Kounyea, yon editoryal ki reflete pozisyon gouvènman Etazini an:
Repiblik Kore rete yon alye estratejik ki enpòtan anpil e ki byen ak Etazini depi lontan. Pou ranfòse koperasyon ant 2 peyi yo, Sekretè Deta Anthony Blinken ak Minis Afè Etranjè Kore di Sid Park Jin siyen yon Akò Syans ak Teknoloji Amande ant Etazini ak Repiblik Kore:
“Akò jodia pwal laji koperasyon an, nan domèn kote nou te travay lontan tankou lespas, men tou nan domèn ki fèk ap parèt tankou byoteknoloji, radyasyon fizik, entelijans atifisyèl.
Koperasyon syantifik se sèlman youn nan plizyè domèn kote nasyon nou yo ap travay ansanm nan benefis popilasyon nou yo”.
Etazini ak Kore di Sid kontinye gen relasyon sou sekirite ki ap dire, dapre Sekretè Deta Anthony Blinken: “Nou reyafime angajman nou pou amelyore defans alye nou yo kont menas ke nou gen an komen, ansanm ak angajman pou nou defann Repiblik Kore, nan sèvi ak kapasite zam Etazini ki ka tire lwen, antwòt kapasite defans nikleyè, konvansyonèl, e ak misil… Nou rete angaje nan lide pou elimine zam nikleyè nèt sou preskil Kore a.
Sekretè Deta Blinken ensiste sou enpòtans lapè ak estabilite nan Detwa Taiwann nan:
« Nou ap ogmante koperasyon pou sekirite ant 3 peyi, ak Japon, sa ki mete nou nan pozisyon pi djanm pou abòde menas sekirite ke nou pataje, pami yo kesyon Repiblik Demokratik Popilè Kore a ki ap lanse misil ilegalman ak san prekosyon… Nou ap ranfòse tou kolaborasyon ant 3 peyi yo sou lòt defi nan domèn sekirite, ak nan ede peyi nan Zile Pasifik yo adapte yo ak efè chanjman klima yo ki ap ogmante.
Nou ap travay ak lòt peyi pou fè vanse priyorite ke nou gen an komen, tankou amelyore pwosperite ekonomik kote tout moun jwenn, nan rejyon Endo-Pasifik la ak pi lwen toujou, tankou nan Kad Travay Endo-Pasifik pou Pwosperite ak Tèt-kole pou Sekirite Minrè yo.
Alyans Etazini-Repiblik Kore a ale byen lwen pase rejyon Endo-Pasifik la. Depi Prezidan Putin te fin anvayi Ikrèn nan, Etazini ak Repiblik Kore kanpe men nan men, ansanm ak lòt alye, pou enpoze sanksyon ki pa te janm ekziste anvan ak kontwòl sou ekspòtasyon pou fè LaRisi paka jwenn resous pou machin lagè li a, e pou sipòte moun Ikrèn pandan y ap defann peyi yo a.
Nan mwa Oktòb ane sa a nou pwal selebre 70èm anivèsè Alyans Etazini-Repiblik Kore a. « Pandan 7 dizèn lane ki pase yo, alyans nou an vrèman vre te mentni lapè, » se deklarasyon Sekretè Deta Blinken. « Mwen gen konfyans ke nou fè yon lòt pa ann avan pou rive nan yon avni ki gen plis sekirite nan benefis pèp tou le 2 peyi nou yo, nan Endo-Pasifik la, e nan mond la. »
Sete yon editoryal ki reflete pozisyon Gouvènman Etazini an.