Në një takim të fundit, Sekretari i Shtetit Antony Blinken dhe Sekretari i Jashtëm britanik James Cleverly riafirmuan mbështetjen e tyre për Ukrainën ndërsa ajo mbrohet nga sulmet brutale të Rusisë.
Sekretari Blinken përshëndeti angazhimin e Mbretërisë së Bashkuar për të dërguar tanke Challenger 2 dhe sisteme shtesë artilerie në Ukrainë, elementë që do të vazhdojnë të përforcohen dhe të shtojnë atë që Shtetet e Bashkuara kanë ofruar.
“Ne mbetemi të bashkuar në forcimin e ndihmës sonë humanitare për popullin ukrainas”, tha sekretari Blinken. Për të parandaluar një katastrofë më të madhe humanitare, Shtetet e Bashkuara janë bashkuar në ushtrimin e presionit ekonomik përmes sanksioneve dhe kontrolleve të eksportit ndaj Moskës, të krijuara për t'i privuar Rusisë burimet që i nevojiten për të vazhduar të ushqejë makinën e saj të luftës.
“Ne po ndërmarrim këto përpjekje dhe më shumë për ta vendosur Ukrainën në pozicionin më të fortë të mundshëm kur të shfaqet një tryezë negociuese – në mënyrë që të mund të ketë një paqe të drejtë dhe të qëndrueshme”, tha sekretari Blinken.
Në lidhje me Iranin, Shtetet e Bashkuara qëndrojnë me qeverinë britanike në “dënimin e ekzekutimit nga Irani të shtetasit të dyfishtë iraniano-britanik Alireza Akbari, i cili ishte i motivuar politikisht dhe i padrejtë. Ai i përshtatet një modeli abuzimi nga regjimi: ndalime, tortura, rrëfime të detyruara, ekzekutime të padrejta”, tha Sekretari Blinken:
“Ne do të vazhdojmë të punojmë me Mbretërinë e Bashkuar dhe aleatët dhe partnerët tanë të tjerë për të mbajtur përgjegjëse udhëheqësit e Iranit për këto dhe abuzime të tjera. Ne do të vazhdojmë të qëndrojmë me iranianët e guximshëm që po ngrihen për të drejtat e tyre themelore të udhëhequra nga gratë e reja – e gjithë kjo përballë një represioni të jashtëzakonshëm”.
Republika Popullore e Kinës ishte gjithashtu një temë diskutimi. Sekretari Blinken “përshëndeti angazhimin e Mbretërisë së Bashkuar për të thelluar angazhimin e saj në Indo-Paqësor. Ne mezi presim të vazhdojmë konsultimet tona të ngushta për një mori çështjesh në rajon, duke përfshirë ruajtjen e paqes dhe stabilitetit përgjatë ngushticës së Tajvanit”.
Në temën e Irlandës së Veriut, Sekretari Blinken pohoi mbështetjen e SHBA-së për Marrëveshjen e së Premtes së Mirë të Belfast-it. Shtetet e Bashkuara besojnë se duhet të ketë një zgjidhje të negociuar për zbatimin e Protokollit të Irlandës së Veriut që është e pranueshme nga të gjitha palët. Mbretëria e Bashkuar dhe Bashkimi Evropian kohët e fundit kanë bërë përparim thelbësor drejt një zgjidhje të negociuar.
Shtetet e Bashkuara dhe Mbretëria e Bashkuar, tha Sekretari Blinken, "po shtojnë një kapitull tjetër në një histori shumë të gjatë të kësaj Marrëdhënieje Speciale në një kohë kur ajo nuk mund të ishte më e rëndësishme dhe nuk mund të ishte më imediate".