Pikëpamja e qeverisë së SHBA

Sekretari i Shtetit Antony Blinken udhëtoi kohët e fundit në Jordani dhe Turqi për të ndihmuar në koordinimin e përpjekjeve në të gjithë rajonin për të mbështetur popullin sirian "në tranzicionin nga regjimi i Asadi".

“Ne nuk jemi të përqendruar në zgjedhjen e një rruge për Sirinë, por t’u siguruar që vetë populli sirian të ketë mundësinë të zgjedhë rrugën e tij përpara”, tha ai në një konferencë për shtypin në Jordani.

Sekretari Blinken tha se për një tranzicion të suksesshëm nevojitet një qeveri kalimtare që respekton disa parime bazë.

“Ajo duhet të mbrojë të drejtat e të gjithë sirianëve, përfshirë ato të pakicave dhe grave. Qeveria e re duhet të mbrojë institucionet e shtetit dhe të ofrojë shërbimet bazë. Ne duhet të sigurohemi që qeveria e përkohshme të angazhohet që Siria të mos përdoret si bazë për terrorizmin, ekstremizmin dhe të mos përbëjë një kërcënim për fqinjët e saj ose aleatët me grupe si ISIS-i. Ajo gjithashtu duhet të angazhohet në sigurimin dhe shkatërrimin e të gjitha armëve kimike.”

Sekretari Blinken tha se në bisedën e tij me aleatët në rajon, "të gjithë ishin dakord se duhet të ketë një qasje të unifikuar për të çuar përpara shumë nga interesat tona të përbashkëta".

“Ne gjithashtu do të jemi të përqëndruar në frenimin e çdo aktori brenda ose jashtë vendit që të vendosë interesat e ngushta personale mbi interesat e popullit sirian, veçanërisht në këtë moment delikat. Dhe kjo përfshin, natyrisht, ISIS-in, i cili pa dyshim se do të përpiqet të forcohet. Unë mendoj se tashmë është dëshmuar se Shtetet e Bashkuara janë të vendosura për të frenuar përpjekjet e këtij lloji.”

Sipas Sekretari Blinken, këto parime “kanë për qëllim të pasqyrojnë nevojat, aspiratat dhe vullnetin e popullit sirian. Synimi i tyre nuk është të diktojë se çfarë duhet të bëjnë sirianët, por për të siguruar që ata të kenë mundësinë të ndjekin rrugën e tyre.”

“Për herë të parë në dekada Siria ka një mundësi që të ketë një qeveri që nuk kontrollohet nga një diktator si Asadi, nga një fuqi e jashtme apo ISIS-i, por nga populli sirian”, tha ai.

Sekretari Blinken deklaroi: "ne jemi të vendosur të bëjmë gjithçka që mundemi, duke punuar në koordinim të ngushtë me partnerët, për të ndihmuar popullin sirian të realizojë këtë aspiratë."

Në Siri, pas pesëdhjetë vjet sundimi me grusht të hekurt nga familja al-Assad dhe luftës civile 13 vjeçare, regjimi i Presidentit Bashar al-Assad u rrëzua. Në pak më shumë se një javë, forcat rebele islamike pushtuan qytetet e Alepos, Homsit dhe Damaskut, duke marrë kontrollin e tyre, ndërsa trupat qeveritare u tërhoqën dhe al-Assadi u largua nga vendi.

Presidenti Joe Biden tha në Shtëpinë e Bardhë se “Ky regjim ishte brutal, ushtroi torturë dhe vrau qindra mijëra sirianë të pafajshëm”. Ai e quajti rënien e tij "një akt themelor drejtësie".

“Është një moment i mundësisë historike për popullin e shumëvuajtur të Sirisë për të ndërtuar një të ardhme më të mirë për vendin e tyre krenar. Është gjithashtu një moment rreziku dhe pasigurie”, tha ai.

Grupi rebel Hayat Tahrir al-Sham, që udhëhoqi operacionet për përmbysjen e regjimit, është shpalur organizatë terroriste nga Shtetet e Bashkuara dhe OKB-ja. Presidenti Biden paralajmëroi se "disa nga grupet rebele që rrëzuan al-Assadin kanë histori të zymta të akteve tërroriste dhe shkeljes së të drejtave të njeriut".

"Ne kemi dëgjuar deklaratat e udhëheqësve të këtyre grupeve rebele në ditët e fundit", tha ai. "Ata po thonë gjërat e duhura tani, por ndërsa marrin përgjegjësi më të mëdha, ne do të vlerësojmë jo vetëm fjalët por edhe veprimet e tyre."

Presidenti Biden theksoi se Shtetet e Bashkuara do të vazhdojnë misionin e tyre kundër Shtetit Islamik në Siri.

“Ne jemi të vetëdijshëm për faktin se Shteti Islamik do të përpiqet të përfitojë nga çdo moment dobësie për t’u rikthyer në vend dhe për të krijuar zona të sigurta. Ne nuk do ta lejojmë këtë.”

Për këtë arsye më 8 dhjetor, forcat amerikane kryen dhjetëra sulme ajrore kundër udhëheqësve, operativëve dhe kampeve të Shtetit Islamik në Sirinë qendrore. "Të gjitha organizatat në Siri duhet ta dinë se ne do t'i mbajmë ato përgjegjës nëse e mbështesin Shtetin Islamik në çfarëdo mënyre", tha komandanti i shtabit qendror të ushtrisë amerikane, gjenerali Erik Kurilla.

Presidenti Biden u zotua se do të punonte me "të gjitha grupet siriane ... për të siguruar një tranzicion larg regjimit të al-Asadit dhe drejt një Sirie të pavarur e sovrane".

“Tani është detyrë e të gjitha grupeve opozitare që kërkojnë një rol në qeverisjen e Sirisë dhe të demonstrojnë përkushtimin e tyre ndaj të drejtave të të gjithë sirianëve, sundimit të ligjit dhe mbrojtjes së pakicave fetare dhe etnike.”

"Shtetet e Bashkuara do të bëjnë gjithçka që munden për të mbështetur popullin sirian, duke përfshirë dërgimin e ndihmave humanitare", tha Presidenti Biden, "për të ndihmuar në rimëkëmbjen e Sirisë nga lufta mbi dhjetë vjeçare dhe brutalitetin dhjetëra vjeçar i familjes al-Assad".