Kounyea, yon editoryal ki reflete opinyon gouvènman Ameriken an.
Sekretè d Eta Antony Blinken deklare pandan yon konferans pou laprès li te bay nan fen ane 2023 a:
"Nan moman nap vanse pou tanmen ane 2024 la, nou pral kontinye kanpe kòt-a-kòt ak moun ki pataje vizyon nou pou yon mond kote k gen libète, pwosperite, sekirite ak yon sosyete ki ouvè.
"Pou komanse, nou pral kontinye ankouraje peyi toupatou nan mond lan pou yo kontinye apiye libète ak endepandan Ikrèn, pou asire ka zak agresyon Larisi yo rete kòm echèk estratejik," Blinken ajoute.
"Larisi pi fèb militèman, ekonomikman ak diplomatikman. LOTAN pi gran, pi puisan e li pi inifye pase sa nou janm konstate pandan 75 zan egzistans li. Ane sa a nou ajoute 31èm manm LOTAN - an palan de Fenland. Epi La Suèd pral rejwenn nou talè konsa, sa ki pral ogmante pi plis puisans ak kapasite alyans defansiv nou an."
Yon lòt priyorite pou 2024 se pral kontinye angaje ak Lachin apati de yon pozisyon puisan, Sekretè Blinken fè konnen.
"Nap apwofondi kowoperasyon ak kowodinasyon ant LOTAN ak alye nou yo nan rejyon Endo-Pasifik la. Jefò sa yo pèmèt nou angaje yon fason pi efikas lè nap eseye rezoud kè sote nou, tankou pa egzanp taktik komèsyal ak ekonomik Lachin deplwaye pou lolo divès peyi - epi lapè ak stabilite nan detwa Taiwan nan ak rejyon Es ak Sid Lanmè Chin nan - met sou sa gen kestyon dwa moun nan."
Twazyèman, Lèzetazini pran angajman pou travay ak lòt peyi pou byenèt pèp Ameriken an ak moun kap viv toupatou nan mond lan, Blinken deklare.
"Se egzakteman sa nou te fè an 2023, lè nou te fòme kowalisyon gouvènman, biznis, sosyete sivil, enstitisyon rejyonal ak miltilateral pou rezoud ensekirite alimantè; pwomouvwa sistèm AI (Entelijans Atifisyèl) ki si e ke nou ka fè konfyans; pou konbat kriz dwòg sentetik la; pou frennen gouvènman ki arete etranje abitrèman pou sèvi ak yo kòm pyon politik; pou mobilize plizyè santèn milya dola pou tabli enèji fizik, nimerik, ki pwòp, ak enfrastrikti lasante toupatou nan peyi sou devlope yo.
Pa rapò ak konfli ant Izrayèl ak Hamas la, Sekretè Blinken di Etazini pral konsantre sou "ede Izrayèl asire ke sak pase 7 Oktòb la paka janm rive ankò, mete fen nan konfli a pi vit posib an menm tan ke lap minimize pèt lavi ak soufrans sivil yo, travay pou otaj yo ka tounen lakay yo ak fanmi yo, anpeche konfli a pwopaje pi plis epi yon fwa pou tout kraze sèk devastan vyolans la epi pran mezi pou tabli yon lapè dirab."
Lèzetazini kontan travay pou ranfòse alyans ak patenarya li yo pou fè fas ak defi ane 2024 la va poze.
Sete yon editoryal ki reflete opinyon gouvènman Ameriken an.