Kounyea, yon editoryal ki prezante opinyon Gouvènman Etazini an:
Tè Jaden, se yon bagay ki “nan rasin anpil defi ijan pou sekirite nasyonal ki devan nou, » sete deklarasyon Sekretè Deta Antony Blinken nan Woumble Ekonomik Mondyal la nan Davos an Swis.
« Lè pa gen bon tè, nou pa reyisi danre yo, pri yo moute, moun rete grangou. Lè ewozyon detwi tè a, li agrave efè sechrès, inondasyon, ak lòt kondisyon tan ki rive nan ekstremite akoz klima a, sa ki lakoz danre yo redui plis toujou – e kòm rezilta, manje vin pi ra toujou. »
Gen 700 milyon moun kounyea ki pa konnen si yo pwal gen ase manje pou demen. Se pousa Etazini ap travay pou takle kriz manje sa a epi sipòte moun ke li plis afekte, pou repete pawòl Sekretè Blinken :
« Koumanse depi Janvye 2021, Gouvènman Etazini an konsakre 17 milya 500 milyon dola pou ede soutni lavi moun ki nan bezwen. Se yon onè pou nou lè nou finanse plis pase yon tyè nan bidjè Pwogram Alimantè Mondyal. »
Etazini fè patnè tou pou pwodui pi bon danre, ki pi solid, e ki gen plis andirans. Vrèman vre, Misyon Etazini Nouvote nan Agrikilti pou Klima, ansanm ak Emira Arab Ini, mobilize 17 milya dola pou envesti nan efò pou repare tè jaden ki degrade epi kenbe kabòn nan tè a.
Ansanm ak Inyon Afriken an ak Òganizasyon Nasyon Zini pou Manje ak Agrikilti (FAO), Etazini lanse yon nouvo pwogram ki rele Vizyon pou Danre ak Tè ki Adapte, ki gen abreje ann angle VACS. « Li antre nan kad prensipal pwojè USAID a ki rele Feed the Future, Nouri Lavni, » se pawòl Sekretè Blinken:
« Se repons global nou-menm nan Gouvènman Etazini an kont ensekirite alimantè toupatou nan mond la, e nou wè yon solisyon an 3 pwen. E vrèman nou rezime li konsa, 2 eleman prensipal : Dabò nou envesti anlè tè a, nan idantifye danre afriken ki plis gen jèvrin nan yo e ki plis ka andire chanjman klima a, nan amelyore varyete sa yo, nan livre yo bay mond la; an menm tan, nou ap envesti anba tè a, trase plan tè yo, konsève yo, fè tè ki an sante. Si w fè sa kòmsadwa, si w jwenn bon jan semans, si w byen prepare tè a, lè sa a ou gen fondasyon agrikilti w pou lavni. »
Pa gen anpil bagay ki pi enpòtan pou limanite « pase jwenn kouman pou w kiltive planèt tè a pou li ka nouri epi sipòte nou tout, » se pawòl Sekretè Blinken. « Nou gen yon opòtinite nan moman sa a pou nou fè plis pou moun yo jounen jodi a pandan vrèman vre nou ap bati yon avni ke nou ap ka kenbe. »
Sete yon editoryal ki prezante opinyon Gouvènman Etazini an.