Kounyea, yon editoryal ki reflete ideyal ak enstitisyon ameriken yo:
Chak 4èm jedi mwa Novanm, Ameriken obsève Thanksgiving, Jou Remèsiman. Malgre jou konje a sanble ak selebrasyon tradisyonèl rekòt yo menm jan sa fèt nan sosyete ki baze sou agrikilti yo, jan yo fè sa depi dè milye lane, Thanksgiving onore eksperyans premye moun yo ki te soti ann Ewòp pou yo tabli nan sa ki tounen jodi a nòdès Etazini.
Sete ant 21 Septanm ak 11 Novanm 1621, 53 Angle, gason, fanm ak timoun, te jwenn ak yon afè 90 natif Ameriken nan yon gran dine pou remèsi moun sa yo pou premye rekòt yo a nan nouvo kote yo rete a, ki se koloni Plymouth nan sa ki rele jounen jodi a eta Massachusetts.
Lè yo te rive nan mwa Novanm ane anvan an, se tris pou nou di ke yo pat prepare ditou pou fredi sevè ki t ap tann yo nan yon sezon ivè nan Massachusetts. San gwo èd vwazen Wampanoag yo, 102 Ewopeyen ki te soti nan bato Mayflower a pou mete pye sou tè ameriken an, li byen posib pou okenn nan yo pa te siviv pou wè sezon prentan ki t ap vini an.
Premye selebrasyon Thanksgiving nan, malgre yo patko rele li konsa, moutre jwèt, demonstrasyon militè, ak anpil rejwisans. E apre yon sèvis relijye, yon dine sèf griye, kana ak lòt bèt volay, pwason ak bèt dlo nan kokiy, ansanm ak mayi griye ak pen mayi, legim ak fwi ke tout moun te byen kontan manje.
Tradisyon sa a rete jouk jounen jodi a, malgre menu an chanje. Zanmi ak fanmi, sa ki lwen ak sa ki pre rasanble kounyea bò tab fèt la kote yon kodenn griye santi li fyè pou li nan pozisyon sa a, kote li gen pou antoure li bon ti manje distraksyon an fòm pate ki chaje ak bon bagay andan yo epi ak sòs cranberry, pòm de tè ak sòs pwa ak tout kalite legim. Ak yon pate joumou ki ak tann nan zèl kodenn nan. Jou sa a rete yon jou pou moun jwe jwèt nan jounen an e pou yo swiv yon match foutbòl zepòl kare sou televizyon pandan yo ap dijere dine a.
« Nan tout istwa peyi nou an, sezon sa a ki fèt pou refleksyon e pou nou voye remèsiman moute, vini nan bon tan kou nan move tan, » sa se pawòl Prezidan Joe Biden.
« Anvan te gen yon Etazini Damerik, Peleren yo te selebre Thanksgiving pou onore premye bon rekòt yo e pou sipò ak jenewozite pèp Wampanoag la ki te fè li posib, » se pawòl Prezidan Biden.
Thanksgiving te koumanse kòm yon priyè imigran yo pou rekonesans, imigran ki, san sipò vwazen natif yo, li preske sèten ke yo pa t ap siviv premye ane yo a nan Nò Amerik la. Jounen jodi a, Thanksgiving se yon rasanbleman fanmi ak zanmi, kote yon lòt fwa ankò yo prezante rekonesans yo dèske yo te jwenn chans pou yon bèl avni.
Sete yon editoryal ki reflete ideyal ak enstitisyon ameriken yo.