Pikëpamja e qeverisë së SHBA

Takimi në Riad mes delegacioneve të kryesuara nga Sekretari i Shtetit i Marco Rubio dhe Ministri i Jashtëm rus Sergei Lavrov ishte i pari i zyrtarëve të lartë të Shteteve të Bashkuara dhe Rusisë në vite.

Sekretari Rubio tha se dy palët ranë dakord për katër parime. Parimi i i parë është rivendosja e misioneve diplomatike me funksione normale në dy vendet përkatëse.

“Së dyti, ne do të caktojmë një ekip të nivelit të lartë për të ndihmuar negociatat dhe për të punuar në përfundimin e konfliktit në Ukrainë në një mënyrë të qëndrueshme dhe të pranueshme për të gjitha palët e angazhuara. Së treti, ne do të fillojmë të punojmë edhe në një nivel të lartë, për të disktuar dhe shqyrtuar bashkëpunimin gjeopolitik dhe ekonomik, që do të rezultonte nga përfundimi i konfliktit në Ukrainë. Dhe gjëja e fundit për të cilën ramë dakord është që ndërsa ekipet tona do të punojnë për të gjithë këtë, ne të pestit që ishim këtu sot do të mbetemi të angazhuar në këtë proces për t'u siguruar që po ecën përpara në një mënyrë produktive.”

Këshilltari i Shtëpisë së Bardhë për Sigurinë Kombëtare Michael Waltz theksoi se fundi i luftës në Ukrainë duhet të jetë i përhershëm, jo i përkohshëm.

“Do të ketë disa diskutime për territorin dhe për garancitë e sigurisë. Këto janë vetëm bazat themelore të diskutimit. Por unë mendoj se pjesa më e rëndësishme është se Presidenti Trump ka shprehur dëshirën dhe vendosmërinë e tij për t'i dhënë fund kësaj lufte, për t'i dhënë fund vrasjeve që po ndodhin, vdekjes dhe shkatërrimit që po ndodh ndërsa kjo luftë vazhdon".

Nëse lufta në Ukrainë përfundon në një mënyrë të pranueshme për të gjitha palët, Shtetet e Bashkuara dhe Rusia do të fillojnë të angazhohen në identifikimin e zonave me interes dhe mundësi të përbashkëta, tha Sekretari i Shtetit Marco Rubio.

“Çështje që shpresojmë se do të jetë në të mirë të botës dhe gjithashtu do të përmirësojë marrëdhëniet tona në aspektin afatgjatë. Megjithatë, çelësi që hap derën për ato mundësi është fundi i këtij konflikti.”

“Ka ende shumë punë. Sot ishte hapi i parë i një rrugëtimi të gjatë dhe të vështirë. Por ky ishte një hap shumë i rëndësishëm”, tha Sekretari Rubio.

Ndërsa bota i afrohet përvjetorit të tretë të fillimit të luftës Rusi-Ukrainë, "mesazhi ynë është i qartë: gjakderdhja duhet të ndalet dhe kjo luftë duhet të përfundojë", deklaroi Sekretari i Mbrojtjes Pete Hegseth në Takimin e Grupit të Kontaktit për Mbrojtjen e Ukrainës në Bruksel.

“Presidenti Trump synon t'i japë fund kësaj lufte me diplomaci dhe duke sjellë Rusinë dhe Ukrainën në tavolinën e negociatave. Dhe Departamenti i Mbrojtjes do të ndihmojë në arritjen e këtij qëllimi.”

"Ne do t'i japim fund kësaj lufte shkatërruese dhe do të vendosim një paqe të qëndrueshme duke kombinuar forcën aleate me një vlerësim realist të situatës në fushën e betejës", tha Sekretari Hegseth.

“Ashtu si ju, ne duam një Ukrainë sovrane dhe të begatë. Por ne duhet të fillojmë duke e pranuar se kthimi në kufijtë e Ukrainës para vitit 2014 është një objektiv jorealist. Përpjekjet për arritjen e këtij qëllimi vetëm do të zgjasnin luftën dhe do të shtonin vuajtjet.”

"Shtetet e Bashkuara nuk besojnë se anëtarësimi në NATO për Ukrainën është rezultat real i një zgjidhjeje të negociuar", tha Sekretari Hegseth.

“Në vend të kësaj, çdo garanci sigurie duhet të mbështetet nga trupa të afta evropiane dhe jo-evropiane. Nëse këto trupa dislokohen si paqeruajtës në Ukrainë, ato duhet të vendosen si pjesë e një misioni që nuk do të drejtohej nga NATO dhe nuk do kishte detyrim ndaj nenit të pestë të aleancës veriatltantike. ”

"Ruajtja e sigurisë në Evropë duhet të jetë një detyrim i domosdoshëm për anëtarët evropianë të NATO-s", theksoi Sekretari Hegseth.

“Në kuadër të kësaj, Evropa duhet të sigurojë pjesën dërrmuese të ndihmës së ardhshme ushtarake dhe jo-ushtarake për Ukrainën. ...Kjo do të kërkonte pjesërisht biseda të sinqerta me njerëzit tuaj mbi mënyrën se si ky kërcënim mund të përballohet vetëm duke shpenzuar më shumë për mbrojtjen. Dy për qind (e prodhimit të brendshëm bruto) nuk mjaftojnë. Presidenti Trump ka bërë thirrje për shpenzime në fushën e mbrojtjes në nivel 5 për qind të prodhimit të brendshëm bruto dhe unë jam dakord me këtë”.

Ndërsa Shtetet e Bashkuara i japin përparësi frenimit të luftës me Kinën në Paqësor, "aleatët evropianë duhet të marrin më shumë përgjegjësi udhëheqëse në këtë front", theksoi Sekretari Hegseth. "Së bashku, ne mund të ndajmë punët për të nxjerrë maksimumin nga avantazhet tona si në Evropë ashtu edhe në Paqësor."

"Aleanca jonë transatlantike ka qëndruar për dekada", tha Sekretari Hegseth, "dhe ne presim që ajo të vazhdojë edhe për brezat që do të vijnë."

“Por Shtetet e Bashkuara nuk do të tolerojnë më një marrëdhënie të çekuilibruar që inkurajon varësinë. Përkundrazi, marrëdhënia jonë do t'i japë përparësi fuqizimit të Evropës që ajo të mbajë përgjegjësinë për sigurinë e saj. Presidenti Trump pret të punojë së bashku për të vazhduar këtë diskutim të sinqertë mes miqsh dhe për të arritur paqen përmes forcës së bashku.”