Kounyea, yon editoryal ki reflete opinyon Gouvènman Etazini an:
Sekretè Deta Antony Blinken sot vizite Ayiti pou rankontre ak lidè yo nan peyi a pou fè vanse efò ki ap mennen nan yon Ayiti ki gen sekirite ak demokrasi.
Ane sa a, sityasyon sekirite a ann Ayiti – ki frajil depi plizyè lane – te kraze lè gang vyolan te sezi kèk gwo moso nan kapital la epi menase pou pran plis teren. Plis pase 2500 moun te pèdi lavi e dè douzèn milye zòt te deplase kite kay yo. Yo te atake bilding gouvènman, pami yo pòs polis; yo anvayi prizon; prensipal aewopò a te fèmen; nan koze a, premye-minis la demisyonnen.
Sekretè Deta Blinken te fè remake ke depi mwa Mas gen kèk devlopman politik pozitif ann Ayiti:
« Ayisyen te mete sou pye yon Konsèy Prezidansyèl Tranzisyon (KPT). Gen yon gouvènman ak yon premye-minis pwovizwa, yon kabinè minis, e nou wè enstitisyon ki ap vanse pou fè travay pèp ayisyen an. Etazini apresye ke lidè yo ekate pwen kote yo pa antann yo, kote yo travay ansanm pou mete peyi a sou wout pou òganize eleksyon lib ak onèt. E nou espere KPT a pwal nonmen yon Konsèy Elektoral Pwovizwa pou òganize eleksyon sa yo. Se yon gran pa. »
Toutotan pwosesis poliitk la ap vanse, se konsa tou gen efò pou poze yon baz solid pou sekirite, se pawòl Sekretè Blinken :
« Misyon Miltinasyonal Sipò pou Sekirite a [ki gen ti non MSS], ke Nasyon Zini te otorize ane pase, li fè wout. Pandan plizyè mwa ki pase yo, plis pase 380 ajan polis ki te soti Kenya te debake pou yo sipòte Polis Nasyonal Ayiti a nan kad misyon sa a – e lòt gen pou vini toujou. Nan semenn ki pase yo, MSS ak polis Nasyonal Ayisyen an ogmante operasyon ansanm, kote yo mache sou gang yo e bay yon mesaj pwisan : se pèp ayisyen an – se pa gang ayisyen yo – ki pwal ekri avni peyi a. »
Etazini rete pi gwo donatè finans pou Ayiti, e ladann finans pou MSS la. Sekretè Blinken chante lwanj lòt peyi ki te leve pye yo pou ede Ayiti : misyon an pa t ap posib san yo – Kenya; ansanm ak Kanada, Jamayik, ak Salvadò.
« Men nan moman kritik sa a, » li di, « Nou bezwen plis polis pou kenbe epi reyalize objektif misyon sa a. » Nan reyinyon Asanble Jeneral l-ONU an, Etazini pwal mete sou pye yon reyinyon nan nivo minis pou ankouraje moun bay plis kontribisyon pou ede bagay yo mache.
« Nou wè yon bon koumansman pou fè Ayiti vanse, men gen anpil bagay ki rete pou fèt, » se Sekretè Blinken ki ap pale. « Nou gen detèminasyon pou ede pèp ayisyen an ekri avni ke li merite a. »
Sete yon editoryal ki reflete opinyon Gouvènman Etazini an.
Pou Rive Nan Yon Ayiti Ki Gen Sekirite Ak Demokrasi
