Kounyea, yon editoryal ki reflete opinyon Gouvènman Etazini an:
Nan mwa Septanm, Konsèy Sekirite l-ONU an te renouvle Misyon Sekirite Miltinasyonal (MSS) ke Kenya ap dirije pou Ayiti a pou 12 mwa pou ede lapolis Ayiti mete kontwòl sou pakèt vyolans gang ki bloke peyi a depi dèz ane.
Nan mwa Oktòb, Leslie Voltaire, ki pou kounyea se alatèt Konsèy Prezidansyèl Tranzisyon an, te mande ofisyèlman pou MSS la tounen yon operasyon lapè l-ONU ki pa manke anyen pou li travay. Yon tranzisyon konsa ta dwe pase nan yon vòt Konsèy Sekirite a. Etazini sipòte ak tout fòs yon efò konsa.
Nan yon rankont Konsèy Sekirite a ak laprès 20 Novanm, Asistan Reprezantan Etazini nan Nasyon Zini Dorothy Shea te souliyen nesesite pou Konsèy Sekirite a tande apèl gouvènman ayisyen an ki bezwen gen asirans ke li ap ka kenbe nan lit kont vyolans ak aktivite ki meprize lalwa ann Ayiti. Li te fè wè ke nan mitan mwa Novanm, Konsèy Pèmanan Òganizasyon Eta Ameriken yo te adopte yon rezolisyon ki sipòte tranzisyon an.
« Kounyea nou tande sipò pou yon tranzisyon ki ap mennen nan yon misyon pou kenbe lapè, sipò ki soti nan gouvènman an, bò kote dirijan yo nan misyon MSS la ak peyi yo ki kontribye moun ladan li, ak dirijan nan rejyon an, ki reprezante vwa tout Sid Mondyal la. Li lè pou Konsèy Sekirite a aji pou fè premye pa yo pou reyalize demann Ayiti a pou ede retabli sekirite pou pèp Ayiti a. »
Asistan Anbasadè Shea chante lwanj « moun vanyan ki soti Kenya, Jamayik, Beliz, ak fòs bahameyen yo, yo tout ki nan MSS la pou efò yo nan ede pwoteje rezidan yo, ede sezi zam, epi ede repouse gang nan plizyè zonn. » Li ensiste pou di ke yon tranzisyon pou fè MSS tounen yon operasyon lapè ta «fasilite misyon MSS la ak peyi ki sipòte li yo pou yo pwofite finansman l-ONU ki deja la a, ak anplwaye li yo ansanm ak sipò pou deplasman yo ak finansman li ke fasil ka prevwa e ki ka kontinye vini. »
« Etazini gen konfyans ke Konsèy sa a ka, yon lòt fwa ankò, mete ansanm pou adapte repons nou pou kriz Ayiti a epi detèmine ki otorite pou yo bay yon posib operasyon lapè pou li ka fè fas kòmsadwa ak sityasyon ki la kounyea epi pran leson nan sa ki pase deja pou pa gen plis moun ki viktim, epi pou yo pa repete menm erè yo.
« An nou tande konsantman peyi ki ap resevwa asistans la, ak dezi li pou li gen estabilite, sekirite, ak yon solisyon politik ki ap gen Ayisyen nan tèt li gras ak eleksyon lib e onèt san pèdi tan. »
« Si nou fè sa, » se Asistan Anbasadè Shea ki ap pale, « tèt ansanm nou an ap voye yon mesaj djanm bay pèp Ayiti a ki se : mond la – tout mond la – kanpe bò kote nou. »
Sete yon editoryal ki reflete opinyon Gouvènman Etazini an.