Kounyea, yon editoryal ki reflete opinyon Gouvènman Etazini an:
Lavèy Jounen Mondyal Libète Laprès la, Anbasadè Etazini nan Nasyon Zini Linda Thomas-Greenfield te rekonèt kouraj ekstwòdinè jounalis yo ak kontribisyon yo nan lavi toupatou nan mond la.
« Pandan nou ap make lanmò dè douzèn jounalis ki tonbe nan Gaza; pandan gen dè santèn lòt ki rete anba kòd san rezon toupatou nan mond la; e pandan Evan Gershkovich sot make 400 jou li nan yon prizon nan LaRisi, moman kounyea se pa pou selebrasyon, li plis yon apèl ijan pou mande aksyon,” se Anbasadè Thomas-Greenfield ki ap pale. Li di, « E sa se pou fè nou sonje ke yon près lib ak endepandan se poto kwen tout demokrasi. »
“Nou konte sou laprès pou ekspoze kòripsyon epi fè fas kare ak enfòmasyon ki defòme; pou fasilite boukantay lide epi atire atansyon sou abi kont dwa moun,” se pawòl Anbasadè Thomas-Greenfield.
“Nou konte sou jounalis ak travayè laprès pou yo chache verite, pou yo di mond la sa nou bezwen konnen, e pou yo fè moun yo ki gen pouvwa rann kont pou zak yo. Travay sa pi enpòtan jounen jodia pase nan tout tan ki pase, pandan nou ap fè fas ak nouvo defi ki pa te janm prezante anvan kont demokrasi nou yo, kominote nou yo, ak kont lapè entènasyonal e kont sekirite li menm.”
Jounalis kontinye ap sibi nwizans ak kraponnay. Gouvènman ap siveye yo san eksplikasyon epi ilegalman, e nan kèk ka se pwòp gouvènman pa yo. Yo jwenn ak atak sou entènèt e ak kanpay pou defòme enfòmasyon. E gen twòp ka kote yo sibi atak vyolan e kote yo anba kòd san rezon – senpman paske yo di verite.
Krim ke Evan Gershkovich te komèt sete fè repòtaj sou sa ki ap pase nan lagè ilegal LaRisi nan Ikrèn nan, se pawòl Anbasadè Thomas-Greenfield. Li di: “Yo bouche Evan nan prizon pou moutre ke yo pa nan jwèt e ke yo gen fòs. E ke yo gen kontwòl yon sityasyon. Men verite a, se mechanste Kremlen an ki te vize li, e se konsa kanson-fè toupatou nan mond la revele sèlman feblès ak perèz yo. Paske yo konnen listwa pa jwe ak moun ki sèvi ak lafòs kont lòt ki pa dakò ak yo. Ke maspinay toujou jwenn ak rezistans; ke, tankou Doktè [Martin Luther] King te di kòm pawòl selèb, moral linivè toujou pliye anfavè jistis. »
Pami lòt jounalis ki anba kòd gen Alsu Kurmasheva, yon jounalis ris-ameriken ki baze nan Prag, [kapital peyi Tcheki], ki travay pou Radio Ewòp Lib/Radio Libète. Kurmasheva te jwenn arestasyon li nan Kazan, nan LaRisi 18 Oktòb 2023, anba akizasyon ke li pa te enskri non li kòm ajan etranje. E Austin Bennett Tice se yon jounalis etranje ki travay sou kouraj, ke yo te kidnape pandan li te nan repòtaj nan Siri 14 Daout 2012.
Se chak jou Etazini ap travay pou lage jounalis ki nan prizon dèyè do lajistis, e bat pou vyolans ak lòt enjistis ki fèt sou yo pa rete san pinisyon.
Sete yon editoryal ki reflete opinyon Gouvènman Etazini an.