຮ້າຍ ກໍໄດ້ເພີ້ມຂຶ້ນຢ່າງຫຼວງຫຼາຍ. ນອກ
ນັ້ນແລ້ວ “ຍັງມີການລະເມີດສິດທິມະນຸດ ຢູ່ທົ່ວຂົງເຂດ ບ່ອນທີ່ພວກເຂົາເຮັດ
ວຽກ” ນັ້ນຄືຄຳເວົ້າຂອງທ່ານນາງນູແລນ. “ພວກເຮົາມີຄວາມເປັນຫ່ວງກັງວົນ
ຢ້ານວ່າ ກຳລັງເຫຼົ່ານີ້ ບໍ່ໄດ້ໃຫ້ຄວາມສົນໃຈ ໃນເລື້ອງຄວາມປອດໄພ ແລະຄວາມໝັ້ນຄົງ ຂອງປະຊາຊົນໃນປະເທດມາລີ ແຕ່ແທນທີ່ພວກເຂົາໃຫ້ຄວາມສົນໃຈ ໃນການສ້າງຮັ່ງຄູນມີໃຫ້ແກ່ພວກເຂົາເອງ ແລະທຳການຂຸດແຮ່ທາດຢູ່ ໃນປະເທດດັ່ງກ່າວ ຊຶ່ງເຮັດໃຫ້ສະຖານະການດ້ານການກໍ່ການຮ້າຍ ຊຸດໂຊມລົງຕື່ມ.” ຮອງລັດຖະມົນຕີການຕ່າງປະເທດນູແລນໃຫ້ຂໍ້ສັງເກດວ່າ ຍ້ອນການກໍ່ລັດຖະປະຫານໃນປະເທດມາລີ ສະຫະລັດຈຶ່ງໄດ້ຖືກຈຳກັດພາຍໃຕ້ກົດໝາຍ ເພື່ອຈະໃຫ້ການສະໜັບສະໜຸນຕໍ່ກຳລັງຂອງຝ່າຍລັດຖະບານ ແລະສະຖານະການຢູ່ທີ່ນັ້ນ ແມ່ນຮວມຮ້າຍແຮງຂຶ້ນຕື່ມ ຫຼັງຈາກການຕັດສິນໃຈຂອງພວກຜູ້ນຳມາລີ ທີ່ໄດ້ເຊື້ອເຊີນໃຫ້ກຳລັງຂອງກຸ່ມແວັກເນີເຂົ້າໄປໃນປະເທດດັ່ງກ່າວ. “ພວກເຮົາຈະບໍ່ປະຕິບັດງານຢູ່ໃນພື້ນທີ່ດຽວກັນ” ນັ້ນຄືຄຳເວົ້າຂອງທ່ານນາງ.
ແຕ່ໃນທາງບວກ ຮອງລັດຖະມົນຕີການຕ່າງປະເທດນູແລນ ໃຫ້ຂໍ້ສັງເກດວ່າ ລັດຖະບານຊົ່ວຄາວຂອງມາລີ ເບິ່ງຄືວ່າ ຈະປະຕິບັດຕາມຄຳໝັ້ນໝາຍຂອງຕົນຫຼືບໍ່ ທີ່ຈະຈັດໃຫ້ມີການເລືອກຕັ້ງໃນປີ 2024.
ນອກນັ້ນ ທ່ານນາງຍັງເວົ້າວ່າ ໃນລະຫວ່າງການເດີນທາງໄປຢ້ຽມຢາມເບີກີນາຟາໂຊຂອງທ່ານນາງ ປະທານາທິບໍດີຊົ່ວຄາວ ທ່ານອີບຣາຮິມ ຕຣາໂອເລແລະຄະນະຂອງທ່ານ ກ່າວຕໍ່ທ່ານນາງແບບບໍ່ມີຄວາມຄຸມເຄືອໃດໆເລີຍວ່າ “ມັນຈະແມ່ນຊາວເບີກີນາ ຜູ້ທີ່ຈະປົກປ້ອງຄວາມໝັ້ນຄົງ ຂອງປະເທດຊາດ ແລະພວກເຂົາເຈົ້າບໍ່ມີຄວາມຕັ້ງໃຈ ທີ່ຈະເຊື້ອເຊີນໃຫ້ກຸ່ມແວັກເນີເຂົ້າໄປ.”
ເປັນເລື້ອງໜ້າເສົ້າໃຈທີ່ເຂດຊາແຮລໄດ້ກາຍເປັນສູນກາງຂອງພວກກໍ່ການຮ້າຍ. ຄຳຕອບແມ່ນບໍ່ສາມາດທີ່ຈະໂຍນໄປໃຫ້ກອງກຳລັງທີ່ບໍ່ມີຄວາມເປັນຫ່ວງກັງວົນຕໍ່ຄວາມຢູ່ດີມີສຸກ ຂອງປະຊາຊົນ ທີ່ອາໄສຢູ່ບ່ອນນັ້ນ. ສະຫະລັດຈະສືບຕໍ່ເຮັດວຽກກັບບັນດາປະເທດພາຄີ ເພື່ອຊ່ວຍເຫຼືອປະຊາຊົນໃນເຂດດັ່ງກ່າວ ຮັບມືກັບບັນຫາທ້າທາຍທາງດ້ານຄວາມໝັ້ນຄົງ ທີ່ພວກເຂົາເຈົ້າພວມປະເຊີນໜ້າຢູ່.