Kounyea, yon editoryal ki reflete opinion Gouvènman Etazini an:
Pandan dizèn lane ki pase a, mond la ap fè tranzisyon pou kite kabiran ki soti anba tè pou ale nan enèji vèt.
E pandan modèl ekonomi vèt la chita sou mwayen pou amelyore sante moun ak pou fè jistis pou anviwònman an, pandan li ap fè gwo rediksyon nan danje pou anviwònman an ak degradasyon anviwònman an, li vini ak yon pri ki twò wo pou moun ka tolere li.
Se paske li boukante petwòl ak gaz pou materyèl mineral tankou Aliminyòm, Cobalt, ak Polysilicon, e anpil nan yo fèt sou kouraj timoun ak travay esklav.
12 nan minrè enpòtan sa yo enskri nan lis ke Depatman Travay Etazini sot pibliye ki rele Lis Machandiz ki fèt gras ak travay timoun oubyen nan travo fòse, se pawòl Thea Mei Lee, ki se Asistan Sou-Sekretè Depatman Travay pou Afè Travay Entènasyonal.
« Pandan revolisyon enèji vèt la ap akselere, se konsa demann pou minrè ki enpòtan anpil yo ap akselere tou. Plis nou ezite, se plis timoun pwal travay palafòs nan min danjre, se plis travayè pwal sibi eksplwatasyon, se plis abi ki la lontan nan travay pwal vin pran rasin nan chèn distribisyon minrè enpòtan yo. »
Apeprè 70 pousan Cobalt, ki sèvi nan batri lithium yo, soti nan Repiblik Kongo. Yo pran li nan tè gras ak kouraj anviwon 255,000 travayè, yon afè 40,000 nan yo se timoun ki ka menm gen laj 6 zan.
An menm tan, 22 pousan Aliminyòm ki anba tè a, ansanm ak 45 pousan Polysilicon, yon eleman enpòtan nan pano solèy yo, ou ka jwenn yo nan pwovens Xinjiang nan LaChin. Xinjiang se la tou gen minorite etnik Uygur ke gouvènman an pèsekite.
« Depi 2020, nou idantifye 6 machandiz ki fèt nan fòse Uygur travay nan LaChin, e ane sa a nou ajoute 6 lòt ki se soda ki pa bon pou sante, silicon nan nivo metal, ak aliminyòm. »
« LaChin se youn nan pi gwo ekspòtatè mondyal pou prèske tout metal sa yo,” se pawòl Asistan Sousekretè Lee.
« Machandiz sa yo ki pote mak move kondisyon se eleman nesesè nan elektwonik, konstriksyon, otomobil, ak teknoloji enèji renouvlab, e ekspòtasyon sa yo ke moun bezwen anpil gen defi ki ap ogmante pou fè biznis entènasyonal yo chache asire ke chèn distribisyon yo pa gen pwodui ki soti nan travo fòse. »
Travo fòse ak travay timoun, ou jwenn sa twòp nan mond la – menm nan moman gen pwosperite e nan peyi rich kou peyi pòv, » dapre Asistan Sousekretè Lee. « Pandan nou ap chache akselere devlopman chèn distribisyon enèji pwòp, nou dwe an menm tan plase regleman ke nou ka fè respekte pou pwoteksyon travayè… E nou dwe kole tèt ansanm ak peyi ki wè pwoblèm nan menm jan ak nou pou asire ke nou pa izole nan travay sa a. »
Sete yon editoryal ki reflete opinion Gouvènman Etazini an.